ಕಠ್ಮಂಡು: ಪಶ್ಚಿಮ ನೇಪಾಳದಲ್ಲಿ ಇಂದು ಮುಂಜಾನೆ 4.2 ತೀವ್ರತೆಯ ಭೂಕಂಪ ಸಂಭವಿಸಿದ್ದು, ಸ್ಥಳೀಯರಲ್ಲಿ ಆತಂಕ ಉಂಟುಮಾಡಿದೆ. ಆದರೆ, ಇದುವರೆಗೆ ಯಾವುದೇ ಪ್ರಾಣಹಾನಿ ಅಥವಾ ಆಸ್ತಿಪಾಸ್ತಿಗೆ ಹಾನಿಯಾದ ಬಗ್ಗೆ ವರದಿಯಾಗಿಲ್ಲ.
ರಾಷ್ಟ್ರೀಯ ಭೂಕಂಪ ನಿಗಾ ಮತ್ತು ಸಂಶೋಧನಾ ಕೇಂದ್ರ (National Earthquake Monitoring and Research Centre) ನೀಡಿದ ಮಾಹಿತಿಯಂತೆ, ಭೂಕಂಪದ ಕೇಂದ್ರಬಿಂದು ಸುದುರ್ಪಶ್ಚಿಮ ಪ್ರಾಂತ್ಯದ ಬಜಾಂಗ್ ಜಿಲ್ಲೆಯ ಕೋಟ್ದೇವಾಲ್ ಪ್ರದೇಶದಲ್ಲಿ, ಕಠ್ಮಂಡುವಿನಿಂದ ಸುಮಾರು 900 ಕಿಲೋಮೀಟರ್ ಪಶ್ಚಿಮಕ್ಕೆ ದಾಖಲಾಗಿದೆ.
ನೆರೆಯ ಜಿಲ್ಲೆಗಳಲ್ಲೂ ಭೂಕಂಪದ ಅನುಭವ
ಭೂಕಂಪದ ಕಂಪನವು ಬಜುರಾ ಮತ್ತು ದಾರ್ಚುಲಾ ಜಿಲ್ಲೆಗಳಲ್ಲಿಯೂ ಅನುಭವಕ್ಕೆ ಬಂದಿದೆ. ಮುನ್ನೆಚ್ಚರಿಕೆ ಕ್ರಮವಾಗಿ ಅಧಿಕಾರಿಗಳು ಪರಿಸ್ಥಿತಿಯ ಮೇಲೆ ನಿಗಾ ವಹಿಸಿದ್ದು, ಇದುವರೆಗೆ ಯಾವುದೇ ಹಾನಿ ಸಂಭವಿಸಿರುವ ಮಾಹಿತಿ ಲಭ್ಯವಾಗಿಲ್ಲ.
ಒಂದು ವಾರದ ಹಿಂದೆಯೂ ಸಂಭವಿಸಿತ್ತು ಭೂಕಂಪ
ಕಳೆದ ವಾರವೂ ಪಶ್ಚಿಮ ನೇಪಾಳದ ಲುಂಬಿನಿ ಪ್ರಾಂತ್ಯದ ರುಕುಮ್ ಈಸ್ಟ್ ಜಿಲ್ಲೆಯಲ್ಲಿ 5.0 ತೀವ್ರತೆಯ ಭೂಕಂಪ ಸಂಭವಿಸಿತ್ತು. ಸತತವಾಗಿ ಸಂಭವಿಸುತ್ತಿರುವ ಭೂಕಂಪಗಳಿಂದ ಸ್ಥಳೀಯ ನಿವಾಸರಲ್ಲಿ ಆತಂಕ ಹೆಚ್ಚಾಗಿದೆ.
