ಬಾಲಿವುಡ್ ನಟ Ranveer Singh ಅಭಿನಯದ, ನಿರ್ದೇಶಕ Aditya Dhar ಅವರ ಮೆಗಾ ಆಕ್ಷನ್ ಚಿತ್ರ ‘ಧುರಂಧರ್’ ಭರ್ಜರಿ ಯಶಸ್ಸಿನ ಬಳಿಕ ಅದರ ಎರಡನೇ ಭಾಗ ‘ಧುರಂಧರ್ 2’ ಬಗ್ಗೆ ಸಿನಿರಂಗದಲ್ಲಿ ಭಾರೀ ನಿರೀಕ್ಷೆ ನಿರ್ಮಾಣವಾಗಿದೆ. ಇದೀಗ ಚಿತ್ರತಂಡವು ಮಹತ್ವದ ತೀರ್ಮಾನ ಕೈಗೊಂಡಿದ್ದು, ಈ ಚಿತ್ರವನ್ನು ತಮಿಳು, ಕನ್ನಡ, ತೆಲುಗು ಹಾಗೂ ಮಲಯಾಳಂ ಭಾಷೆಗಳಲ್ಲಿಯೂ ಬಿಡುಗಡೆ ಮಾಡಲು ಸಜ್ಜಾಗಿದೆ.
ಚಿತ್ರವು 2026ರ ಮಾರ್ಚ್ 19ರಂದು ದೇಶಾದ್ಯಂತ ಚಿತ್ರಮಂದಿರಗಳಲ್ಲಿ ತೆರೆಗೆ ಬರಲಿದೆ. ಉತ್ತರ ಭಾರತದ ಜೊತೆಗೆ ದಕ್ಷಿಣ ಭಾರತದ ಪ್ರೇಕ್ಷಕರನ್ನೂ ತಲುಪುವ ಉದ್ದೇಶದಿಂದ ಬಹುಭಾಷಾ ಬಿಡುಗಡೆ ತಂತ್ರವನ್ನು ಅನುಸರಿಸಲಾಗುತ್ತಿದೆ. ಇತ್ತೀಚೆಗೆ Kantara: Chapter 1 ಇದೇ ಮಾದರಿಯಲ್ಲಿ ದೇಶವ್ಯಾಪಿ ಯಶಸ್ಸು ಗಳಿಸಿರುವುದು ಇದಕ್ಕೆ ಪ್ರೇರಣೆಯಾಗಿದೆ.
‘ಧುರಂಧರ್’ ಮೊದಲ ಭಾಗದಲ್ಲಿ ರಣವೀರ್ ಸಿಂಗ್ ಅವರು ಗುಪ್ತಚರ ಅಧಿಕಾರಿಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು, ಪಾಕಿಸ್ತಾನದಲ್ಲಿ ಕಾರ್ಯನಿರ್ವಹಿಸುವ ಗ್ಯಾಂಗ್ಸ್ಟರ್ಗಳು, ಶಸ್ತ್ರಾಸ್ತ್ರ ಕಳ್ಳಸಾಗಣೆ ಜಾಲ ಹಾಗೂ ಭಯೋತ್ಪಾದಕರ ಸಂಘಟನೆಗಳನ್ನು ಒಳನುಸುಳುವ ಸಾಹಸಮಯ ಕಥಾಹಂದರ ಚಿತ್ರಕ್ಕೆ ಜೀವ ತುಂಬಿತ್ತು. ಈ ಚಿತ್ರವು ವಿಶ್ವದಾದ್ಯಂತ ಸುಮಾರು ₹900 ಕೋಟಿ ರೂಪಾಯಿಗೂ ಅಧಿಕ ವಹಿವಾಟು ನಡೆಸಿ, 2025ರ ಅತ್ಯಧಿಕ ಆದಾಯ ಗಳಿಸಿದ ಭಾರತೀಯ ಚಿತ್ರ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ ಎಂಬ ವರದಿಯಿದೆ.
ಚಿತ್ರದಲ್ಲಿ ರಣವೀರ್ ಸಿಂಗ್ ಅವರೊಂದಿಗೆ Akshaye Khanna, Sanjay Dutt, R Madhavan, Arjun Rampal, Sara Arjun ಸೇರಿದಂತೆ ಹಲವರು ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.
ಚಿತ್ರದ ಅಂತಿಮ ದೃಶ್ಯಗಳಲ್ಲಿ ‘ಧುರಂಧರ್ 2’ಯ ಸುಳಿವು ನೀಡಲಾಗಿದ್ದು, ಲಿಯಾರಿ ಪ್ರದೇಶದ ರಾಜಕೀಯ ಹಿನ್ನಲೆಯಲ್ಲಿ ರಣವೀರ್ ಪಾತ್ರದ ಹೊಸ ರೂಪವನ್ನು ತೋರಿಸಲಾಗಿದೆ. ಇದೇ ವೇಳೆ ಮುಂದುವರಿದ ಭಾಗದ ಬಿಡುಗಡೆ ದಿನಾಂಕವನ್ನೂ ಚಿತ್ರತಂಡ ಅಧಿಕೃತವಾಗಿ ಘೋಷಿಸಿದ್ದು, ಪ್ರೇಕ್ಷಕರ ಕುತೂಹಲವನ್ನು ಇನ್ನಷ್ಟು ಹೆಚ್ಚಿಸಿದೆ.
