‘ಹುಲ್ ದಿವಸ್’ ಆಚರಣೆಯಲ್ಲಿ ಜಾರ್ಖಂಡ್; ಸಂತಾಲ್ ಕ್ರಾಂತಿಯ ಅಮರ ಹೋರಾಟಗಾರರಿಗೆ ನಮನ
ಆದಿವಾಸಿ ಸ್ವಾಭಿಮಾನ, ಸ್ವಾತಂತ್ರ್ಯ ಹೋರಾಟ ಮತ್ತು ಶೌರ್ಯದ ಸಂಕೇತವಾಗಿ ಪರಿಗಣಿಸಲ್ಪಡುವ ‘ಹುಲ್ ದಿವಸ್’ ಅನ್ನು ಜಾರ್ಖಂಡ್ನಲ್ಲಿ ಇಂದು ಭಕ್ತಿಭಾವದಿಂದ ಆಚರಿಸಲಾಗುತ್ತಿದೆ. ಈ ದಿನವನ್ನು ಸಂತಾಲ್ ಕ್ರಾಂತಿಯ ಅಮರ ಹೋರಾಟಗಾರರಾದ ಸಿದೋ, ಕಾನ್ಹೋ, ಚಾಂದ್, ಭೈರವ್, ಫುಲೋ ಮತ್ತು ಝಾನೋ ಅವರ ತ್ಯಾಗ ಮತ್ತು ಸಾಹಸವನ್ನು ಸ್ಮರಿಸುವ ದಿನವಾಗಿ ಆಚರಿಸಲಾಗುತ್ತದೆ.
ಜಾರ್ಖಂಡ್ನ ಸಾಹಿಬ್ಗಂಜ್ ಜಿಲ್ಲೆಯ ಭೋಗ್ನಾಡಿಹ್ ಗ್ರಾಮದಲ್ಲಿ ಪ್ರತಿವರ್ಷದಂತೆ ಸಾವಿರಾರು ಜನರು ಸೇರಿ ಸಂತಾಲ್ ಕ್ರಾಂತಿಯ ವೀರ ಹುತಾತ್ಮರಿಗೆ ಪುಷ್ಪನಮನ ಸಲ್ಲಿಸುತ್ತಿದ್ದಾರೆ.
1855ರ ಜೂನ್ 30ರಂದು, ಸಿದೋ ಮತ್ತು ಕಾನ್ಹೋ ಬ್ರಿಟಿಷರ ಆಡಳಿತ ಹಾಗೂ ಶೋಷಕ ಸಾಹುಕಾರಿ ವ್ಯವಸ್ಥೆಯ ವಿರುದ್ಧ ಭೋಗ್ನಾಡಿಹ್ನಿಂದ ‘ಸಂತಾಲ್ ಹುಲ್’ ಎಂಬ ಐತಿಹಾಸಿಕ ಹೋರಾಟಕ್ಕೆ ಚಾಲನೆ ನೀಡಿದ್ದರು. ಆದಿವಾಸಿ ಇತಿಹಾಸ ಅಧ್ಯಯನಕಾರರ ಪ್ರಕಾರ, ಇದು ಭಾರತದ ಮೊದಲ ಸಂಘಟಿತ ಸ್ವಾತಂತ್ರ್ಯ ಹೋರಾಟಗಳಲ್ಲಿ ಒಂದಾಗಿ ಗುರುತಿಸಿಕೊಂಡಿದೆ.
ಸುಮಾರು 20 ಸಾವಿರಕ್ಕೂ ಹೆಚ್ಚು ಜನರು ಭಾಗವಹಿಸಿದ್ದ ಮಹಾಸಭೆಯ ನಂತರ ಬ್ರಿಟಿಷರ ವಿರುದ್ಧ ಸಶಸ್ತ್ರ ಹೋರಾಟ ಆರಂಭವಾಗಿತ್ತು. ಸಂತಾಲ್ ಸಮುದಾಯದೊಂದಿಗೆ ಹಲವು ಸ್ಥಳೀಯ ಜನಾಂಗಗಳೂ ಈ ಹೋರಾಟದಲ್ಲಿ ಕೈಜೋಡಿಸಿದ್ದವು. ಬಿಲ್ಲು-ಬಾಣ ಹಾಗೂ ಸಾಂಪ್ರದಾಯಿಕ ಆಯುಧಗಳನ್ನು ಹಿಡಿದ ಕ್ರಾಂತಿಕಾರರು ಈಸ್ಟ್ ಇಂಡಿಯಾ ಕಂಪನಿಯ ಸೇನೆಗೆ ತೀವ್ರ ಪ್ರತಿರೋಧ ಒಡ್ಡಿದ್ದು, ಹೋರಾಟ ಸುಮಾರು ಒಂದು ವರ್ಷದವರೆಗೆ ಮುಂದುವರಿದಿತ್ತು.
ಈ ಹೋರಾಟದ ವೇಳೆ ಚಾಂದ್ ಮತ್ತು ಭೈರವ್ ಹುತಾತ್ಮರಾದರೆ, ಬಳಿಕ ಸಿದೋ ಮತ್ತು ಕಾನ್ಹೋ ಅವರನ್ನು ಬ್ರಿಟಿಷರು ಬಂಧಿಸಿ ಗಲ್ಲಿಗೇರಿಸಿದ್ದರು. ಫುಲೋ ಮತ್ತು ಝಾನೋ ಅವರ ಶೌರ್ಯವೂ ಸಂತಾಲ್ ಕ್ರಾಂತಿಯ ಇತಿಹಾಸದಲ್ಲಿ ಅಚ್ಚಳಿಯದ ಸ್ಥಾನ ಪಡೆದಿದೆ.
ಇಂದು ಜಾರ್ಖಂಡ್ನಲ್ಲಿ ‘ಹುಲ್ ದಿವಸ್’ ಅನ್ನು ಆದಿವಾಸಿಗಳ ಸ್ವಾಭಿಮಾನ, ಪ್ರತಿರೋಧ ಮತ್ತು ಸಾಂಸ್ಕೃತಿಕ ಅಸ್ಮಿತೆಯ ಸಂಕೇತವಾಗಿ ಆಚರಿಸಲಾಗುತ್ತಿದ್ದು, ರಾಜ್ಯದ ವಿವಿಧ ಭಾಗಗಳಲ್ಲಿ ವಿಶೇಷ ಕಾರ್ಯಕ್ರಮಗಳು, ಶ್ರದ್ಧಾಂಜಲಿ ಸಭೆಗಳು ಹಾಗೂ ಸಾಂಸ್ಕೃತಿಕ ಉತ್ಸವಗಳು ನಡೆಯುತ್ತಿವೆ.
