ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಬಾಬಾ ಬಂದಾ ಸಿಂಗ್ ಬಹಾದುರ್ ಅವರ ಹುತಾತ್ಮ ದಿನದ ಅಂಗವಾಗಿ ಅವರಿಗೆ ಗೌರವ ನಮನ ಸಲ್ಲಿಸಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ ಸಂದೇಶ ಹಂಚಿಕೊಂಡಿರುವ ಅವರು, ಬಾಬಾ ಬಂದಾ ಸಿಂಗ್ ಬಹಾದುರ್ ಅವರ ಶೌರ್ಯ ಮತ್ತು ತ್ಯಾಗವನ್ನು ಸ್ಮರಿಸಿದ್ದಾರೆ.
ಅಮಿತ್ ಶಾ ಅವರು ಬಾಬಾ ಬಂದಾ ಸಿಂಗ್ ಬಹಾದುರ್ ಅವರನ್ನು “ಅಸಾಧಾರಣ ಯೋಧ, ಖಾಲ್ಸಾ ಸೇನೆಯ ಮೊದಲ ಸೇನಾನಿ ಹಾಗೂ ಅಪಾರ ಧೈರ್ಯದ ಪ್ರತೀಕ” ಎಂದು ವರ್ಣಿಸಿದ್ದಾರೆ. ಮಾತೃಭೂಮಿ, ಧರ್ಮ ಮತ್ತು ಸ್ವಾಭಿಮಾನ ರಕ್ಷಣೆಗೆ ತಮ್ಮ ಜೀವನವನ್ನು ಸಮರ್ಪಿಸಿದ್ದ ಅವರು ಮುಘಲ್ ಸೇನೆಯ ವಿರುದ್ಧ ಅನೇಕ ಯುದ್ಧಗಳಲ್ಲಿ ಜಯ ಸಾಧಿಸಿದ್ದರು ಎಂದು ತಿಳಿಸಿದ್ದಾರೆ.
ಅವರು ಮುಂದುವರೆದು, ಬಾಬಾ ಬಂದಾ ಸಿಂಗ್ ಬಹಾದುರ್ ಅವರ ನಾಯಕತ್ವದಲ್ಲಿ ದೊಡ್ಡ ಪ್ರದೇಶವು ಮುಘಲ್ ದಮನದಿಂದ ಮುಕ್ತವಾಯಿತು ಎಂದು ಹೇಳಿದ್ದಾರೆ. ರೈತರಿಗೆ ನ್ಯಾಯಸಮ್ಮತ ಹಕ್ಕು ದೊರಕುವಂತೆ ನ್ಯಾಯಯುತ ವ್ಯವಸ್ಥೆಯನ್ನು ಅವರು ಸ್ಥಾಪಿಸಿದ್ದರು ಎಂದು ಶಾ ತಿಳಿಸಿದ್ದಾರೆ.
ಅತೀ ಕಠಿಣ ಹಿಂಸೆಗಳನ್ನು ಅನುಭವಿಸಿದ್ದರೂ ಸಹ ಅವರು ಧರ್ಮಾಂತರಕ್ಕೆ ಒಪ್ಪಿಕೊಳ್ಳಲಿಲ್ಲ ಎಂಬುದನ್ನು ಅಮಿತ್ ಶಾ ತಮ್ಮ ಸಂದೇಶದಲ್ಲಿ ಸ್ಮರಿಸಿದ್ದಾರೆ.
