ಚಿನ್ನ-ಬೆಳ್ಳಿ ಬೆಲೆಯಲ್ಲಿ ಸತತ ಎರಡನೇ ವಾರ ಕುಸಿತ: ಹೂಡಿಕೆದಾರರಲ್ಲಿ ಆತಂಕ

ಚಿನ್ನ-ಬೆಳ್ಳಿ ಬೆಲೆಯಲ್ಲಿ ಸತತ ಎರಡನೇ ವಾರ ಕುಸಿತ: ಹೂಡಿಕೆದಾರರಲ್ಲಿ ಆತಂಕ

ದೇಶೀಯ ಹಾಗೂ ಅಂತರರಾಷ್ಟ್ರೀಯ ಬುಲಿಯನ್ ಮಾರುಕಟ್ಟೆಯಲ್ಲಿ ಚಿನ್ನ ಮತ್ತು ಬೆಳ್ಳಿ ಬೆಲೆಗಳು ಸತತ ಎರಡನೇ ವಾರವೂ ಇಳಿಕೆ ಕಂಡಿವೆ. ಅಮೆರಿಕನ್ ಡಾಲರ್ ಬಲಗೊಳ್ಳುತ್ತಿರುವುದು, ಅಮೆರಿಕದ ಖಜಾನೆ (Treasury) ಬಾಂಡ್‌ಗಳ ಮೇಲಿನ ಆದಾಯ (Yield) ಏರಿಕೆಯಾಗಿರುವುದು ಹಾಗೂ ಪಶ್ಚಿಮ ಏಷ್ಯಾದಲ್ಲಿ ಉದ್ವಿಗ್ನತೆ ಹೆಚ್ಚಾದರೆ ಅಮೆರಿಕದ ಫೆಡರಲ್ ರಿಸರ್ವ್ ಬಡ್ಡಿದರಗಳ ಬಗ್ಗೆ ಕಠಿಣ ನಿಲುವು ಮುಂದುವರಿಸಬಹುದು ಎಂಬ ನಿರೀಕ್ಷೆ ಹೂಡಿಕೆದಾರರ ಮನೋಭಾವದ ಮೇಲೆ ಪರಿಣಾಮ ಬೀರಿದೆ.

ಮಲ್ಟಿ ಕಮಾಡಿಟಿ ಎಕ್ಸ್‌ಚೇಂಜ್ (MCX) ನಲ್ಲಿ ಆಗಸ್ಟ್ ತಿಂಗಳ ಚಿನ್ನದ ಭವಿಷ್ಯದ (Futures) ಒಪ್ಪಂದದ ಬೆಲೆ ವಾರದ ಅವಧಿಯಲ್ಲಿ 1.8 ಶೇಕಡಾ ಇಳಿಕೆ ಕಂಡು, 10 ಗ್ರಾಂಗೆ ₹1,40,906ಕ್ಕೆ ತಲುಪಿದೆ.

ಅದೇ ರೀತಿ, ಸೆಪ್ಟೆಂಬರ್ ತಿಂಗಳ ಬೆಳ್ಳಿ ಭವಿಷ್ಯದ ಒಪ್ಪಂದದ ಬೆಲೆ 3 ಶೇಕಡಾ ಕುಸಿದು, ಪ್ರತಿ ಕೆ.ಜಿಗೆ ₹2,16,013ರಲ್ಲಿ ವಾರಾಂತ್ಯ ವಹಿವಾಟು ಮುಕ್ತಾಯಗೊಂಡಿದೆ.

ಅಂತರರಾಷ್ಟ್ರೀಯ ಮಾರುಕಟ್ಟೆಯ ಕಾಮೆಕ್ಸ್ (COMEX) ನಲ್ಲಿ ಆಗಸ್ಟ್ ಚಿನ್ನದ ಭವಿಷ್ಯದ ಒಪ್ಪಂದದ ಬೆಲೆ ವಾರದ ಅವಧಿಯಲ್ಲಿ 2.3 ಶೇಕಡಾ ಇಳಿದು, ಪ್ರತಿ ಟ್ರಾಯ್ ಔನ್ಸ್‌ಗೆ 4,018.8 ಡಾಲರ್ನಲ್ಲಿ ಸ್ಥಿರಗೊಂಡಿದೆ.

ಇದೇ ವೇಳೆ, ಸೆಪ್ಟೆಂಬರ್ ಬೆಳ್ಳಿ ಭವಿಷ್ಯದ ಒಪ್ಪಂದವು ವಾರದ ಅವಧಿಯಲ್ಲಿ ಸುಮಾರು 6.4 ಶೇಕಡಾ ಭಾರೀ ಕುಸಿತ ಕಂಡು, ಪ್ರತಿ ಟ್ರಾಯ್ ಔನ್ಸ್‌ಗೆ 56.33 ಡಾಲರ್ನಲ್ಲಿ ವಹಿವಾಟು ಅಂತ್ಯಗೊಂಡಿದೆ.