ಫಿಫಾ ವಿಶ್ವಕಪ್: ಹೆಚ್ಚುವರಿ ವೇಳೆಯಲ್ಲಿ ಬೆಲ್ಜಿಯಂಗೆ ರೋಚಕ ಜಯ, ಸೆನೆಗಲ್ಗೆ ನಿರಾಸೆ
ಫಿಫಾ ವಿಶ್ವಕಪ್ನ ರೌಂಡ್ ಆಫ್ 32 ಪಂದ್ಯದಲ್ಲಿ ಬೆಲ್ಜಿಯಂ ತಂಡವು ಹೆಚ್ಚುವರಿ ವೇಳೆಯಲ್ಲಿ ಸೆನೆಗಲ್ ವಿರುದ್ಧ 3-2 ಗೋಲುಗಳ ರೋಚಕ ಗೆಲುವು ದಾಖಲಿಸಿ ಪ್ರೀ-ಕ್ವಾರ್ಟರ್ಫೈನಲ್ಗೆ (ರೌಂಡ್ ಆಫ್ 16) ಲಗ್ಗೆ ಇಟ್ಟಿದೆ.
ಪಂದ್ಯದ 125ನೇ ನಿಮಿಷದಲ್ಲಿ ಯೂರಿ ಟೈಲೆಮ್ಯಾನ್ಸ್ ಪೆನಾಲ್ಟಿ ಅವಕಾಶವನ್ನು ಗೋಲಾಗಿ ಪರಿವರ್ತಿಸಿ ಬೆಲ್ಜಿಯಂಗೆ ಅಮೂಲ್ಯ ಗೆಲುವು ತಂದುಕೊಟ್ಟರು. ಈ ಜಯದೊಂದಿಗೆ ಬೆಲ್ಜಿಯಂ ತನ್ನ ಸತತ 17 ಪಂದ್ಯಗಳ ಅಜೇಯ ದಾಖಲೆಯನ್ನು ಮುಂದುವರಿಸಿದೆ.
ಇನ್ನೊಂದು ರೌಂಡ್ ಆಫ್ 32 ಪಂದ್ಯದಲ್ಲಿ ಸಹ ಆತಿಥೇಯ ಅಮೆರಿಕ ಬೋಸ್ನಿಯಾ ಮತ್ತು ಹರ್ಜೆಗೋವಿನಾ ವಿರುದ್ಧ 2-0 ಗೋಲುಗಳ ಜಯ ಸಾಧಿಸಿ ಪ್ರೀ-ಕ್ವಾರ್ಟರ್ಗೆ ಪ್ರವೇಶಿಸಿದೆ. 2002ರ ಬಳಿಕ ನಾಕೌಟ್ ಹಂತದಲ್ಲಿ ಅಮೆರಿಕ ದಾಖಲಿಸಿದ ಮೊದಲ ಗೆಲುವು ಇದಾಗಿದೆ. ಇದೀಗ ಅಮೆರಿಕ ಮುಂದಿನ ಹಂತದಲ್ಲಿ ಬೆಲ್ಜಿಯಂ ತಂಡವನ್ನು ಎದುರಿಸಲಿದೆ.
ಅಟ್ಲಾಂಟಾದಲ್ಲಿ ನಡೆದ ಮತ್ತೊಂದು ಪಂದ್ಯದಲ್ಲಿ ಇಂಗ್ಲೆಂಡ್ ತಂಡ ಡೆಮಾಕ್ರಟಿಕ್ ರಿಪಬ್ಲಿಕ್ ಆಫ್ ಕಾಂಗೋ ವಿರುದ್ಧ 2-1 ಗೋಲುಗಳ ಅಂತರದಿಂದ ಗೆದ್ದು ಪ್ರೀ-ಕ್ವಾರ್ಟರ್ಗೆ ಪ್ರವೇಶಿಸಿತು. ಪಂದ್ಯದ ಕೊನೆಯ 15 ನಿಮಿಷಗಳಲ್ಲಿ ಹ್ಯಾರಿ ಕೇನ್ ಎರಡು ಗೋಲುಗಳನ್ನು ದಾಖಲಿಸಿ ಇಂಗ್ಲೆಂಡ್ಗೆ ಗೆಲುವು ತಂದುಕೊಟ್ಟರು. ಜುಲೈ 6ರಂದು ನಡೆಯಲಿರುವ ಪ್ರೀ-ಕ್ವಾರ್ಟರ್ನಲ್ಲಿ ಇಂಗ್ಲೆಂಡ್, ಸಹ ಆತಿಥೇಯ ಮೆಕ್ಸಿಕೊ ವಿರುದ್ಧ ಸೆಣಸಲಿದೆ.
ಇನ್ನೊಂದು ಪಂದ್ಯದಲ್ಲಿ ಮೆಕ್ಸಿಕೊ ತಂಡ ಈಕ್ವೆಡಾರ್ ವಿರುದ್ಧ 2-0 ಗೋಲುಗಳ ಜಯ ಸಾಧಿಸಿ ರೌಂಡ್ ಆಫ್ 16ಕ್ಕೆ ಅರ್ಹತೆ ಪಡೆದುಕೊಂಡಿದೆ.
