ರೋಟರ್ಡ್ಯಾಮ್ನಲ್ಲಿ ನಡೆದ ಎಫ್ಐಎಚ್ ಪ್ರೊ ಲೀಗ್ನ ತನ್ನ ಕೊನೆಯ ಪಂದ್ಯದಲ್ಲಿ ಭಾರತ ಪುರುಷರ ಹಾಕಿ ತಂಡ ಆತಿಥೇಯ ನೆದರ್ಲೆಂಡ್ಸ್ ವಿರುದ್ಧ 3-2 ಅಂತರದ ರೋಚಕ ಜಯ ಸಾಧಿಸಿದೆ. ಜುಗ್ರಾಜ್ ಸಿಂಗ್, ಅಭಿಷೇಕ್ ಹಾಗೂ ರಾಜಿಂದರ್ ಸಿಂಗ್ ಗಳಿಸಿದ ಗೋಲುಗಳು ಭಾರತಕ್ಕೆ ಅಮೂಲ್ಯ ಗೆಲುವು ತಂದುಕೊಟ್ಟವು.
ಪಂದ್ಯದ ಆರಂಭದಲ್ಲಿ ನೆದರ್ಲೆಂಡ್ಸ್ ತಂಡ ದಾಳಿಯ ಆಟ ಪ್ರದರ್ಶಿಸಿ ಒತ್ತಡ ಹೇರುವ ಪ್ರಯತ್ನ ನಡೆಸಿತು. ಆದರೆ ಭಾರತೀಯ ರಕ್ಷಣಾ ವಿಭಾಗ ಶೀಘ್ರದಲ್ಲೇ ಪರಿಸ್ಥಿತಿಯನ್ನು ನಿಯಂತ್ರಣಕ್ಕೆ ತೆಗೆದುಕೊಂಡಿತು. ಮೊದಲ ಕ್ವಾರ್ಟರ್ ಗೋಲುರಹಿತವಾಗಿ ಅಂತ್ಯಗೊಂಡಿತು.
ಎರಡನೇ ಕ್ವಾರ್ಟರ್ನಲ್ಲಿ ಭಾರತಕ್ಕೆ ದೊರೆತ ಪೆನಾಲ್ಟಿ ಕಾರ್ನರ್ ಅವಕಾಶವನ್ನು ಜುಗ್ರಾಜ್ ಸಿಂಗ್ ಯಶಸ್ವಿಯಾಗಿ ಗೋಲಾಗಿ ಪರಿವರ್ತಿಸಿ 18ನೇ ನಿಮಿಷದಲ್ಲಿ ತಂಡಕ್ಕೆ ಮುನ್ನಡೆ ತಂದುಕೊಟ್ಟರು. ಇದಾದ ಕೆಲವೇ ಕ್ಷಣಗಳಲ್ಲಿ ನೆದರ್ಲೆಂಡ್ಸ್ ಸಮಬಲ ಸಾಧಿಸಿದರೂ, ಅಭಿಷೇಕ್ ಅರ್ಧಾವಧಿಗೆ ಮುನ್ನ ಮತ್ತೊಂದು ಗೋಲು ಬಾರಿಸಿ ಭಾರತವನ್ನು 2-1 ಅಂತರದಲ್ಲಿ ಮುನ್ನಡೆಸಿದರು.
ದ್ವಿತೀಯಾರ್ಧದಲ್ಲಿ ಉಭಯ ತಂಡಗಳು ಆಕ್ರಮಣಕಾರಿ ಆಟ ಪ್ರದರ್ಶಿಸಿದವು. ಪಂದ್ಯದ 56ನೇ ನಿಮಿಷದಲ್ಲಿ ರಾಜಿಂದರ್ ಸಿಂಗ್ ಪೆನಾಲ್ಟಿ ಕಾರ್ನರ್ ಮೂಲಕ ಮೂರನೇ ಗೋಲು ದಾಖಲಿಸಿ ಭಾರತದ ಮುನ್ನಡೆಯನ್ನು ವಿಸ್ತರಿಸಿದರು. ಅಂತಿಮ ಹಂತದಲ್ಲಿ ನೆದರ್ಲೆಂಡ್ಸ್ ಪರ ಕೋಯೆನ್ ಬಿಜೆನ್ ಗೋಲು ಗಳಿಸಿ ಅಂತರವನ್ನು ಕಡಿಮೆ ಮಾಡಿದರೂ, ಭಾರತೀಯ ರಕ್ಷಣಾ ಪಡೆ ಮತ್ತಷ್ಟು ಗೋಲುಗಳಿಗೆ ಅವಕಾಶ ನೀಡಲಿಲ್ಲ.
ಹಲವು ಪೆನಾಲ್ಟಿ ಕಾರ್ನರ್ಗಳನ್ನು ಯಶಸ್ವಿಯಾಗಿ ತಡೆದ ಭಾರತದ ರಕ್ಷಣಾ ವಿಭಾಗ ಕೊನೆಯ ಕ್ಷಣಗಳಲ್ಲೂ ದೃಢ ಪ್ರದರ್ಶನ ನೀಡಿತು. ತಂಡದ ಮಧ್ಯಭಾಗದಲ್ಲಿ ಉತ್ತಮ ನಾಯಕತ್ವ ಹಾಗೂ ಸಮರ್ಥ ಆಟ ತೋರಿದ ತಾತ್ಕಾಲಿಕ ನಾಯಕ ಹಾರ್ದಿಕ್ ಸಿಂಗ್ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.
ಈ ಗೆಲುವಿನೊಂದಿಗೆ ಭಾರತವು ರೋಟರ್ಡ್ಯಾಮ್ ಹಂತವನ್ನು ಆತ್ಮವಿಶ್ವಾಸದಿಂದ ಮುಕ್ತಾಯಗೊಳಿಸಿದ್ದು, ನೆದರ್ಲೆಂಡ್ಸ್ ವಿರುದ್ಧದ ಎರಡನೇ ಜಯವನ್ನೂ ದಾಖಲಿಸಿದೆ.
