ವಾಷಿಂಗ್ಟನ್: ರಷ್ಯಾದ ಕ್ಷಿಪಣಿ ದಾಳಿಗಳನ್ನು ಎದುರಿಸಲು ಉಕ್ರೇನ್‌ನ ವಾಯು ರಕ್ಷಣಾ ವ್ಯವಸ್ಥೆಯನ್ನು ಬಲಪಡಿಸುವ ನಿಟ್ಟಿನಲ್ಲಿ ಅಮೆರಿಕ ಮಹತ್ವದ ನಿರ್ಧಾರ ಕೈಗೊಂಡಿದೆ. ಸುಮಾರು 2.1 ಬಿಲಿಯನ್ ಅಮೆರಿಕನ್ ಡಾಲರ್ ಮೌಲ್ಯದ 500 ಪೇಟ್ರಿಯಾಟ್ PAC-3 MSE ಕ್ಷಿಪಣಿ ಪ್ರತಿಬಂಧಕಗಳ ಮಾರಾಟಕ್ಕೆ ಅಮೆರಿಕ ಅನುಮೋದನೆ ನೀಡಿದೆ.
ಈ ಖರೀದಿಗೆ ಬೇಕಾದ ಸಂಪೂರ್ಣ ಹಣವನ್ನು ಯುರೋಪಿನ ಪಾಲುದಾರ ರಾಷ್ಟ್ರಗಳು ಮತ್ತು ಕೆನಡಾ ಒದಗಿಸಲಿವೆ. ಈ ಯೋಜನೆಗೆ ಅಮೆರಿಕ ಯಾವುದೇ ನೇರ ಹಣಕಾಸಿನ ಕೊಡುಗೆ ನೀಡುವುದಿಲ್ಲ ಎಂದು ತಿಳಿಸಲಾಗಿದೆ.
ಅಮೆರಿಕದ ವಿದೇಶಾಂಗ ಇಲಾಖೆ ನಿನ್ನೆ ಅಧಿಕೃತವಾಗಿ ಈ ಅನುಮೋದನೆಯನ್ನು ಪ್ರಕಟಿಸಿದೆ. ಉಕ್ರೇನ್‌ನ ವಾಯು ರಕ್ಷಣಾ ಸಾಮರ್ಥ್ಯವನ್ನು ಹೆಚ್ಚಿಸುವುದು ಹಾಗೂ ಪ್ರಸ್ತುತ ಮತ್ತು ಭವಿಷ್ಯದಲ್ಲಿ ಎದುರಾಗಬಹುದಾದ ಕ್ಷಿಪಣಿ ಬೆದರಿಕೆಗಳಿಂದ ದೇಶವನ್ನು ರಕ್ಷಿಸುವುದು ಈ ಒಪ್ಪಂದದ ಪ್ರಮುಖ ಉದ್ದೇಶವಾಗಿದೆ ಎಂದು ಇಲಾಖೆ ತಿಳಿಸಿದೆ.
ಕೆನಡಾ, ಜರ್ಮನಿ ಮತ್ತು ನಾರ್ವೆ ದೇಶಗಳು ಅಮೆರಿಕದ JUMPSTART ಕಾರ್ಯಕ್ರಮದ ಮೂಲಕ ಈ ಖರೀದಿಗೆ ಹಣಕಾಸಿನ ನೆರವು ನೀಡುವ ನಿರೀಕ್ಷೆಯಿದೆ. ಇದರ ಜತೆಗೆ ಯುರೋಪಿಯನ್ ಒಕ್ಕೂಟದ ಸಾಲ ಸೌಲಭ್ಯದ ಮೂಲಕವೂ ಆರ್ಥಿಕ ಬೆಂಬಲ ದೊರೆಯಲಿದೆ. ಅಮೆರಿಕದ ರಕ್ಷಣಾ ಉತ್ಪಾದನಾ ಸಂಸ್ಥೆ ಲಾಕ್‌ಹೀಡ್ ಮಾರ್ಟಿನ್ ಈ ಪ್ರಸ್ತಾವಿತ ಒಪ್ಪಂದದ ಪ್ರಮುಖ ಗುತ್ತಿಗೆದಾರ ಸಂಸ್ಥೆಯಾಗಿ ಕಾರ್ಯನಿರ್ವಹಿಸಲಿದೆ.
ಅಮೆರಿಕದ ಅನುಮೋದನೆಯನ್ನು ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್‌ಸ್ಕಿ ಸ್ವಾಗತಿಸಿದ್ದಾರೆ. ರಷ್ಯಾದಿಂದ ಉಡಾವಣೆಯಾಗುವ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ತಡೆಯಲು ಪೇಟ್ರಿಯಾಟ್ ಕ್ಷಿಪಣಿಗಳು ಮಹತ್ವದ ನೆರವು ನೀಡಲಿವೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ಪ್ರತಿಕ್ರಿಯಿಸಿರುವ ಝೆಲೆನ್‌ಸ್ಕಿ, ಅಮೆರಿಕದ ನಿರ್ಧಾರವನ್ನು ‘ಬಲವಾದ ಹೆಜ್ಜೆ’ ಎಂದು ಬಣ್ಣಿಸಿದ್ದಾರೆ. 500 PAC-3 ಕ್ಷಿಪಣಿ ಪ್ರತಿಬಂಧಕಗಳ ಸೇರ್ಪಡೆಯಿಂದ ಉಕ್ರೇನ್‌ನ ವಾಯು ರಕ್ಷಣಾ ವ್ಯವಸ್ಥೆಗೆ ಹೆಚ್ಚಿನ ಬಲ ದೊರೆಯಲಿದೆ. ಮುಂಬರುವ ಚಳಿಗಾಲದಲ್ಲಿ ದೇಶದ ರಕ್ಷಣೆಗೆ ಇದು ಪರಿಣಾಮಕಾರಿ ನೆರವಾಗಬಹುದು ಎಂದು ಹೇಳಿದ್ದಾರೆ.
ಆದರೆ, ಉಕ್ರೇನ್‌ನ ತುರ್ತು ಭದ್ರತಾ ಅಗತ್ಯಗಳನ್ನು ಗಮನದಲ್ಲಿಟ್ಟುಕೊಂಡು ಕ್ಷಿಪಣಿಗಳ ಪೂರೈಕೆಯನ್ನು ಶೀಘ್ರಗೊಳಿಸುವಂತೆ ಅವರು ವಾಷಿಂಗ್ಟನ್‌ಗೆ ಮನವಿ ಮಾಡಿದ್ದಾರೆ.
ಇದಕ್ಕೂ ಮುನ್ನ ಈ ವಾರ ಮಾತನಾಡಿದ್ದ ಝೆಲೆನ್‌ಸ್ಕಿ, ಪೇಟ್ರಿಯಾಟ್ ಮತ್ತು NASAMS ವಾಯು ರಕ್ಷಣಾ ವ್ಯವಸ್ಥೆಗಳಿಗೆ ಅಗತ್ಯವಿರುವ ಪ್ರಮುಖ ಕ್ಷಿಪಣಿಗಳ ಪೂರೈಕೆಗೆ ಸಂಬಂಧಿಸಿದಂತೆ ಅಮೆರಿಕದ ಅಧಿಕೃತ ಅನುಮೋದನೆಗಾಗಿ ಕೈವ್ ಸುಮಾರು ಒಂದು ತಿಂಗಳಿಂದ ಕಾಯುತ್ತಿದೆ ಎಂದು ತಿಳಿಸಿದ್ದರು.
