ಜುಲೈ 25ರಿಂದ ಐತಿಹಾಸಿಕ 135ನೇ ಡ್ಯುರಾಂಡ್ ಕಪ್ಗೆ ಚಾಲನೆ; ಕೋಲ್ಕತ್ತಾದಲ್ಲಿ ಉದ್ಘಾಟನಾ ಪಂದ್ಯ
ಭಾರತದ ಪ್ರತಿಷ್ಠಿತ ಫುಟ್ಬಾಲ್ ಟೂರ್ನಿಗಳಲ್ಲೊಂದಾದ 135ನೇ ಡ್ಯುರಾಂಡ್ ಕಪ್ ಜುಲೈ 25ರಿಂದ ಕೋಲ್ಕತ್ತಾದಲ್ಲಿ ಆರಂಭವಾಗಲಿದ್ದು, ಆಗಸ್ಟ್ 23ರವರೆಗೆ ನಡೆಯಲಿದೆ.
ಈ ಬಾರಿಯ ಟೂರ್ನಿಯ ಪಂದ್ಯಗಳು ಕೋಲ್ಕತ್ತಾ, ರಾಂಚಿ, ಇಂಫಾಲ್, ಶಿಲ್ಲಾಂಗ್ ಹಾಗೂ ಗುವಾಹಟಿ ನಗರಗಳಲ್ಲಿ ನಡೆಯಲಿವೆ. ಎಂದಿನಂತೆ ಕೋಲ್ಕತ್ತಾ ಟೂರ್ನಿಯ ಪ್ರಮುಖ ಕೇಂದ್ರವಾಗಿದ್ದು, ಉದ್ಘಾಟನಾ ಪಂದ್ಯ, ಎರಡು ಕ್ವಾರ್ಟರ್ಫೈನಲ್, ಒಂದು ಸೆಮಿಫೈನಲ್ ಹಾಗೂ ಫೈನಲ್ ಪಂದ್ಯಗಳಿಗೆ ಆತಿಥ್ಯ ವಹಿಸಲಿದೆ. ಈ ಪಂದ್ಯಗಳು ವಿವೇಕಾನಂದ ಯುವ ಭಾರತಿ ಕ್ರೀಡಾಂಗಣ ಮತ್ತು ಕಿಶೋರ್ ಭಾರತಿ ಕ್ರೀಡಾಂಗಣಗಳಲ್ಲಿ ನಡೆಯಲಿವೆ.
ಜಾರ್ಖಂಡ್ ರಾಜಧಾನಿ ರಾಂಚಿ ಮೊದಲ ಬಾರಿಗೆ ಡ್ಯುರಾಂಡ್ ಕಪ್ಗೆ ಆತಿಥ್ಯ ವಹಿಸುತ್ತಿದ್ದು, ಬಿರ್ಸಾ ಮುಂಡಾ ಕ್ರೀಡಾಂಗಣದಲ್ಲಿ ಜುಲೈ 26ರಿಂದ ಆಗಸ್ಟ್ 16ರವರೆಗೆ ಲೀಗ್ ಪಂದ್ಯಗಳು ಹಾಗೂ ಒಂದು ಕ್ವಾರ್ಟರ್ಫೈನಲ್ ಪಂದ್ಯ ನಡೆಯಲಿದೆ.
ಈ ವರ್ಷದ ಟೂರ್ನಿಯಲ್ಲಿ ಇಂಡಿಯನ್ ಸೂಪರ್ ಲೀಗ್ (ISL) ಕ್ಲಬ್ಗಳು, ಐ-ಲೀಗ್ ತಂಡಗಳು, ಸರ್ವಿಸಸ್ ತಂಡಗಳು, ಉದಯೋನ್ಮುಖ ದೇಶೀಯ ಕ್ಲಬ್ಗಳು ಹಾಗೂ ವಿದೇಶಿ ತಂಡಗಳು ಭಾಗವಹಿಸಲಿವೆ.
ಶ್ರೀಲಂಕಾ ಸಶಸ್ತ್ರ ಪಡೆಗಳ ಡಿಫೆಂಡರ್ಸ್ ಎಫ್ಸಿ ಹಾಗೂ ಮೇಘಾಲಯ ಪ್ರೀಮಿಯರ್ ಲೀಗ್ ಚಾಂಪಿಯನ್ ನೋಂಗ್ಕ್ಸೆಹ್ ಸ್ಪೋರ್ಟ್ಸ್, ಸೋಷಿಯಲ್ ಅಂಡ್ ಕಲ್ಚರಲ್ ಕ್ಲಬ್ ಈ ಬಾರಿ ಮೊದಲ ಬಾರಿಗೆ ಡ್ಯುರಾಂಡ್ ಕಪ್ನಲ್ಲಿ ಕಣಕ್ಕಿಳಿಯಲಿವೆ.
