ಸಿಯೋಲ್: ಹಣದುಬ್ಬರವನ್ನು ನಿಯಂತ್ರಿಸುವ ಉದ್ದೇಶದಿಂದ ದಕ್ಷಿಣ ಕೊರಿಯಾದ ಕೇಂದ್ರ ಬ್ಯಾಂಕ್ (ಬ್ಯಾಂಕ್ ಆಫ್ ಕೊರಿಯಾ) ಮೂರು ವರ್ಷಗಳಿಗೂ ಹೆಚ್ಚು ಅವಧಿಯ ಬಳಿಕ ಮೊದಲ ಬಾರಿಗೆ ತನ್ನ ಪ್ರಮುಖ ನೀತಿ ಬಡ್ಡಿದರವನ್ನು ಹೆಚ್ಚಿಸಿದೆ.
ಹಣಕಾಸು ನೀತಿ ಸಮಿತಿ ಸಭೆಯ ಬಳಿಕ, ಬ್ಯಾಂಕ್ ತನ್ನ ಮಾನದಂಡ ಬಡ್ಡಿದರವನ್ನು 2.5 ಶೇಕಡದಿಂದ 2.75 ಶೇಕಡಕ್ಕೆ ಏರಿಸಿದ್ದು, ಇದು 0.25 ಶೇಕಡಾ ಅಂಕಗಳ ಹೆಚ್ಚಳವಾಗಿದೆ. 2023ರ ಜನವರಿಯ ನಂತರ ಇದೇ ಮೊದಲ ಬಾರಿಗೆ ಬಡ್ಡಿದರ ಏರಿಕೆ ಮಾಡಲಾಗಿದೆ.
ಪಶ್ಚಿಮ ಏಷ್ಯಾದಲ್ಲಿ ತೀವ್ರಗೊಂಡಿರುವ ಸಂಘರ್ಷದ ಪರಿಣಾಮ ಜಾಗತಿಕ ಆರ್ಥಿಕತೆಯ ಮೇಲೆ ಒತ್ತಡ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಹಣದುಬ್ಬರವನ್ನು ನಿಯಂತ್ರಿಸಲು ಈ ಕ್ರಮ ಕೈಗೊಳ್ಳಲಾಗಿದೆ.
ಈ ವರ್ಷದ ಮೇ ಮತ್ತು ಜೂನ್ ತಿಂಗಳಲ್ಲಿ ಗ್ರಾಹಕ ಬೆಲೆ ಹಣದುಬ್ಬರವು 3 ಶೇಕಡಕ್ಕಿಂತ ಹೆಚ್ಚಿದ್ದು, ಬ್ಯಾಂಕ್ ಆಫ್ ಕೊರಿಯಾದ 2 ಶೇಕಡ ಗುರಿಯನ್ನು ಮೀರಿದೆ.
ಬ್ಯಾಂಕ್ ಆಫ್ ಕೊರಿಯಾದ ಗವರ್ನರ್ ಶಿನ್ ಹ್ಯೂನ್ ಸಾಂಗ್ ಮಾತನಾಡಿ, ಆರ್ಥಿಕ ಬೆಳವಣಿಗೆ, ಗ್ರಾಹಕ ಬೆಲೆಗಳ ಏರಿಕೆ ಹಾಗೂ ಹಣಕಾಸು ಸ್ಥಿರತೆಯನ್ನು ಗಮನದಲ್ಲಿಟ್ಟುಕೊಂಡು ಹಣಕಾಸು ನೀತಿ ಸಮಿತಿಯ ಎಲ್ಲಾ ಏಳು ಸದಸ್ಯರೂ ಬಡ್ಡಿದರ ಹೆಚ್ಚಳವನ್ನು ಏಕಮತದಿಂದ ಬೆಂಬಲಿಸಿದ್ದಾರೆ ಎಂದು ತಿಳಿಸಿದ್ದಾರೆ.
