ಅಸಾನ್ (ದಕ್ಷಿಣ ಕೊರಿಯಾ): ಕೊರಿಯಾ ಮಾಸ್ಟರ್ಸ್ ಸೂಪರ್ 300 ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ಭಾರತದ ಇಶಾರಾಣಿ ಬರುವಾ ಕ್ವಾರ್ಟರ್ಫೈನಲ್ಗೆ ಪ್ರವೇಶಿಸಿದ್ದಾರೆ. ಅಸಾನ್ನಲ್ಲಿ ನಡೆದ ಪಂದ್ಯದಲ್ಲಿ ಅವರು ದಕ್ಷಿಣ ಕೊರಿಯಾದ ಲೀ ಸೋ ಹೀ ಅವರನ್ನು 18-21, 21-15, 21-7 ಅಂತರದಿಂದ ಮಣಿಸಿ ಮುಂದಿನ ಹಂತಕ್ಕೆ ಅರ್ಹತೆ ಪಡೆದರು.
ಇದೇ ವೇಳೆ, ತೈಪೆ ಓಪನ್ ಮಹಿಳಾ ಸಿಂಗಲ್ಸ್ನ ಹಾಲಿ ಚಾಂಪಿಯನ್ ತನ್ವಿ ಶರ್ಮಾ ಹಾಗೂ ಮಾಜಿ ವಿಶ್ವ ನಂ.1 ಆಟಗಾರ ಕಿದಂಬಿ ಶ್ರೀಕಾಂತ್ ಸೇರಿದಂತೆ ಭಾರತದ ಪ್ರಮುಖ ಶಟ್ಲರ್ಗಳು ಟೂರ್ನಿಯಲ್ಲಿ ತಮ್ಮ ಅಭಿಯಾನ ಆರಂಭಿಸಲಿದ್ದಾರೆ.
ಪುರುಷರ ಸಿಂಗಲ್ಸ್ನಲ್ಲಿ ಕಿರಣ್ ಜಾರ್ಜ್, ರೌನಕ್ ಚೌಹಾಣ್, ಸನೀತ್ ದಯಾನಂದ್ ಹಾಗೂ ತರುಣ್ ಮನ್ನೇಪಳ್ಳಿ ಭಾರತವನ್ನು ಪ್ರತಿನಿಧಿಸಲಿದ್ದಾರೆ. ಮಹಿಳಾ ಸಿಂಗಲ್ಸ್ನಲ್ಲಿ ಅನ್ಮೋಲ್ ಖರ್, ಮಾಳವಿಕಾ ಬನ್ಸೋಡ್ ಹಾಗೂ ಆಕರ್ಷಿ ಕಶ್ಯಪ್ ಕಣಕ್ಕಿಳಿಯಲಿದ್ದಾರೆ.
ಆದರೆ ಟೂರ್ನಿಯ ಆರಂಭಿಕ ದಿನ ಭಾರತಕ್ಕೆ ಮಿಶ್ರ ಫಲಿತಾಂಶ ದೊರೆತಿದೆ.
ಥಾಯ್ಲೆಂಡ್ ಜೋಡಿಗೆ ಆಘಾತ ನೀಡಿದ ಕೃಷ್ಣ-ಪೃಥ್ವಿ ಜೋಡಿ
ಪುರುಷರ ಡಬಲ್ಸ್ನಲ್ಲಿ ಅನ್ಸೀಡೆಡ್ ಭಾರತೀಯ ಜೋಡಿಯಾದ ಕೃಷ್ಣ ಪ್ರಸಾದ್ ಗರಗ ಹಾಗೂ ಪೃಥ್ವಿ ಕೃಷ್ಣಮೂರ್ತಿ ರಾಯ್, 6ನೇ ಶ್ರೇಯಾಂಕದ ಥಾಯ್ಲೆಂಡ್ ಜೋಡಿ ಚಲೋಎಂಪೋನ್ ಚರೋಯೆಂಕಿತಮೋರ್ನ್ ಮತ್ತು ವೊರ್ರಾಪೋಲ್ ಥೋಂಗ್ಸಾ-ನ್ಗಾ ಅವರನ್ನು 21-16, 21-18 ಅಂತರದಿಂದ ಮಣಿಸಿ ಎರಡನೇ ಸುತ್ತಿಗೆ ಪ್ರವೇಶಿಸಿದೆ.
ಇದು ಟೂರ್ನಿಯ ಆರಂಭದಲ್ಲೇ ಭಾರತದ ಪಾಲಿಗೆ ಗಮನಾರ್ಹ ಗೆಲುವಾಗಿದೆ.
ಡಬಲ್ಸ್ನಲ್ಲಿ ಕೆಲವರಿಗೆ ನಿರಾಸೆ
ಪುರುಷರ ಡಬಲ್ಸ್ನಲ್ಲಿ ಅಚ್ಯುತಾದಿತ್ಯ ರಾವ್ ದೊಡ್ಡವರಪು ಮತ್ತು ಅರ್ಜುನ್ ರೆಡ್ಡಿ ಪೋಚನಾ ಮೊದಲ ಸುತ್ತಿನಲ್ಲೇ ಸೋತು ಹೊರಬಿದ್ದರು.
ಮಹಿಳಾ ಡಬಲ್ಸ್ನಲ್ಲಿ ಪ್ರಿಯಾ ಕೊಂಜೆಂಗ್ಬಾಮ್ ಮತ್ತು ಶ್ರುತಿ ಮಿಶ್ರಾ 15-21, 13-21 ಅಂತರದಿಂದ ಜಪಾನ್ನ 2ನೇ ಶ್ರೇಯಾಂಕದ ರಿರಿನಾ ಹಿರಾಮೊಟೊ ಮತ್ತು ಕೊಕೊನಾ ಇಶಿಕಾವಾ ಜೋಡಿಗೆ ಸೋಲು ಕಂಡರು.
ಪುರುಷರ ಸಿಂಗಲ್ಸ್ ಅರ್ಹತಾ ಸುತ್ತಿನಲ್ಲಿ ತುಷಾರ್ ಸುವೀರ್, ಕೆನಡಾದ ಶೌರ್ಯ ಗುಲ್ಲಯ್ಯ ಅವರನ್ನು 21-15, 21-12 ಅಂತರದಿಂದ ಮಣಿಸಿದರು. ಆದರೆ ಮುಂದಿನ ಅರ್ಹತಾ ಸುತ್ತಿನಲ್ಲಿ ಜಪಾನ್ನ ಶೋಗೊ ಒಗಾವಾ ವಿರುದ್ಧ 10-21, 17-21 ಅಂತರದಿಂದ ಸೋತು ಟೂರ್ನಿಯಿಂದ ಹೊರಬಿದ್ದರು.
33 ಆಟಗಾರರ ಭಾರತ ತಂಡ
ಕೊರಿಯಾ ಮಾಸ್ಟರ್ಸ್ ಸೂಪರ್ 300 ಟೂರ್ನಿಯಲ್ಲಿ ಭಾರತವು ಪುರುಷರ ಸಿಂಗಲ್ಸ್, ಮಹಿಳಾ ಸಿಂಗಲ್ಸ್, ಪುರುಷರ ಡಬಲ್ಸ್, ಮಹಿಳಾ ಡಬಲ್ಸ್ ಹಾಗೂ ಮಿಶ್ರ ಡಬಲ್ಸ್ ಸೇರಿದಂತೆ ಐದು ವಿಭಾಗಗಳಲ್ಲಿ 33 ಆಟಗಾರರ ತಂಡವನ್ನು ಕಣಕ್ಕಿಳಿಸಿದೆ.
