ಚೆನ್ನೈ: ನಟಿ ಹಾಗೂ ರಾಜಕಾರಣಿ ಖುಷ್ಬೂ ಸುಂದರ್, ತಮ್ಮ ಬಹುಕಾಲದ ಸ್ನೇಹಿತೆ ಹಾಗೂ ನಟಿ ತ್ರಿಷಾ ಅವರ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನು ಆಡಿದ್ದಾರೆ. ತ್ರಿಷಾ ತಮಗೆ ಪರಿಚಯವಿರುವ ಅತ್ಯಂತ ಸೌಮ್ಯ ಹಾಗೂ ಒಳ್ಳೆಯ ವ್ಯಕ್ತಿಗಳಲ್ಲಿ ಒಬ್ಬರು ಎಂದು ಖುಷ್ಬೂ ಹೇಳಿದ್ದಾರೆ.
ಇತ್ತೀಚಿನ ಸಂದರ್ಶನವೊಂದರಲ್ಲಿ ಖುಷ್ಬೂ ಹಾಗೂ ತ್ರಿಷಾ ಪರಸ್ಪರ ಅಪ್ಪಿಕೊಂಡಿರುವ ಫೋಟೊವನ್ನು ತೋರಿಸಿ ಆ ಕ್ಷಣವನ್ನು ವಿವರಿಸುವಂತೆ ಕೇಳಲಾಯಿತು. ಇದಕ್ಕೆ ಪ್ರತಿಕ್ರಿಯಿಸಿದ ಖುಷ್ಬೂ, ತ್ರಿಷಾ ಅವರೊಂದಿಗೆ ತಮ್ಮ ಸ್ನೇಹ ಚಿತ್ರರಂಗಕ್ಕೆ ತ್ರಿಷಾ ಪ್ರವೇಶಿಸುವುದಕ್ಕೂ ಹಲವು ವರ್ಷಗಳ ಹಿಂದಿನಿಂದಲೂ ಇದೆ ಎಂದು ನೆನಪಿಸಿಕೊಂಡಿದ್ದಾರೆ.
ಆ ಸಮಯದಲ್ಲಿ ತ್ರಿಷಾ ‘ಮಿಸ್ ಚೆನ್ನೈ’ ಸ್ಪರ್ಧೆಯಲ್ಲಿ ಗೆದ್ದು ಗಮನ ಸೆಳೆದಿದ್ದರು. ಅಂದಿನಿಂದಲೇ ಅವರೊಂದಿಗೆ ಉತ್ತಮ ಸ್ನೇಹ ಬೆಳೆದಿದೆ ಎಂದು ಖುಷ್ಬೂ ತಿಳಿಸಿದ್ದಾರೆ.
ಖುಷ್ಬೂ ಕುಟುಂಬದೊಂದಿಗೆ ತ್ರಿಷಾಗೆ ಆತ್ಮೀಯ ನಂಟು
ತ್ರಿಷಾ ತಮ್ಮ ಕುಟುಂಬದೊಂದಿಗೆ, ವಿಶೇಷವಾಗಿ ಮಕ್ಕಳೊಂದಿಗೆ ಅತ್ಯಂತ ಆತ್ಮೀಯ ಸಂಬಂಧ ಹೊಂದಿದ್ದಾರೆ ಎಂದು ಖುಷ್ಬೂ ಹೇಳಿದ್ದಾರೆ.
ಖುಷ್ಬೂ ಅವರ ಹಿರಿಯ ಪುತ್ರಿ ಅವಂತಿಕಾ ಸುಂದರ್ ಅವರ ವಿವಾಹ ನಿಶ್ಚಯವಾಗುವ ಮೊದಲೇ, ತಮ್ಮ ಮಗಳು ತ್ರಿಷಾಗೆ ಕರೆ ಮಾಡಿ ಮದುವೆಯ ದಿನಾಂಕಗಳನ್ನು ಈಗಲೇ ಕಾಯ್ದಿರಿಸಿಕೊಳ್ಳುವಂತೆ ಹೇಳಿದ್ದಳು ಎಂದು ಅವರು ತಿಳಿಸಿದ್ದಾರೆ.
ಅವಂತಿಕಾ ಅವರ ವಿವಾಹ ಸಮಾರಂಭದಲ್ಲಿ ತ್ರಿಷಾ ಕುಟುಂಬದೊಂದಿಗೆ ಆತ್ಮೀಯವಾಗಿ ಬೆರೆತಿದ್ದರು. ಮದುವೆಯ ಸಂಭ್ರಮದಲ್ಲಿ ನಾಲ್ಕು ದಿನಗಳ ಕಾಲ ಕುಟುಂಬದೊಂದಿಗೆ ಇದ್ದರು ಎಂದು ಖುಷ್ಬೂ ನೆನಪಿಸಿಕೊಂಡಿದ್ದಾರೆ.
ತ್ರಿಷಾ ಪರ ವದಂತಿಗಳ ನಡುವೆಯೂ ನಿಂತಿದ್ದ ಖುಷ್ಬೂ
ತ್ರಿಷಾ ಅವರೊಂದಿಗಿನ ಆತ್ಮೀಯತೆಯ ಬಗ್ಗೆ ಖುಷ್ಬೂ ಈ ಹಿಂದೆಯೂ ಹಲವು ಬಾರಿ ಮಾತನಾಡಿದ್ದಾರೆ. ಇತ್ತೀಚೆಗೆ ತಮ್ಮ ಹಿರಿಯ ಪುತ್ರಿಯ ವಿವಾಹದ ಸಂದರ್ಭದಲ್ಲಿ ತ್ರಿಷಾ ಅವರನ್ನು ಅಪ್ಪಿಕೊಂಡಿರುವ ಫೋಟೊವನ್ನು ಹಂಚಿಕೊಂಡಿದ್ದ ಖುಷ್ಬೂ, ಅವರನ್ನು ‘ಅಳಗಿ’ (ಸೌಂದರ್ಯವತಿ) ಎಂದು ಕರೆದಿದ್ದರು.
ತ್ರಿಷಾ ಹಾಗೂ ಹಾಲಿ ಮುಖ್ಯಮಂತ್ರಿ ವಿಜಯ್ ಅವರ ಸಂಬಂಧದ ಕುರಿತು ವದಂತಿಗಳು ಹರಿದಾಡುತ್ತಿದ್ದ ಸಂದರ್ಭದಲ್ಲಿ ಖುಷ್ಬೂ, ತ್ರಿಷಾ ಪರವಾಗಿ ಮಾತನಾಡಿದ್ದರು. ತ್ರಿಷಾ ಅವರನ್ನು ‘ಗೌರವಯುತ ಮಹಿಳೆ’ ಎಂದು ಬಣ್ಣಿಸಿದ್ದ ಅವರು, ಸಾಮಾಜಿಕ ಜಾಲತಾಣಗಳಲ್ಲಿ ನಟ-ನಟಿಯರ ಪ್ರತಿಯೊಂದು ನಡೆಗೂ ನಿರಂತರವಾಗಿ ಟೀಕೆ ಮತ್ತು ಊಹಾಪೋಹಗಳು ಎದುರಾಗುತ್ತಿವೆ ಎಂದು ಹೇಳಿದ್ದರು.
ತ್ರಿಷಾ ತಮ್ಮ ಆತ್ಮೀಯ ಸ್ನೇಹಿತೆಯಾಗಿದ್ದು, ತಾವು ತಿಳಿದಿರುವ ಮಟ್ಟಿಗೆ ಅವರು ಅತ್ಯಂತ ಗೌರವಯುತ ಹಾಗೂ ಮೃದು ಹೃದಯದ ವ್ಯಕ್ತಿ ಎಂದು ಖುಷ್ಬೂ ಹೇಳಿದ್ದಾರೆ.
‘ಕರುಪ್ಪು’ ಚಿತ್ರದಲ್ಲಿ ಕೊನೆಯದಾಗಿ ಕಾಣಿಸಿಕೊಂಡಿದ್ದ ತ್ರಿಷಾ
ವೃತ್ತಿಜೀವನದ ವಿಚಾರಕ್ಕೆ ಬಂದರೆ, ತ್ರಿಷಾ ಅವರು ಇತ್ತೀಚೆಗೆ ಸೂರ್ಯ ಅಭಿನಯದ ‘ಕರುಪ್ಪು’ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದರು. ಆರ್.ಜೆ. ಬಾಲಾಜಿ ನಿರ್ದೇಶನದ ಈ ಚಿತ್ರ ಇತ್ತೀಚೆಗೆ ಉತ್ತಮ ಪ್ರತಿಕ್ರಿಯೆ ಪಡೆದಿತ್ತು.
