ಭಾರತ-ಮಲೇಷ್ಯಾ ರಕ್ಷಣಾ ಸಹಕಾರಕ್ಕೆ ಹೊಸ ಚೈತನ್ಯ; ದ್ವಿಪಕ್ಷೀಯ ಸೇನಾ ಸಹಯೋಗದ ಸಮಗ್ರ ಪರಿಶೀಲನೆ
ಭಾರತ ಮತ್ತು ಮಲೇಷ್ಯಾ ನಡುವಿನ 12ನೇ ಸೇನಾ ಉಪಸಮಿತಿ (Sub Committee Meeting) ಸಭೆ ನವದೆಹಲಿಯಲ್ಲಿ ನಡೆದಿದ್ದು, ಉಭಯ ರಾಷ್ಟ್ರಗಳು ದ್ವಿಪಕ್ಷೀಯ ರಕ್ಷಣಾ ಸಹಕಾರದ ವಿವಿಧ ಆಯಾಮಗಳನ್ನು ಸಮಗ್ರವಾಗಿ ಪರಿಶೀಲಿಸಿವೆ.
ರಕ್ಷಣಾ ಸಚಿವಾಲಯದ ಪ್ರಕಾರ, ಸಭೆಯಲ್ಲಿ ಇಂಡೋ-ಪೆಸಿಫಿಕ್ ಪ್ರದೇಶದಲ್ಲಿ ಶಾಂತಿ, ಭದ್ರತೆ ಹಾಗೂ ನೌಕಾಯಾನ ಸ್ವಾತಂತ್ರ್ಯವನ್ನು ಕಾಪಾಡುವ ಬದ್ಧತೆಯನ್ನು ಎರಡೂ ರಾಷ್ಟ್ರಗಳು ಪುನರುಚ್ಚರಿಸಿವೆ.
ಸಭೆಯಲ್ಲಿ ಸೇನೆಯಿಂದ ಸೇನೆಗೆ ವಿನಿಮಯ ಕಾರ್ಯಕ್ರಮಗಳು, ಜಂಟಿ ಸೇನಾ ಅಭ್ಯಾಸಗಳು, ತರಬೇತಿ, ಸಿಬ್ಬಂದಿ ಮಟ್ಟದ ಮಾತುಕತೆ, ಸಾಮರ್ಥ್ಯ ವೃದ್ಧಿ, ಸಾಗರ ಸಹಕಾರ ಹಾಗೂ ಉದಯೋನ್ಮುಖ ತಂತ್ರಜ್ಞಾನ ಕ್ಷೇತ್ರಗಳಲ್ಲಿ ಸಹಯೋಗ ಸೇರಿದಂತೆ ಹಲವು ಪ್ರಮುಖ ವಿಷಯಗಳ ಕುರಿತು ಚರ್ಚೆ ನಡೆಯಿತು.
ಭಾರತ-ಮಲೇಷ್ಯಾ ನಡುವಿನ ಪ್ರಮುಖ ಸೇನಾ ಸಮಾಲೋಚನಾ ವೇದಿಕೆಯಾಗಿ ಈ ಉಪಸಮಿತಿ ಕಾರ್ಯನಿರ್ವಹಿಸುತ್ತಿದ್ದು, ಇದು ರಕ್ಷಣಾ ಕಾರ್ಯದರ್ಶಿಗಳ ಮಟ್ಟದಲ್ಲಿ ನಡೆಯಲಿರುವ ಭಾರತ-ಮಲೇಷ್ಯಾ ರಕ್ಷಣಾ ಸಹಕಾರ ಸಭೆಗೆ ಮುನ್ನದ ಮಹತ್ವದ ಸಭೆಯಾಗಿದೆ. ಕಳೆದ ಸಭೆಯ ನಂತರದ ಪ್ರಗತಿಯನ್ನು ಪರಿಶೀಲಿಸಿದ ಉಭಯ ದೇಶಗಳು, ಈ ಸಭೆಯ ಫಲಿತಾಂಶಗಳು ಮುಂದಿನ ರಕ್ಷಣಾ ಸಹಕಾರ ಸಭೆಗೆ ಬಲವಾದ ಅಡಿಪಾಯವಾಗಲಿವೆ ಎಂಬ ವಿಶ್ವಾಸ ವ್ಯಕ್ತಪಡಿಸಿವೆ.
ಭಾರತ ಪ್ರವಾಸದ ಅಂಗವಾಗಿ ಮಲೇಷ್ಯಾ ನಿಯೋಗವು ರಕ್ಷಣಾ ಕಾರ್ಯದರ್ಶಿ ರಾಜೇಶ್ ಕುಮಾರ್ ಸಿಂಗ್ ಅವರನ್ನು ಭೇಟಿಯಾಗಿ ಮಾತುಕತೆ ನಡೆಸಿತು. ಜೊತೆಗೆ ನವದೆಹಲಿಯ ವಿಶ್ವ ವ್ಯಾಪಾರ ಕೇಂದ್ರದಲ್ಲಿರುವ ಡಿಫೆನ್ಸ್ ಪಬ್ಲಿಕ್ ಸೆಕ್ಟರ್ ಅಂಡರ್ಟೇಕಿಂಗ್ಸ್ (DPSU) ಭವನಕ್ಕೂ ಭೇಟಿ ನೀಡಿತು.
ಸಭೆಗೆ ಮುನ್ನ ಮಲೇಷ್ಯಾ ನಿಯೋಗದ ಮುಖ್ಯಸ್ಥರು ರಾಷ್ಟ್ರೀಯ ಯುದ್ಧ ಸ್ಮಾರಕಕ್ಕೆ ಭೇಟಿ ನೀಡಿ ದೇಶಕ್ಕಾಗಿ ಪ್ರಾಣತ್ಯಾಗ ಮಾಡಿದ ಭಾರತೀಯ ಯೋಧರಿಗೆ ಪುಷ್ಪಗುಚ್ಛ ಅರ್ಪಿಸಿ ಗೌರವ ಸಲ್ಲಿಸಿದರು.
