ಲಖನೌ: ಉತ್ತರ ಪ್ರದೇಶ ವಿಧಾನ ಪರಿಷತ್ತಿನ 11 ಸ್ಥಾನಗಳಿಗೆ ನಡೆದ ದ್ವೈವಾರ್ಷಿಕ ಚುನಾವಣೆಯ ಎಲ್ಲ ಫಲಿತಾಂಶಗಳು ಪ್ರಕಟವಾಗಿವೆ. ಆಡಳಿತಾರೂಢ ಭಾರತೀಯ ಜನತಾ ಪಕ್ಷ (ಬಿಜೆಪಿ) ಆರು ಸ್ಥಾನಗಳನ್ನು ಗೆದ್ದಿದ್ದರೆ, ಸಮಾಜವಾದಿ ಪಕ್ಷ (ಎಸ್‌ಪಿ) ಐದು ಸ್ಥಾನಗಳಲ್ಲಿ ಜಯ ಸಾಧಿಸಿದೆ.
ಐದು ಪದವೀಧರ ಕ್ಷೇತ್ರಗಳ ಪೈಕಿ ಮೀರತ್ ಕ್ಷೇತ್ರದಿಂದ ಬಿಜೆಪಿಯ ದಿನೇಶ್ ಕುಮಾರ್ ಗೋಯಲ್ ಮತ್ತು ಆಗ್ರಾ ಕ್ಷೇತ್ರದಿಂದ ಡಾ. ಮನವೇಂದ್ರ ಪ್ರತಾಪ್ ಸಿಂಗ್ ಗೆಲುವು ಸಾಧಿಸಿದ್ದಾರೆ. ಇನ್ನು ಅಲಹಾಬಾದ್-ಝಾನ್ಸಿ ಕ್ಷೇತ್ರದಲ್ಲಿ ಸಮಾಜವಾದಿ ಪಕ್ಷದ ಡಾ. ಮಾನ್ ಸಿಂಗ್ ಯಾದವ್, ಲಖನೌ ಕ್ಷೇತ್ರದಲ್ಲಿ ಕಾಂತಿ ಸಿಂಗ್ ಹಾಗೂ ವಾರಾಣಸಿ ಕ್ಷೇತ್ರದಲ್ಲಿ ಆಶುತೋಷ್ ಸಿನ್ಹಾ ಜಯಗಳಿಸಿದ್ದಾರೆ.
ಶಿಕ್ಷಕರ ಕ್ಷೇತ್ರಗಳಲ್ಲಿ ಬಿಜೆಪಿಗೆ ನಾಲ್ಕು ಸ್ಥಾನ
ಆರು ಶಿಕ್ಷಕರ ಕ್ಷೇತ್ರಗಳ ಪೈಕಿ ಬಿಜೆಪಿಯ ಅಭ್ಯರ್ಥಿಗಳು ನಾಲ್ಕು ಸ್ಥಾನಗಳಲ್ಲಿ ಗೆಲುವು ದಾಖಲಿಸಿದ್ದಾರೆ. ಲಖನೌ ಕ್ಷೇತ್ರದಿಂದ ಉಮೇಶ್ ದ್ವಿವೇದಿ, ಮೀರತ್ ಕ್ಷೇತ್ರದಿಂದ ಶ್ರೀಚಂದ್ ಶರ್ಮಾ, ಬರೇಲಿ-ಮೊರಾದಾಬಾದ್ ಕ್ಷೇತ್ರದಿಂದ ಡಾ. ಹರಿ ಸಿಂಗ್ ಧಿಲ್ಲೋನ್ ಹಾಗೂ ಗೋರಖ್‌ಪುರ-ಫೈಜಾಬಾದ್ ಕ್ಷೇತ್ರದಿಂದ ಧ್ರುವ್ ಕುಮಾರ್ ತ್ರಿಪಾಠಿ ಆಯ್ಕೆಯಾಗಿದ್ದಾರೆ.
ಸಮಾಜವಾದಿ ಪಕ್ಷದ ಅಭ್ಯರ್ಥಿಗಳಾದ ಲಾಲ್ ಬಿಹಾರಿ ಯಾದವ್ ವಾರಾಣಸಿ ಶಿಕ್ಷಕರ ಕ್ಷೇತ್ರದಿಂದ ಹಾಗೂ ಡಾ. ಆಕಾಶ್ ಅಗರ್ವಾಲ್ ಆಗ್ರಾ ಶಿಕ್ಷಕರ ಕ್ಷೇತ್ರದಿಂದ ಗೆಲುವು ಸಾಧಿಸಿದ್ದಾರೆ.
ಉತ್ತರ ಪ್ರದೇಶ ವಿಧಾನ ಪರಿಷತ್ತಿನ ಐದು ಪದವೀಧರ ಮತ್ತು ಆರು ಶಿಕ್ಷಕರ ಕ್ಷೇತ್ರಗಳಿಗೆ ಅಕ್ಟೋಬರ್ 23ರಂದು ಮತದಾನ ನಡೆದಿತ್ತು. ಮತ ಎಣಿಕೆ ಪೂರ್ಣಗೊಂಡ ಬಳಿಕ ಎಲ್ಲ 11 ಕ್ಷೇತ್ರಗಳ ಅಂತಿಮ ಫಲಿತಾಂಶ ಪ್ರಕಟಿಸಲಾಗಿದೆ.
