ಹೈದರಾಬಾದ್: ರಾಮ್ ಚರಣ್ ಅಭಿನಯದ ಬಹುನಿರೀಕ್ಷಿತ ಚಿತ್ರ ‘ಪೆಡ್ಡಿ’ ಭರ್ಜರಿ ಯಶಸ್ಸು ಕಂಡ ಬೆನ್ನಲ್ಲೇ ಚಿತ್ರತಂಡ ಹೈದರಾಬಾದ್ನಲ್ಲಿ ಯಶೋತ್ಸವ ಕಾರ್ಯಕ್ರಮವನ್ನು ಆಯೋಜಿಸಿತು. ಕಾರ್ಯಕ್ರಮದಲ್ಲಿ ನಟ ರಾಮ್ ಚರಣ್, ಚಿತ್ರತಂಡದ ಸದಸ್ಯರು ಹಾಗೂ ಮುಖ್ಯ ಅತಿಥಿಯಾಗಿ ಮೆಗಾಸ್ಟಾರ್ ಚಿರಂಜೀವಿ ಭಾಗವಹಿಸಿದ್ದರು.
ಕಾರ್ಯಕ್ರಮದಲ್ಲಿ ಮಾತನಾಡಿದ ರಾಮ್ ಚರಣ್, ‘ಪೆಡ್ಡಿ’ ಚಿತ್ರವು ತಮ್ಮ ಜೀವನದಲ್ಲಿ ವಿಶೇಷ ಸ್ಥಾನ ಪಡೆದಿದೆ ಎಂದು ಹೇಳಿದರು.
“ಕೆಲವು ಯಶಸ್ಸುಗಳು ನಮ್ಮನ್ನು ಯೋಚಿಸುವಂತೆ ಮಾಡುತ್ತವೆ. ಆದರೆ ‘ಪೆಡ್ಡಿ’ ನನಗೆ ಬೇರೆ ಯಾವ ಚಿತ್ರವೂ ನೀಡದಷ್ಟು ಪ್ರೀತಿ ಮತ್ತು ಅಭಿಮಾನವನ್ನು ಕೊಟ್ಟಿದೆ. ಈ ಯಶಸ್ಸು ನನಗೆ ತುಂಬಾ ವಿಭಿನ್ನ ಅನುಭವ ನೀಡುತ್ತಿದೆ. ಚಿತ್ರಕ್ಕೆ ಅದ್ಭುತ ಪ್ರತಿಕ್ರಿಯೆ ನೀಡಿದ ಪ್ರೇಕ್ಷಕರಿಗೆ ನಾನು ಹೃತ್ಪೂರ್ವಕ ಧನ್ಯವಾದಗಳನ್ನು ಸಲ್ಲಿಸುತ್ತೇನೆ,” ಎಂದು ಹೇಳಿದರು.
ಚಿತ್ರದ ಯಶಸ್ಸಿನ ಬಗ್ಗೆ ಮಾತನಾಡಿದ ಅವರು, ಎಲ್ಲ ವಯೋಮಾನದ ಪ್ರೇಕ್ಷಕರು ಚಿತ್ರವನ್ನು ಮೆಚ್ಚಿಕೊಂಡಿದ್ದಾರೆ ಎಂದು ಹೇಳಿದರು.
“ಮಕ್ಕಳಿಂದ ಹಿಡಿದು ಹಿರಿಯರವರೆಗೆ ಎಲ್ಲರೂ ಚಿತ್ರವನ್ನು ನೋಡಲು ಚಿತ್ರಮಂದಿರಗಳಿಗೆ ಬಂದಿದ್ದಾರೆ. ಅಷ್ಟೇ ಅಲ್ಲ, ಈಗ ಹಲವರು ನನ್ನನ್ನು ರಾಮ್ ಚರಣ್ ಎಂದು ಕರೆಯುವುದಕ್ಕಿಂತ ‘ಪೆಡ್ಡಿ’ ಎಂದೇ ಕರೆಯುತ್ತಿದ್ದಾರೆ. ಈ ಯಶಸ್ಸನ್ನು ಇನ್ನಷ್ಟು ವಿಶೇಷವಾಗಿಸಿದ್ದು ಇದೇ,” ಎಂದು ಸಂತಸ ವ್ಯಕ್ತಪಡಿಸಿದರು.
ಈ ವೇಳೆ ತಮ್ಮ ಮಗಳು ಕ್ಲಿನ್ ಕಾರಾ ಬಗ್ಗೆ ಮಾತನಾಡಿದ ರಾಮ್ ಚರಣ್, ಎಲ್ಲರ ಗಮನ ಸೆಳೆದರು.
“ನನ್ನ ಮಗಳು ಕ್ಲಿನ್ ಕಾರಾ ಮೊದಲು ನನ್ನನ್ನು ‘ನಾನ್ನ’ ಎಂದು ಕರೆಯುತ್ತಿದ್ದಳು. ಆದರೆ ‘ಪೆಡ್ಡಿ’ ಬಿಡುಗಡೆಯಾದ ನಂತರ ಅವಳು ‘ಹೇ ಪೆಡ್ಡಿ’ ಎಂದು ಕರೆಯಲು ಆರಂಭಿಸಿದ್ದಾಳೆ. ಆಗ ನಾನು, ‘ಅಪ್ಪನನ್ನು ಹೀಗೆ ಕರೆಯಬಾರದು’ ಎಂದು ಹೇಳಿದೆ. ಬಳಿಕ ಅವಳು ‘ಪೆಡ್ಡಿ ನಾನ್ನ’ ಎಂದು ಕರೆಯಲು ಶುರುಮಾಡಿದಳು,” ಎಂದು ಹೇಳಿ ನಗೆಚಟಾಕಿ ಹರಿಸಿದರು.
ಇದೇ ವೇಳೆ ನಿರ್ದೇಶಕ ಬುಚ್ಚಿ ಬಾಬು ಸನಾ ಅವರಿಗೆ ವಿಶೇಷ ಧನ್ಯವಾದಗಳನ್ನು ಅರ್ಪಿಸಿದ ರಾಮ್ ಚರಣ್, “ಬುಚ್ಚಿ ಬಾಬುವನ್ನು ನನಗೆ ಪರಿಚಯಿಸಿದ ಸುಕುಮಾರ್ ಅವರಿಗೆ ನಾನು ಋಣಿ. ತಂದೆಯೊಂದಿಗೆ ಚರ್ಚಿಸಲಾಗದ ಹಲವು ವಿಷಯಗಳ ಬಗ್ಗೆ ನನಗೆ ಅನುಮಾನ ಬಂದಾಗ ನಾನು ಸುಕುಮಾರ್ ಅವರಿಗೆ ಕರೆ ಮಾಡುತ್ತೇನೆ. ಅವರು ಅನೇಕ ವಿದ್ಯಾರ್ಥಿಗಳಿಗೆ ಮಾರ್ಗದರ್ಶನ ನೀಡುವ ಉಪನ್ಯಾಸಕರಂತೆ. ನನ್ನನ್ನೂ ತಮ್ಮ ವಿದ್ಯಾರ್ಥಿಯಂತೆ ನೋಡಿ ಅಮೂಲ್ಯ ಸಲಹೆಗಳನ್ನು ನೀಡಿದ್ದಾರೆ,” ಎಂದು ಹೇಳಿದರು.
‘ಪೆಡ್ಡಿ’ ಚಿತ್ರದ ಭರ್ಜರಿ ಯಶಸ್ಸಿನೊಂದಿಗೆ ರಾಮ್ ಚರಣ್ ಅವರ ಅಭಿಮಾನಿ ಬಳಗ ಮತ್ತಷ್ಟು ವಿಸ್ತರಿಸಿದ್ದು, ಚಿತ್ರವು ಬಾಕ್ಸ್ ಆಫೀಸ್ನಲ್ಲೂ ಉತ್ತಮ ಪ್ರದರ್ಶನ ಮುಂದುವರಿಸಿದೆ.
