ನವದೆಹಲಿ: ಕೈಗಾರಿಕಾ ಹಾಗೂ ವಾಣಿಜ್ಯ ಬಳಕೆಯ ಎಲ್ಪಿಜಿ (LPG) ಗ್ರಾಹಕರಿಗೆ ಕೇಂದ್ರ ಸರ್ಕಾರ ಮಹತ್ವದ ಸಿಹಿಸುದ್ದಿ ನೀಡಿದೆ. ಪಶ್ಚಿಮ ಏಷ್ಯಾ ಬಿಕ್ಕಟ್ಟಿನ ಸಂದರ್ಭದಲ್ಲಿ ವಿಧಿಸಲಾಗಿದ್ದ ವಾಣಿಜ್ಯ ಎಲ್ಪಿಜಿ (Non-Domestic Packed LPG) ಮೇಲಿನ ಎಲ್ಲಾ ವಲಯವಾರು ನಿರ್ಬಂಧಗಳನ್ನು ಸರ್ಕಾರ ಹಿಂಪಡೆದು, ಬಿಕ್ಕಟ್ಟಿನ ಹಿಂದಿನ ಮಟ್ಟದಲ್ಲಿ ಪೂರೈಕೆಯನ್ನು ಮರುಸ್ಥಾಪಿಸಿದೆ.
ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯದ ಪ್ರಕಟಣೆಯ ಪ್ರಕಾರ, ಬಿಕ್ಕಟ್ಟು ಆರಂಭವಾದ ಬಳಿಕ ಸ್ಥಗಿತಗೊಳಿಸಲಾಗಿದ್ದ ಬಲ್ಕ್ ಎಲ್ಪಿಜಿ ಪೂರೈಕೆಯನ್ನು ಇದೀಗ ಬಿಕ್ಕಟ್ಟಿನ ಪೂರ್ವದ ಬಳಕೆಯ ಶೇ.50ರಷ್ಟು ಮಟ್ಟಕ್ಕೆ ಮರುಪ್ರಾರಂಭಿಸಲಾಗಿದೆ. ಇದರಿಂದ ಕೈಗಾರಿಕಾ ಹಾಗೂ ವಾಣಿಜ್ಯ ವಲಯದ ಗ್ರಾಹಕರಿಗೆ ಗಮನಾರ್ಹ ಪರಿಹಾರ ದೊರೆಯಲಿದೆ.
ಇದೇ ವೇಳೆ, ಎಲ್ಪಿಜಿ ಉತ್ಪಾದನೆಗಾಗಿ ಮಾತ್ರ ಬಳಸುವಂತೆ ಮಾಡಲಾಗಿದ್ದ C3-C4 ಅನಿಲ ಘಟಕಗಳ ಕಡ್ಡಾಯ ಬಳಕೆಯನ್ನು ಸರ್ಕಾರ ಸಡಿಲಿಸಿದೆ. ಪೆಟ್ರೋಕೆಮಿಕಲ್ ಹಾಗೂ ಇತರೆ ಕೈಗಾರಿಕಾ ಬಳಕೆಗಳಿಗೆ ಈ ಘಟಕಗಳ ಹಂಚಿಕೆಯನ್ನು ಹೆಚ್ಚಿಸಲು ನಿರ್ಧರಿಸಲಾಗಿದ್ದು, ದೇಶೀಯ ಎಲ್ಪಿಜಿ ಲಭ್ಯತೆಗೆ ಯಾವುದೇ ಧಕ್ಕೆಯಾಗದಂತೆ ಕ್ರಮ ಕೈಗೊಳ್ಳಲಾಗುವುದು ಎಂದು ಸಚಿವಾಲಯ ಸ್ಪಷ್ಟಪಡಿಸಿದೆ.
ದೇಶೀಯ ಎಲ್ಪಿಜಿ ಉತ್ಪಾದನೆಯನ್ನು ದಿನಕ್ಕೆ ಕನಿಷ್ಠ 40 ಟಿಎಂಟಿ (TMT) ಮಟ್ಟದಲ್ಲಿ ಕಾಯ್ದುಕೊಳ್ಳುವುದರ ಜೊತೆಗೆ, ತೈಲ ಮಾರುಕಟ್ಟೆ ಕಂಪನಿಗಳಿಗೆ ವಾಣಿಜ್ಯ ಹಾಗೂ ಕೈಗಾರಿಕಾ ಎಲ್ಪಿಜಿ ಗ್ರಾಹಕರ ಮಾಹಿತಿಯನ್ನು ಸಮಗ್ರವಾಗಿ ನಿರ್ವಹಿಸುವಂತೆ ನಿರ್ದೇಶನ ನೀಡಲಾಗಿದೆ.
ಇದರೊಂದಿಗೆ, ಪೈಪ್ಡ್ ನ್ಯಾಚುರಲ್ ಗ್ಯಾಸ್ (PNG) ಸಂಪರ್ಕವನ್ನು ಇನ್ನಷ್ಟು ವಿಸ್ತರಿಸುವ ಬದ್ಧತೆಯನ್ನು ಸರ್ಕಾರ ಪುನರುಚ್ಚರಿಸಿದೆ. ಈಗಾಗಲೇ ಪಿಎನ್ಜಿ ಬಳಕೆಗೆ ಬದಲಾಗಿರುವ ವಾಣಿಜ್ಯ ಗ್ರಾಹಕರು ಅದನ್ನೇ ಮುಂದುವರಿಸಲಿದ್ದು, ಪಿಎನ್ಜಿ ಸೌಲಭ್ಯ ಇರುವ ಅಥವಾ ಅದಕ್ಕೆ ಬದಲಾಗುತ್ತಿರುವ ಅರ್ಹ ಎಲ್ಪಿಜಿ ಗ್ರಾಹಕರನ್ನು ಹಂತ ಹಂತವಾಗಿ ಪಿಎನ್ಜಿ ವ್ಯವಸ್ಥೆಗೆ ವರ್ಗಾಯಿಸಲಾಗುವುದು ಎಂದು ಸಚಿವಾಲಯ ತಿಳಿಸಿದೆ.
