ನೈಜ ಪ್ರೇಮಕಥೆಗೆ ಸಿನಿಮಾ ರೂಪ; ‘ಲವ್ 2 ಲಸ್ಸಿ’ ಚಿತ್ರದ ವಿಶೇಷತೆ ಅನಾವರಣ
ಪುತ್ತೂರಿನ ಯುವತಿ ಮತ್ತು ಬೆಂಗಳೂರಿನ ಯುವಕನ ನಡುವಿನ ನೈಜ ಪ್ರೇಮಕಥೆಯನ್ನು ಆಧರಿಸಿದ ‘ಲವ್ 2 ಲಸ್ಸಿ’ ಚಿತ್ರ ಇದೀಗ ಸಿನಿಪ್ರೇಮಿಗಳ ಗಮನ ಸೆಳೆಯುತ್ತಿದೆ. 2006–07ರಲ್ಲಿ ನಡೆದ ನೈಜ ಘಟನೆಯಿಂದ ಪ್ರೇರಿತವಾಗಿರುವ ಈ ಚಿತ್ರವನ್ನು ಹರಿಪ್ರಾಣ ನಿರ್ದೇಶಿಸಿದ್ದು, ಆರ್ಕೆಬಿ ಫಿಲ್ಮ್ಸ್ ಬ್ಯಾನರ್ ಅಡಿಯಲ್ಲಿ ಭಾರತಿ ಶ್ರೀನಿವಾಸ್ ರಾಜ್ ನಿರ್ಮಿಸಿದ್ದಾರೆ.
ಚಿತ್ರದ ಕುರಿತು ಮಾತನಾಡಿದ ನಿರ್ದೇಶಕ ಹರಿಪ್ರಾಣ, “ಇದು ಪುತ್ತೂರಿನ ಯುವತಿ ಮತ್ತು ಬೆಂಗಳೂರಿನ ಯುವಕನ ನೈಜ ಪ್ರೇಮಕಥೆ. ಕಥೆಗೆ ಸಂಬಂಧಿಸಿದವರ ಅನುಮತಿ ಪಡೆದುಕೊಂಡು ಚಿತ್ರವನ್ನು ರೂಪಿಸಲಾಗಿದೆ. ಕಥೆ ಹೇಳುವ ಆಸಕ್ತಿ ಮತ್ತು ಸಾಹಿತ್ಯದ ಮೇಲಿನ ಒಲವೇ ಈ ಸಿನಿಮಾ ಮೂಡಿಬರಲು ಕಾರಣವಾಗಿದೆ,” ಎಂದು ಹೇಳಿದರು.
ಚಿತ್ರದ ಬಹುಭಾಗದ ಚಿತ್ರೀಕರಣ ಪುತ್ತೂರು ಹಾಗೂ ಸುಳ್ಯ ಸುತ್ತಮುತ್ತ ನಡೆದಿದೆ. ‘ಲುಡೋ’ ಚಿತ್ರದಲ್ಲಿ ಒಟ್ಟಿಗೆ ಅಭಿನಯಿಸಿದ್ದ ಜೀವಿತಾ ಮತ್ತು ಆರ್ಯನ್ ಈ ಚಿತ್ರದಲ್ಲಿ ನಾಯಕ-ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಇವರೊಂದಿಗೆ ಜಗನ್, ತಾರಾ, ವೈಷ್ಣವಿ ಸೇರಿದಂತೆ ಹಲವರು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.
ನಟಿ ಜೀವಿತಾ ಮಾತನಾಡಿ, “ಚಿತ್ರೀಕರಣದ ವೇಳೆಯೇ ಈ ಕಥೆ ಮನಸ್ಸಿಗೆ ತುಂಬಾ ಹತ್ತಿರವಾಯಿತು. ಚಿತ್ರದ ಹಾಡುಗಳು ಕಥೆಯ ಭಾವನೆಯನ್ನು ಇನ್ನಷ್ಟು ಶ್ರೀಮಂತಗೊಳಿಸಿವೆ,” ಎಂದರು.
ನಟ ಆರ್ಯನ್, “ನೈಜ ಘಟನೆಯಾಧಾರಿತ ಚಿತ್ರದಲ್ಲಿ ಅಭಿನಯಿಸುವ ಅವಕಾಶ ಸಿಕ್ಕಿರುವುದು ಸಂತಸದ ಸಂಗತಿ. ಹೊಸ ತಂಡದ ಮೇಲೆ ನಿರ್ಮಾಪಕರು ವಿಶ್ವಾಸ ಇಟ್ಟು ಸಿನಿಮಾ ನಿರ್ಮಿಸಿರುವುದು ಶ್ಲಾಘನೀಯ,” ಎಂದು ಹೇಳಿದರು.
ಚಿತ್ರಕ್ಕೆ ವಿನು ಮನಸು ನಾಲ್ಕು ಹಾಡುಗಳಿಗೆ ಸಂಗೀತ ಸಂಯೋಜಿಸಿದ್ದು, ಎಂ. ಅರ್ಜುನ್ ಧೋನಿ ಸಂಕಲನದ ಜವಾಬ್ದಾರಿ ವಹಿಸಿಕೊಂಡಿದ್ದಾರೆ.
ಚಿತ್ರದ ಅನಾವರಣ ಕಾರ್ಯಕ್ರಮದಲ್ಲಿ ಮಾತನಾಡಿದ ಒರಟ ಶ್ರೀ, “ಮೊದಲ ಸಿನಿಮಾ ನಿರ್ದೇಶಕರಿಗೆ ಎಸ್ಎಸ್ಎಲ್ಸಿ ಪರೀಕ್ಷೆಯಂತಿದ್ದು, ತಂಡಕ್ಕೆ ಯಶಸ್ಸು ಸಿಗಲಿ,” ಎಂದು ಹಾರೈಸಿದರು. ಸಪ್ತಗಿರಿ ಗೌಡ ಚಿತ್ರದ ಶೀರ್ಷಿಕೆಯನ್ನು ಮೆಚ್ಚಿ, “ಎರಡು ಸಿಹಿ ಪದಗಳ ಸುಂದರ ಸಂಯೋಜನೆಯೇ ‘ಲವ್ 2 ಲಸ್ಸಿ’,” ಎಂದು ಅಭಿಪ್ರಾಯಪಟ್ಟರು.
