ದುಬೈ: ಜಾಗತಿಕ ಪ್ರವಾಸೋದ್ಯಮ ಕ್ಷೇತ್ರದಲ್ಲಿ ತನ್ನ ಸ್ಪರ್ಧಾತ್ಮಕತೆಯನ್ನು ಮತ್ತಷ್ಟು ಹೆಚ್ಚಿಸುವ ಉದ್ದೇಶದಿಂದ ದುಬೈ ಎರಡು ಹೊಸ ಉಪಕ್ರಮಗಳನ್ನು ಘೋಷಿಸಿದೆ. ದುಬೈ ಕ್ರೌನ್ ಪ್ರಿನ್ಸ್ ಶೇಖ್ ಹಮ್ದಾನ್ ಬಿನ್ ಮೊಹಮ್ಮದ್ ಬಿನ್ ರಶೀದ್ ಅಲ್ ಮಕ್ತೂಮ್ ಈ ಯೋಜನೆಗಳನ್ನು ಪ್ರಕಟಿಸಿದ್ದಾರೆ. ವಿಶೇಷ ಆಹ್ವಾನ ಆಧಾರಿತ ಪ್ರವಾಸಿ ಸದಸ್ಯತ್ವ ಕಾರ್ಯಕ್ರಮ ಹಾಗೂ ‘ವಿಸಿಟ್ ದುಬೈ’ ಅಧಿಕೃತ ವೆಬ್‌ಸೈಟ್ ಮೂಲಕ ಪ್ರವಾಸಿ ವೀಸಾಕ್ಕೆ ಅರ್ಜಿ ಸಲ್ಲಿಸುವ ಹೊಸ ಸೌಲಭ್ಯ ಈ ಉಪಕ್ರಮಗಳ ಪ್ರಮುಖ ಆಕರ್ಷಣೆಯಾಗಿವೆ.
‘ದುಬೈ ಆಕ್ಸೆಸ್ ಕ್ಲಬ್’ ವಿಶೇಷ ಸದಸ್ಯತ್ವ ಯೋಜನೆ
‘ದುಬೈ ಆಕ್ಸೆಸ್ ಕ್ಲಬ್’ ಹೆಸರಿನ ಈ ಯೋಜನೆ, ದುಬೈಗೆ ಪದೇಪದೆ ಭೇಟಿ ನೀಡುವ ಪ್ರವಾಸಿಗರಿಗಾಗಿ ರೂಪಿಸಲಾದ ಆಹ್ವಾನ ಆಧಾರಿತ ಸದಸ್ಯತ್ವ ಕಾರ್ಯಕ್ರಮವಾಗಿದೆ. ಇದರ ಸದಸ್ಯರಿಗೆ ವಿಶೇಷ ಅನುಭವಗಳು, ಸೇವೆಗಳು ಮತ್ತು ಹಲವು ಸೌಲಭ್ಯಗಳು ಲಭ್ಯವಾಗಲಿವೆ. ಆಯ್ದ ಕಾರ್ಪೊರೇಟ್ ಸಂಸ್ಥೆಗಳು, ಪ್ರವಾಸೋದ್ಯಮ ಹಾಗೂ ಆತಿಥ್ಯ ಕ್ಷೇತ್ರದ ಪಾಲುದಾರರ ಮೂಲಕ ಮಾತ್ರ ಸದಸ್ಯತ್ವಕ್ಕೆ ಅರ್ಜಿ ಸಲ್ಲಿಸಲು ಅವಕಾಶವಿರುತ್ತದೆ.
ಈ ಯೋಜನೆಯಡಿ ಸದಸ್ಯರಿಗೆ ಐದು ವರ್ಷಗಳ ಅವಧಿಯ ಬಹುಪ್ರವೇಶ (ಮಲ್ಟಿಪಲ್ ಎಂಟ್ರಿ) ವೀಸಾ ನೀಡಲಾಗುತ್ತದೆ. ಇದರ ಮೂಲಕ ಒಂದು ವರ್ಷದ ಅವಧಿಯಲ್ಲಿ ಪ್ರತಿ ಭೇಟಿಗೆ ಗರಿಷ್ಠ 90 ದಿನಗಳವರೆಗೆ ದುಬೈನಲ್ಲಿ ಉಳಿಯಬಹುದು. ಇದರೊಂದಿಗೆ ಉಚಿತ ಸಿಮ್ ಕಾರ್ಡ್ ಹಾಗೂ ಆಯ್ದ ಹೋಟೆಲ್‌ಗಳು, ಪ್ರವಾಸಿ ಆಕರ್ಷಣೆಗಳು ಮತ್ತು ಚಿಲ್ಲರೆ ವ್ಯಾಪಾರ ಮಳಿಗೆಗಳಲ್ಲಿ ಬಳಸಲು 2,000 ಯುಎಇ ದಿರ್ಹಮ್‌ಗಳ ಕ್ರೆಡಿಟ್ ಸೌಲಭ್ಯವೂ ದೊರೆಯಲಿದೆ.
ಈ ಯೋಜನೆಯಡಿ ಸಲ್ಲಿಕೆಯಾಗುವ ವೀಸಾ ಅರ್ಜಿಗಳನ್ನು ದುಬೈನ ವಿದೇಶಿಗರ ವಾಸ್ತವ್ಯ ಮತ್ತು ವಲಸೆ ವ್ಯವಹಾರಗಳ ಮಹಾನಿರ್ದೇಶನಾಲಯ (GDRFA) ಪರಿಶೀಲಿಸಲಿದೆ. ಸದಸ್ಯತ್ವ ಮತ್ತು ವೀಸಾ ಶುಲ್ಕ ಸೇರಿದಂತೆ ‘ದುಬೈ ಆಕ್ಸೆಸ್ ಕ್ಲಬ್’ ಅರ್ಜಿ ಶುಲ್ಕ 4,032.50 ಯುಎಇ ದಿರ್ಹಮ್‌ಗಳಾಗಿದೆ.
‘ವಿಸಿಟ್ ದುಬೈ’ ಮೂಲಕ ನೇರ ವೀಸಾ ಅರ್ಜಿ
ಎರಡನೇ ಉಪಕ್ರಮದಡಿ ದುಬೈನ ಅಧಿಕೃತ ಪ್ರವಾಸೋದ್ಯಮ ವೆಬ್‌ಸೈಟ್ ‘ವಿಸಿಟ್ ದುಬೈ’ ಮೂಲಕ ಪ್ರವಾಸಿ ವೀಸಾಕ್ಕೆ ನೇರವಾಗಿ ಅರ್ಜಿ ಸಲ್ಲಿಸುವ ಅವಕಾಶ ಕಲ್ಪಿಸಲಾಗಿದೆ. ಪ್ರವಾಸಿಗರಿಗೆ ಮಾಹಿತಿ ಒದಗಿಸುವುದು, ಪ್ರವಾಸಿ ತಾಣಗಳ ಟಿಕೆಟ್ ಕಾಯ್ದಿರಿಸುವುದು ಮತ್ತು ಪ್ರವಾಸದ ವೇಳಾಪಟ್ಟಿ ರೂಪಿಸುವುದು ಸೇರಿದಂತೆ ಹಲವು ಸೇವೆಗಳನ್ನು ಈ ಡಿಜಿಟಲ್ ವೇದಿಕೆ ಈಗಾಗಲೇ ಒದಗಿಸುತ್ತಿದೆ.
‘ಶೇರ್ಡ್ ಡಿಜಿಟಲ್ ಚಾನೆಲ್ಸ್ ಇನಿಶಿಯೇಟಿವ್’ ಅಡಿಯಲ್ಲಿ ಪ್ರವಾಸಿಗರು ಈ ವೇದಿಕೆಯ ಮೂಲಕ ಏಕಪ್ರವೇಶ (ಸಿಂಗಲ್ ಎಂಟ್ರಿ) ಮತ್ತು ಬಹುಪ್ರವೇಶ (ಮಲ್ಟಿಪಲ್ ಎಂಟ್ರಿ) ಪ್ರವಾಸಿ ವೀಸಾಗಳಿಗೆ ಅರ್ಜಿ ಸಲ್ಲಿಸಬಹುದು. ಅರ್ಜಿಗಳ ಪರಿಶೀಲನೆ ಮತ್ತು ವೀಸಾ ವಿತರಿಸುವ ಜವಾಬ್ದಾರಿಯನ್ನು GDRFA ನಿರ್ವಹಿಸಲಿದೆ.
ಈ ಎರಡೂ ಉಪಕ್ರಮಗಳನ್ನು 2026ರ ನವೆಂಬರ್‌ನಲ್ಲಿ ಜಾರಿಗೆ ತರಲು ಉದ್ದೇಶಿಸಲಾಗಿದೆ. ಪ್ರವಾಸಿಗರಿಗೆ ಸೇವೆಗಳನ್ನು ಸುಲಭವಾಗಿ ತಲುಪಿಸುವುದು, ದುಬೈ ಜೊತೆಗಿನ ಅವರ ಸಂಪರ್ಕವನ್ನು ಬಲಪಡಿಸುವುದು ಹಾಗೂ ಸುಗಮ ಪ್ರವಾಸದ ಅನುಭವ ಒದಗಿಸುವುದು ಯೋಜನೆಗಳ ಮುಖ್ಯ ಗುರಿಯಾಗಿದೆ. ವ್ಯಾಪಾರ ಮತ್ತು ವಿರಾಮ ಪ್ರವಾಸಗಳಿಗಾಗಿ ವಿಶ್ವದ ಪ್ರಮುಖ ಮೂರು ತಾಣಗಳಲ್ಲಿ ಒಂದಾಗಿ ದುಬೈಯನ್ನು ರೂಪಿಸುವ ಉದ್ದೇಶವೂ ಇದಕ್ಕಿದೆ ಎಂದು ಎಮಿರೇಟ್ಸ್ ಸುದ್ದಿ ಸಂಸ್ಥೆ (WAM) ವರದಿ ಮಾಡಿದೆ.
ಯೋಜನೆಗಳನ್ನು ಪ್ರಕಟಿಸಿದ ಶೇಖ್ ಹಮ್ದಾನ್, ಪ್ರವಾಸಿಗರ ಪ್ರಯಾಣದ ಪ್ರತಿಯೊಂದು ಹಂತದಲ್ಲೂ ಉತ್ತಮ ಅನುಭವ ಒದಗಿಸುವ ಮೂಲಕ ದುಬೈಯನ್ನು ವಿಶ್ವದ ಪ್ರಮುಖ ಮೂರು ಪ್ರವಾಸಿ ತಾಣಗಳಲ್ಲಿ ಒಂದಾಗಿಸುವ ಬದ್ಧತೆಯನ್ನು ವ್ಯಕ್ತಪಡಿಸಿದ್ದಾರೆ. ತಂತ್ರಜ್ಞಾನ ಬಳಕೆ, ನಾವೀನ್ಯತೆಗೆ ಉತ್ತೇಜನ ಮತ್ತು ಸಾರ್ವಜನಿಕ-ಖಾಸಗಿ ಸಹಭಾಗಿತ್ವದ ಬಲವರ್ಧನೆಯ ಮೂಲಕ ಹೆಚ್ಚಿನ ಹೂಡಿಕೆ ಆಕರ್ಷಿಸಿ, ಪ್ರವಾಸೋದ್ಯಮ ಕ್ಷೇತ್ರದ ದೀರ್ಘಕಾಲೀನ ಬೆಳವಣಿಗೆಗೆ ನೆರವಾಗುವ ಗುರಿ ಹೊಂದಲಾಗಿದೆ ಎಂದು ಅವರು ತಿಳಿಸಿದ್ದಾರೆ. ಇದು ದುಬೈ ಆರ್ಥಿಕ ಕಾರ್ಯಸೂಚಿ ‘D33’ಗೆ ಅನುಗುಣವಾಗಿದೆ ಎಂದೂ ಹೇಳಿದ್ದಾರೆ.
ದುಬೈ ಆರ್ಥಿಕತೆಯಲ್ಲಿ ಪ್ರವಾಸೋದ್ಯಮಕ್ಕೆ ಪ್ರಮುಖ ಸ್ಥಾನ
ದುಬೈ ಆರ್ಥಿಕತೆಯಲ್ಲಿ ಪ್ರವಾಸೋದ್ಯಮ ಪ್ರಮುಖ ಪಾತ್ರ ವಹಿಸುತ್ತಿದೆ. ಪಶ್ಚಿಮ ಏಷ್ಯಾದ ಪರಿಸ್ಥಿತಿಯಿಂದ ಜಾಗತಿಕ ಮಟ್ಟದಲ್ಲಿ ಹಲವು ಸವಾಲುಗಳಿದ್ದರೂ, 2026ರ ಆಗಸ್ಟ್‌ನಲ್ಲಿ ದುಬೈನ ಹೋಟೆಲ್‌ಗಳ ಕೊಠಡಿ ಭರ್ತಿ ಪ್ರಮಾಣ ಶೇ.90ರ ಸಮೀಪದಲ್ಲಿತ್ತು ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಇನ್ನು, ದುಬೈಗೆ ಭೇಟಿ ನೀಡುವಂತೆ ತಮ್ಮ ಸ್ನೇಹಿತರು ಮತ್ತು ಕುಟುಂಬದವರನ್ನು ಆಹ್ವಾನಿಸಿದ ಸ್ಥಳೀಯ ನಿವಾಸಿಗಳಿಗೆ ರಿಯಾಯಿತಿ ನೀಡುವ ಉದ್ದೇಶದಿಂದ ಸೆಪ್ಟೆಂಬರ್‌ನಲ್ಲಿ ಆರಂಭಿಸಿದ್ದ ವಿಶೇಷ ಅಭಿಯಾನವೂ ಉತ್ತಮ ಪ್ರತಿಕ್ರಿಯೆ ಪಡೆದಿದೆ. ಈ ಅಭಿಯಾನಕ್ಕೆ 90,000ಕ್ಕೂ ಹೆಚ್ಚು ಅರ್ಜಿಗಳು ಸಲ್ಲಿಕೆಯಾಗಿದ್ದು, ಬಳಿಕ ಅದು ಮುಕ್ತಾಯಗೊಂಡಿದೆ.
