ಅಂತರರಾಷ್ಟ್ರೀಯ ಸಂಸದೀಯ ದಿನ: ಪ್ರಜಾಪ್ರಭುತ್ವದ ಆತ್ಮವೇ ಸಂಸತ್ತು – ಓಂ ಬಿರ್ಲಾ
ಅಂತರರಾಷ್ಟ್ರೀಯ ಸಂಸದೀಯ ದಿನದ ಅಂಗವಾಗಿ ಲೋಕಸಭಾಧ್ಯಕ್ಷ ಓಂ ಬಿರ್ಲಾ ಅವರು ದೇಶದ ಎಲ್ಲಾ ಚುನಾಯಿತ ಜನಪ್ರತಿನಿಧಿಗಳು ಹಾಗೂ ವಿಶ್ವದ ಪ್ರಜಾಪ್ರಭುತ್ವ ಸಂಸ್ಥೆಗಳಿಗೆ ಶುಭಾಶಯಗಳನ್ನು ಕೋರಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ಸಂದೇಶ ಹಂಚಿಕೊಂಡಿರುವ ಅವರು, ಸಂಸತ್ತು ಜನರ ಆಶಯಗಳು, ಹಕ್ಕುಗಳು ಮತ್ತು ವಿಶ್ವಾಸದ ಪರಮ ಅಭಿವ್ಯಕ್ತಿ ಎಂದು ಬಣ್ಣಿಸಿದ್ದಾರೆ. ರಾಷ್ಟ್ರದ ಭವಿಷ್ಯ ರೂಪಿಸುವ ಚಿಂತನೆಗಳು, ನೀತಿಗಳು ಮತ್ತು ಮಹತ್ವದ ನಿರ್ಧಾರಗಳು ಸಂಸತ್ತಿನಲ್ಲಿಯೇ ರೂಪುಗೊಳ್ಳುತ್ತವೆ ಎಂದು ಅವರು ಹೇಳಿದ್ದಾರೆ.
ಸ್ವತಂತ್ರ, ಬಲಿಷ್ಠ ಹಾಗೂ ಉತ್ತರದಾಯಿ ಸಂಸತ್ತೇ ಪ್ರಜಾಪ್ರಭುತ್ವದ ನಿಜವಾದ ಶಕ್ತಿ ಮತ್ತು ನಾಗರಿಕರ ಹಕ್ಕುಗಳ ಅತ್ಯುತ್ತಮ ರಕ್ಷಕ ಎಂದು ಓಂ ಬಿರ್ಲಾ ಅಭಿಪ್ರಾಯಪಟ್ಟಿದ್ದಾರೆ.
ಭಾರತದ ಸಂಸತ್ತು ವಿಶ್ವದ ಅತಿದೊಡ್ಡ ಪ್ರಜಾಪ್ರಭುತ್ವವನ್ನು ಪ್ರತಿನಿಧಿಸುತ್ತಿದ್ದು, ಸಂವಿಧಾನದ ಮೌಲ್ಯಗಳು, ಪ್ರಜಾಪ್ರಭುತ್ವದ ಪರಂಪರೆ ಹಾಗೂ ಜನಪ್ರತಿನಿಧಿತ್ವದ ಶ್ರೇಷ್ಠ ಪರಂಪರೆಯನ್ನು ಸದಾ ಎತ್ತಿಹಿಡಿದಿದೆ ಎಂದು ಅವರು ಹೇಳಿದ್ದಾರೆ.
ವೈವಿಧ್ಯತೆಯಿಂದ ಕೂಡಿದ ಭಾರತದಲ್ಲಿ ಸಂಸತ್ತು ರಾಷ್ಟ್ರೀಯ ಏಕತೆ, ಸಾಮಾಜಿಕ ಸಾಮರಸ್ಯ ಮತ್ತು ಸಂವಿಧಾನಿಕ ಮೌಲ್ಯಗಳ ವೇದಿಕೆಯಾಗಿದ್ದು, ಪ್ರತಿಯೊಂದು ರಾಜ್ಯ, ಸಮುದಾಯ ಹಾಗೂ ನಾಗರಿಕರ ಧ್ವನಿಗೂ ಇಲ್ಲಿ ಸ್ಥಾನವಿದೆ ಎಂದು ಅವರು ಉಲ್ಲೇಖಿಸಿದ್ದಾರೆ.
ಇಂದಿನ ಸಂದರ್ಭದಲ್ಲಿ ಸಂಸತ್ತಿನ ಪಾತ್ರವು ಕೇವಲ ಕಾನೂನು ರಚನೆಗೆ ಸೀಮಿತವಾಗಿಲ್ಲ. ಸರ್ಕಾರದ ಉತ್ತರದಾಯಿತ್ವವನ್ನು ಖಚಿತಪಡಿಸುವುದು, ಜನಹಿತದ ವಿಚಾರಗಳ ಕುರಿತು ಅರ್ಥಪೂರ್ಣ ಚರ್ಚೆ ನಡೆಸುವುದು, ಪ್ರಜಾಪ್ರಭುತ್ವ ಸಂಸ್ಥೆಗಳ ಘನತೆಯನ್ನು ಕಾಪಾಡುವುದು ಹಾಗೂ ನಾಗರಿಕರ ಹಕ್ಕು-ಕರ್ತವ್ಯಗಳ ನಡುವೆ ಸಮತೋಲನ ಸಾಧಿಸುವ ಮಹತ್ತರ ಜವಾಬ್ದಾರಿಯನ್ನೂ ಸಂಸತ್ತು ಹೊತ್ತಿದೆ ಎಂದು ಬಿರ್ಲಾ ಹೇಳಿದ್ದಾರೆ.
ಅಂತರರಾಷ್ಟ್ರೀಯ ಸಂಸದೀಯ ದಿನವು ಸಂವಾದ, ಸಹಮತ, ಉತ್ತರದಾಯಿತ್ವ, ಪಾರದರ್ಶಕತೆ ಹಾಗೂ ಸಂವಿಧಾನಿಕ ಮೌಲ್ಯಗಳನ್ನು ಇನ್ನಷ್ಟು ಬಲಪಡಿಸುವ ಸಂಕಲ್ಪ ಕೈಗೊಳ್ಳುವ ದಿನ ಎಂದು ಅವರು ಕರೆ ನೀಡಿದ್ದಾರೆ.
