ನವದೆಹಲಿ: ಹರಿಯಾಣದ ಐತಿಹಾಸಿಕ ರಾಖಿಗಢಿ ಪುರಾತತ್ವ ತಾಣದಲ್ಲಿ ಪತ್ತೆಯಾಗಿರುವ ಮಾನವ ಅಸ್ಥಿಪಂಜರಗಳನ್ನು ಹೆಚ್ಚಿನ ವೈಜ್ಞಾನಿಕ ಅಧ್ಯಯನಕ್ಕಾಗಿ ಭಾರತೀಯ ಮಾನವಶಾಸ್ತ್ರೀಯ ಸಮೀಕ್ಷೆ (Anthropological Survey of India)ಗೆ ಹಸ್ತಾಂತರಿಸಲಾಗಿದೆ.
ಭಾರತೀಯ ಪುರಾತತ್ವ ಸರ್ವೇಕ್ಷಣಾ ಇಲಾಖೆ (ASI) ಮತ್ತು ಭಾರತೀಯ ಮಾನವಶಾಸ್ತ್ರೀಯ ಸಮೀಕ್ಷೆ ನಡುವಿನ ಇತ್ತೀಚಿನ ಒಪ್ಪಂದದ (MoU) ಅನ್ವಯ ಈ ಕ್ರಮ ಕೈಗೊಳ್ಳಲಾಗಿದೆ. ಇದರಿಂದ ಸಿಂಧು-ಸರಸ್ವತಿ ನಾಗರಿಕತೆಯ ಪ್ರಮುಖ ನಗರ ಕೇಂದ್ರಗಳಲ್ಲಿ ಒಂದಾದ ರಾಖಿಗಢಿ ಕುರಿತು ಬಹುಶಾಖಾ ಸಂಶೋಧನೆಗೆ ಹೊಸ ಉತ್ತೇಜನ ಸಿಗುವ ನಿರೀಕ್ಷೆಯಿದೆ.
2025-26ರ ಉತ್ಖನನ ಅವಧಿಯಲ್ಲಿ ASI ನಡೆಸಿದ ಕಾರ್ಯಾಚರಣೆಯಲ್ಲಿ, ಈಗಾಗಲೇ ಸಮಾಧಿ ಪ್ರದೇಶವೆಂದು ಗುರುತಿಸಲಾಗಿದ್ದ ಮೌಂಡ್ ಸಂಖ್ಯೆ-7ರಲ್ಲಿ ಎಂಟು ಸಮಾಧಿಗಳು ಪತ್ತೆಯಾಗಿದ್ದವು. ಅವುಗಳಲ್ಲಿ ಮೂರು ಸಂಪೂರ್ಣ ಮಾನವ ಅಸ್ಥಿಪಂಜರಗಳು ಹಾಗೂ ಇತರೆ ಸಮಾಧಿಗಳಿಂದ ಸಂಗ್ರಹಿಸಲಾದ ಅಸ್ಥಿ ಅವಶೇಷಗಳನ್ನು ಕೊಲ್ಕತ್ತಾದಲ್ಲಿರುವ ಭಾರತೀಯ ಮಾನವಶಾಸ್ತ್ರೀಯ ಸಮೀಕ್ಷೆಯ ಪ್ರಾಚೀನ ಮಾನವ ಅಸ್ಥಿಪಂಜರ ಸಂಗ್ರಹಾಲಯ ಮತ್ತು ಪ್ರಯೋಗಾಲಯಕ್ಕೆ ಕಳುಹಿಸಲಾಗಿದೆ.
ಉಳಿದ ಅಸ್ಥಿ ಮಾದರಿಗಳನ್ನೂ ಶೀಘ್ರದಲ್ಲೇ ಅಧ್ಯಯನಕ್ಕಾಗಿ ವರ್ಗಾಯಿಸುವ ಸಾಧ್ಯತೆ ಇದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಸುಮಾರು 550 ಹೆಕ್ಟೇರ್ ವ್ಯಾಪ್ತಿಯಲ್ಲಿ ಹರಡಿರುವ ರಾಖಿಗಢಿ, ಸಿಂಧು-ಸರಸ್ವತಿ ನಾಗರಿಕತೆಯ ಅತಿ ದೊಡ್ಡ ವಸತಿ ಕೇಂದ್ರವೆಂದು ಪರಿಗಣಿಸಲಾಗಿದೆ. ಈವರೆಗೆ ನಡೆದ ಉತ್ಖನನಗಳಲ್ಲಿ ಯೋಜಿತ ನಗರ ನಿರ್ಮಾಣ, ಒಳಚರಂಡಿ ವ್ಯವಸ್ಥೆ, ಕರಕುಶಲ ಉತ್ಪಾದನಾ ಕೇಂದ್ರಗಳು, ವ್ಯಾಪಾರ ಜಾಲಗಳು ಹಾಗೂ ಸಮಾಧಿ ಪ್ರದೇಶಗಳಂತಹ ಮಹತ್ವದ ಪುರಾವೆಗಳು ಬೆಳಕಿಗೆ ಬಂದಿವೆ.
ತಜ್ಞರ ಪ್ರಕಾರ, ಹೊಸ ಅಧ್ಯಯನಗಳಿಂದ ಆ ಕಾಲದ ಜನರ ಜೀವನಶೈಲಿ, ಆರೋಗ್ಯ, ಆಹಾರ ಪದ್ಧತಿ ಹಾಗೂ ಸಾಮಾಜಿಕ ವ್ಯವಸ್ಥೆಗಳ ಕುರಿತು ಇನ್ನಷ್ಟು ಮಹತ್ವದ ಮಾಹಿತಿಗಳು ಲಭ್ಯವಾಗುವ ಸಾಧ್ಯತೆ ಇದೆ.
