ಭಾರತೀಯ ಕಾರುಗಳಿಗೆ ದಕ್ಷಿಣ ಆಫ್ರಿಕಾದಲ್ಲಿ ಭಾರೀ ಬೇಡಿಕೆ – ಮಾರುಕಟ್ಟೆ ಹಂಚಿಕೆಯಲ್ಲಿ ದಾಖಲೆ

ದಕ್ಷಿಣ ಆಫ್ರಿಕಾದ ವಾಹನ ಮಾರುಕಟ್ಟೆಯಲ್ಲಿ ಭಾರತೀಯ ನಿರ್ಮಿತ ವಾಹನಗಳು ಹಾಗೂ ಭಾಗಗಳು ಬಲವಾಗಿ ಮಾಡಿಕೊಳ್ಳುತ್ತಿವೆ. ಇತ್ತೀಚಿನ ವರದಿಯೊಂದರ ಪ್ರಕಾರ, ಈ ವರ್ಷ ದಕ್ಷಿಣ ಆಫ್ರಿಕಾದಲ್ಲಿ ಮಾರಾಟವಾಗಿರುವ ಒಟ್ಟು ಕಾರುಗಳಲ್ಲಿನ ಅರ್ಧಕ್ಕೂ ಹೆಚ್ಚು ವಾಹನಗಳಿಗೆ ಭಾರತ ಸಂಪರ್ಕವಿದೆ. ಕೆಲವು ವಾಹನಗಳು ನೇರವಾಗಿ ಭಾರತದಲ್ಲೇ ನಿರ್ಮಾಣವಾಗಿದ್ದರೆ, ಇನ್ನಾವುವು ಭಾರತೀಯ ತಯಾರಿತ ಪ್ರಮುಖ ಘಟಕಗಳನ್ನು ಬಳಸಿಕೊಂಡು ತಯಾರಿಸಲ್ಪಟ್ಟಿವೆ.

ಕಳೆದ ವರ್ಷದ ಮಾರಾಟ ಅಂಕಿಅಂಶಗಳು ನೋಡಿದರೆ, Mahindra ದಕ್ಷಿಣ ಆಫ್ರಿಕಾದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದು, ಅದರ ಪಿಕಪ್ (Pik Up) ಸರಣಿಗೆ ಗ್ರಾಹಕರಿಂದ ಹೆಚ್ಚಿನ ಬೇಡಿಕೆ ಕಂಡುಬಂದಿದೆ. ಇದೇ ವೇಳೆ Tata Motors ಕೂಡ ತನ್ನ ವಾಹನಗಳ ಮೂಲಕ ಅಲ್ಲಿನ ಮಾರುಕಟ್ಟೆಯಲ್ಲಿ ಸ್ಥಿರ ಸ್ಥಾನವನ್ನು ಗಳಿಸಿದೆ.

ಇನ್ನೊಂದು ಗಮನಾರ್ಹ ಅಂಶವೆಂದರೆ, 2024ರಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ ಮಾರಾಟವಾದ ಜಪಾನ್ ಬ್ರ್ಯಾಂಡ್‌ಗಳ ಲೈಟ್ ವಾಹನಗಳಲ್ಲಿ ಶೇಕಡಾ 84 ರಷ್ಟು ವಾಹನಗಳು ಭಾರತದಿಂದ ಆಮದುಗೊಂಡವು. ಜಪಾನ್‌ನಲ್ಲೇ ನಿರ್ಮಿತವಾದ ವಾಹನಗಳ ಪ್ರಮಾಣ ಕೇವಲ ಶೇಕಡಾ 10ರಷ್ಟೇ ಇದ್ದು, ಚೀನಾದಿಂದ ಆಗಮಿಸಿದ ವಾಹನಗಳ ಪಾಲು ಶೇಕಡಾ 11ರಷ್ಟಕ್ಕೆ ಸೀಮಿತವಾಗಿದೆ. ಒಟ್ಟಾರೆ 2024ರಲ್ಲಿ ಮಾರಾಟವಾದ ಎಲ್ಲಾ ವಾಹನಗಳಲ್ಲೂ ಶೇಕಡಾ 36 ರಷ್ಟು ವಾಹನಗಳು ನೇರವಾಗಿ ಅಥವಾ ಪರೋಕ್ಷವಾಗಿ ಭಾರತದಿಂದ ಬಂದವು—ಇವುಗಳಲ್ಲಿ ಜಪಾನ್ ಹಾಗೂ ಕೊರಿಯಾ ಮೂಲದ ಸ್ಥಾಪಿತ ಬ್ರ್ಯಾಂಡ್‌ಗಳೂ ಸೇರಿವೆ.

ಪಿಕಪ್ ಮತ್ತು ಲೈಟ್ ಕಮರ್ಷಿಯಲ್ ವಾಹನಗಳನ್ನು ಹೊರತುಪಡಿಸಿದರೆ, 2025ರ ಮೊದಲಾರ್ಧದಲ್ಲಿ ದಕ್ಷಿಣ ಆಫ್ರಿಕಾ ಮಾರುಕಟ್ಟೆಯಲ್ಲಿ ಭಾರತದ ಪಾಲು ಇನ್ನಷ್ಟು ಹೆಚ್ಚಾಗಿದೆ. 2025ರ ಮೊದಲ ಐದು ತಿಂಗಳ ಅಂಕಿಅಂಶಗಳ ಪ್ರಕಾರ, ಪ್ರಯಾಣಿಕ ವಾಹನಗಳ ಮಾರಾಟದಲ್ಲಿ ಶೇಕಡಾ 49 ರಷ್ಟು ವಾಹನಗಳು ಭಾರತದಿಂದ ಆಮದುಗೊಂಡಿವೆ.

ಈ ವಾಹನಗಳ ಬಹುಪಾಲು Maruti Suzuki ಸಂಸ್ಥೆಯ ಭಾರತೀಯ ಉತ್ಪಾದನಾ ಘಟಕಗಳಿಂದ ರಫ್ತು ಆಗಿವೆ. ಅಲ್ಲದೆ ಈ ಸಂಸ್ಥೆ ಜಪಾನ್ ಮೂಲದ Toyota ಕಂಪನಿಗೆ ಸ್ಟಾರ್ಲೆಟ್, ಸ್ಟಾರ್ಲೆಟ್ ಕ್ರಾಸ್, ವಿಟ್ಜ್ ಮತ್ತು ಅರ್ಬನ್ ಕ್ರೂಸರ್ ಮಾದರಿಗಳನ್ನೂ ಭಾರತದಿಂದ ಪೂರೈಕೆ ಮಾಡುತ್ತಿದೆ. ಈ ಬೆಳವಣಿಗೆಗಳು ಜಾಗತಿಕ ವಾಹನ ಉದ್ಯಮದಲ್ಲಿ ಭಾರತದ ಪ್ರಾಬಲ್ಯ ಹೆಚ್ಚುತ್ತಿರುವುದನ್ನು ಸ್ಪಷ್ಟವಾಗಿ ಸೂಚಿಸುತ್ತಿವೆ.