ಮಿಯಾಮಿ (ಅಮೆರಿಕ): ಫಿಫಾ ವಿಶ್ವಕಪ್ನ ರೋಚಕ ರೌಂಡ್ ಆಫ್ 32 ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಅರ್ಜೆಂಟೀನಾ ತಂಡ ಹೆಚ್ಚುವರಿ ವೇಳೆಯಲ್ಲಿ ಕೇಪ್ ವರ್ಡೆ ವಿರುದ್ಧ 3-2 ಗೋಲುಗಳ ಅಂತರದಲ್ಲಿ ಗೆಲುವು ಸಾಧಿಸಿ ರೌಂಡ್ ಆಫ್ 16ಕ್ಕೆ ಪ್ರವೇಶಿಸಿದೆ.
ಐದು ಲಕ್ಷಕ್ಕೂ ಕಡಿಮೆ ಜನಸಂಖ್ಯೆ ಹೊಂದಿರುವ ಕೇಪ್ ವರ್ಡೆ ತಂಡ ಅರ್ಜೆಂಟೀನಾಗೆ ತೀವ್ರ ಪೈಪೋಟಿ ನೀಡಿತು. ಪಂದ್ಯದಲ್ಲಿ 29ನೇ ನಿಮಿಷದಲ್ಲಿ ಲಿಯೋನೆಲ್ ಮೆಸ್ಸಿ ಗೋಲು ದಾಖಲಿಸಿ ಅರ್ಜೆಂಟೀನಾಗೆ ಮುನ್ನಡೆ ತಂದುಕೊಟ್ಟರು. ಇದು ಈ ಟೂರ್ನಿಯಲ್ಲಿ ಮೆಸ್ಸಿ ಗಳಿಸಿದ ಏಳನೇ ಗೋಲು ಹಾಗೂ ವಿಶ್ವಕಪ್ ಇತಿಹಾಸದಲ್ಲಿ ಅವರ 20ನೇ ಗೋಲು ಎಂಬ ದಾಖಲೆಯಾಗಿದೆ.
ಆದರೆ 59ನೇ ನಿಮಿಷದಲ್ಲಿ ಡೆರಾಯ್ ಡುವಾರ್ಟೆ ಗೋಲು ಬಾರಿಸಿ ಕೇಪ್ ವರ್ಡೆಗೆ ಸಮಬಲ ತಂದುಕೊಟ್ಟರು. ನಿಗದಿತ ಸಮಯದಲ್ಲಿ ಫಲಿತಾಂಶ ಹೊರಬರದ ಕಾರಣ ಪಂದ್ಯ ಹೆಚ್ಚುವರಿ ವೇಳೆಗೆ ಸಾಗಿತು.
ಹೆಚ್ಚುವರಿ ವೇಳೆಯಲ್ಲಿ ಲಿಸಾಂಡ್ರೊ ಮಾರ್ಟಿನೆಜ್ ಅರ್ಜೆಂಟೀನಾಗೆ ಮತ್ತೊಮ್ಮೆ ಮುನ್ನಡೆ ನೀಡಿದರೂ, ಸಿಡ್ನಿ ಲೋಪ್ಸ್ ಕಬ್ರಾಲ್ ಸಮಬಲದ ಗೋಲು ಬಾರಿಸಿ ಪಂದ್ಯವನ್ನು ಮತ್ತಷ್ಟು ರೋಚಕಗೊಳಿಸಿದರು.
ಅಂತಿಮವಾಗಿ 111ನೇ ನಿಮಿಷದಲ್ಲಿ ಮೆಸ್ಸಿ ನೀಡಿದ ಕಾರ್ನರ್ ಕಿಕ್ನ್ನು ಕ್ರಿಸ್ಟಿಯನ್ ರೊಮೆರೊ ಹೆಡರ್ ಮೂಲಕ ಗುರಿಯತ್ತ ತಳ್ಳಿದ ವೇಳೆ, ಕೇಪ್ ವರ್ಡೆ ಆಟಗಾರ ಡಿನೇ ಬೋರ್ಜಸ್ ಅವರಿಂದ ಆತ್ಮಘಾತಿ ಗೋಲು ದಾಖಲಾಗಿದ್ದು, ಅರ್ಜೆಂಟೀನಾ 3-2 ಅಂತರದಲ್ಲಿ ರೋಚಕ ಜಯ ದಾಖಲಿಸಿತು.
ಇದಕ್ಕೂ ಮೊದಲು ನಡೆದ ಮತ್ತೊಂದು ಪಂದ್ಯದಲ್ಲಿ ಈಜಿಪ್ಟ್ ತಂಡ ಆಸ್ಟ್ರೇಲಿಯಾ ವಿರುದ್ಧ ಪೆನಾಲ್ಟಿ ಶೂಟ್ಔಟ್ನಲ್ಲಿ 4-2 ಅಂತರದ ಗೆಲುವು ಸಾಧಿಸಿ ಮೊದಲ ಬಾರಿಗೆ ವಿಶ್ವಕಪ್ ನಾಕೌಟ್ ಹಂತದಲ್ಲಿ ಜಯ ದಾಖಲಿಸಿತು. ನಿಗದಿತ ಹಾಗೂ ಹೆಚ್ಚುವರಿ ಸಮಯದಲ್ಲಿ ಉಭಯ ತಂಡಗಳು 1-1 ಸಮಬಲ ಸಾಧಿಸಿದ್ದವು.
ಈಗ ರೌಂಡ್ ಆಫ್ 16ನಲ್ಲಿ ಅರ್ಜೆಂಟೀನಾ ಹಾಗೂ ಈಜಿಪ್ಟ್ ತಂಡಗಳು ಮುಖಾಮುಖಿಯಾಗಲಿವೆ.
