ಪುರಿಯಲ್ಲಿ ವೈಭವದಿಂದ ಆರಂಭವಾದ ಶ್ರೀ ಜಗನ್ನಾಥರ ದೇವಸ್ನಾನ ಯಾತ್ರೆ; ಲಕ್ಷಾಂತರ ಭಕ್ತರ ದರ್ಶನ
ಒಡಿಶಾದ ಪವಿತ್ರ ಕ್ಷೇತ್ರ ಪುರಿಯ ಶ್ರೀ ಜಗನ್ನಾಥ ದೇವಸ್ಥಾನದಲ್ಲಿ ಇಂದು ದೇವಸ್ನಾನ ಯಾತ್ರೆ (ಸ್ನಾನ ಪೂರ್ಣಿಮೆ) ಸಂಭ್ರಮ, ಭಕ್ತಿ ಮತ್ತು ಸಂಪ್ರದಾಯಬದ್ಧ ಆಚರಣೆಗಳೊಂದಿಗೆ ಆರಂಭವಾಗಿದೆ. ಈ ಅಪರೂಪದ ಧಾರ್ಮಿಕ ಆಚರಣೆಯನ್ನು ಕಣ್ತುಂಬಿಕೊಳ್ಳಲು ದೇಶದ ವಿವಿಧ ಭಾಗಗಳಿಂದ ಲಕ್ಷಾಂತರ ಭಕ್ತರು ಪುರಿಗೆ ಆಗಮಿಸಿದ್ದಾರೆ.
ಶ್ರೀ ಜಗನ್ನಾಥ, ಶ್ರೀ ಬಲಭದ್ರ ಹಾಗೂ ದೇವಿ ಸುಭದ್ರಾ ಅವರ ಉತ್ಸವ ಮೂರ್ತಿಗಳನ್ನು ಸಂಪ್ರದಾಯಬದ್ಧ ಮೆರವಣಿಗೆಯ ಮೂಲಕ ಸ್ನಾನ ವೇದಿಕೆಗೆ (ಸ್ನಾನ ಬೇಡಿ) ಕರೆತರಲಾಯಿತು. ಬಳಿಕ ದೇವಾಲಯದ ಪವಿತ್ರ ಸುವರ್ಣ ಬಾವಿಯಿಂದ ತರಲಾದ 108 ಕಲಶಗಳ ಪವಿತ್ರ ಜಲದಿಂದ ವೇದಮಂತ್ರಗಳ ಪಠಣ, ಶಂಖನಾದ ಹಾಗೂ ಭಜನೆಗಳ ನಡುವೆ ಮಹಾಭಿಷೇಕ ನೆರವೇರಿಸಲಾಯಿತು.
ದೇವಸ್ನಾನ ಪೂರ್ಣಿಮೆ ಅಂಗವಾಗಿ ನಡೆಯುವ ಈ ಆಚರಣೆಯು ವಿಶ್ವವಿಖ್ಯಾತ ಶ್ರೀ ಜಗನ್ನಾಥ ರಥಯಾತ್ರೆಗೆ ಮುನ್ನುಡಿಯಾಗಿದ್ದು, ಧಾರ್ಮಿಕವಾಗಿ ಅತ್ಯಂತ ಮಹತ್ವ ಪಡೆದಿದೆ.
ಮಹಾಸ್ನಾನದ ಬಳಿಕ ಶ್ರೀ ಜಗನ್ನಾಥ, ಬಲಭದ್ರ ಮತ್ತು ಸುಭದ್ರಾ ದೇವಿಯರು ಸಂಪ್ರದಾಯದಂತೆ 15 ದಿನಗಳ ‘ಅನಸಾರ’ (ಏಕಾಂತ ವಾಸ) ಅವಧಿಗೆ ಪ್ರವೇಶಿಸಲಿದ್ದು, ಈ ಅವಧಿಯಲ್ಲಿ ಸಾರ್ವಜನಿಕ ದರ್ಶನ ಇರುವುದಿಲ್ಲ. ನಂತರ ನವಯೌವನ ದರ್ಶನದ ಮೂಲಕ ಭಕ್ತರಿಗೆ ಮತ್ತೆ ದರ್ಶನ ನೀಡಿ, ಮುಂದಿನ ತಿಂಗಳ 16ರಂದು ಆರಂಭವಾಗುವ ರಥಯಾತ್ರೆಯಲ್ಲಿ ಪಾಲ್ಗೊಳ್ಳಲಿದ್ದಾರೆ.
ಹಬ್ಬದ ಹಿನ್ನೆಲೆಯಲ್ಲಿ ಭಕ್ತರ ಸುರಕ್ಷತೆ ಹಾಗೂ ಸುಗಮ ದರ್ಶನಕ್ಕಾಗಿ ವ್ಯಾಪಕ ಭದ್ರತಾ ವ್ಯವಸ್ಥೆ, ಜನಸಂದಣಿ ನಿಯಂತ್ರಣ ಮತ್ತು ಅಗತ್ಯ ಸೌಲಭ್ಯಗಳನ್ನು ಆಡಳಿತದಿಂದ ಕಲ್ಪಿಸಲಾಗಿದೆ.
