ನವದೆಹಲಿ, ನ.11:
ದೆಹಲಿ ಸ್ಫೋಟದ ಹಿನ್ನೆಲೆ, ರಿಯಾಸಿ ಜಿಲ್ಲಾ ಆಡಳಿತವು ಕತ್ರಾ ಹಾಗೂ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಭದ್ರತಾ ಕ್ರಮಗಳನ್ನು ಕಠಿಣಗೊಳಿಸಿದೆ. ವೈಷ್ಣೋ ದೇವಿ ದೇವಾಲಯದ ಮೂಲ ಶಿಬಿರವಾಗಿರುವ ಕತ್ರಾದಲ್ಲಿ ಯಾತ್ರಾರ್ಥಿಗಳು ಹಾಗೂ ಸ್ಥಳೀಯರ ಸುರಕ್ಷತೆಗೆ ಹೆಚ್ಚುವರಿ ಎಚ್ಚರ ಕ್ರಮ ಕೈಗೊಂಡಿದೆ.
ಆಕಾಶವಾಣಿ ಜಮ್ಮು ವರದಿಯ ಪ್ರಕಾರ, ಪೊಲೀಸ್ ಹಾಗೂ ಅರೆಸೈನಿಕ ಪಡೆಗಳು ಪ್ರಮುಖ ತಪಾಸಣೆ ಕೇಂದ್ರಗಳಲ್ಲಿ ನಿಗಾವಹಿಸಿದ್ದು, ಎಲ್ಲ ಪ್ರವೇಶ ಹಾಗೂ ನಿರ್ಗಮನ ಬಿಂದುಗಳಲ್ಲಿ ವಿಶೇಷ ನಾಕಾಗಳು (ಪರಿಶೀಲನಾ ಬಿಂದುಗಳು) ಸ್ಥಾಪಿಸಲಾಗಿದೆ. ವಾಹನ ತಪಾಸಣೆ ಹಾಗೂ ಗುರುತಿನ ದೃಢೀಕರಣ ಕಾರ್ಯ ತೀವ್ರಗೊಳಿಸಲಾಗಿದೆ.
ಭವನ ಟ್ರ್ಯಾಕ್, ರೈಲು ನಿಲ್ದಾಣ ಹಾಗೂ ಬಸ್ ನಿಲ್ದಾಣಗಳಂತಹ ಜನಸಂದಣಿ ಪ್ರದೇಶಗಳಲ್ಲಿ ಹೆಚ್ಚುವರಿ ಭದ್ರತಾ ಸಿಬ್ಬಂದಿ ನಿಯೋಜನೆ ಮಾಡಲಾಗಿದೆ. ಸಿಸಿಟಿವಿ ನಿಗಾ ಹಾಗೂ ರಾತ್ರಿ ಪಹರೆಗಳನ್ನೂ ಬಲಪಡಿಸಲಾಗಿದೆ.
ಆಡಳಿತವು ಯಾತ್ರಾರ್ಥಿಗಳು ಹಾಗೂ ಸ್ಥಳೀಯರನ್ನು ಸಹಕಾರ ನೀಡುವಂತೆ, ಮಾನ್ಯ ಗುರುತಿನ ಚೀಟಿಗಳನ್ನು ಕೊಂಡೊಯ್ಯುವಂತೆ ಹಾಗೂ ಯಾವುದೇ ಅನುಮಾನಾಸ್ಪದ ಚಟುವಟಿಕೆ ಕಂಡುಬಂದರೆ ತಕ್ಷಣ ವರದಿ ಮಾಡುವಂತೆ ವಿನಂತಿಸಿದೆ. ಶಾಂತಿ ಹಾಗೂ ನಿರಂತರ ಯಾತ್ರೆಗಾಗಿ ಈ ಕ್ರಮಗಳನ್ನು ಮುನ್ನೆಚ್ಚರಿಕೆಯ ಕ್ರಮಗಳಾಗಿ ಕೈಗೊಂಡಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.
