ಭಾರತದ ರಾಷ್ಟ್ರೀಯ ಕ್ರಿಟಿಕಲ್ ಮಿನರಲ್ ಮಿಷನ್ (National Critical Mineral Mission) ಮಹತ್ವದ ಪ್ರಗತಿ ಸಾಧಿಸಿದ್ದು, ಕೇಂದ್ರ ಗಣಿ ಸಚಿವಾಲಯವು (Ministry of Mines) ಏಳನೇ ಹಂತದ ಹರಾಜಿನಲ್ಲಿ 10 ಪ್ರಮುಖ ಮತ್ತು ಕಾರ್ಯತಂತ್ರದ ಖನಿಜ ಬ್ಲಾಕ್ಗಳನ್ನು ಯಶಸ್ವಿಯಾಗಿ ಹರಾಜು ಮಾಡಿದೆ.
ಇದರೊಂದಿಗೆ ಇದುವರೆಗೆ ಹರಾಜಿಗೆ ಇಡಲಾದ 88 ಖನಿಜ ಬ್ಲಾಕ್ಗಳ ಪೈಕಿ 56 ಬ್ಲಾಕ್ಗಳ ಹರಾಜು ಪೂರ್ಣಗೊಂಡಿದ್ದು, ಯಶಸ್ಸಿನ ಪ್ರಮಾಣವು 63 ಶೇಕಡಕ್ಕಿಂತ ಹೆಚ್ಚಾಗಿದೆ. ಜೊತೆಗೆ 11 ಅನ್ವೇಷಣಾ ಪರವಾನಗಿ (Exploration Licence) ಬ್ಲಾಕ್ಗಳ ಹರಾಜು ಕೂಡ ಯಶಸ್ವಿಯಾಗಿ ಪೂರ್ಣಗೊಂಡಿದೆ.
ಈ ಹಂತದ ಹರಾಜಿನಲ್ಲಿ ಮೊದಲ ಬಾರಿಗೆ ಗುಜರಾತ್, ಉತ್ತರಾಖಂಡ ಮತ್ತು ತೆಲಂಗಾಣ ರಾಜ್ಯಗಳಲ್ಲಿನ ಪ್ರಮುಖ ಖನಿಜ ಬ್ಲಾಕ್ಗಳನ್ನು ಕೇಂದ್ರ ಸರ್ಕಾರ ಹರಾಜು ಮಾಡಿರುವುದು ವಿಶೇಷವಾಗಿದೆ.
ಹರಾಜು ಪ್ರಕ್ರಿಯೆಯಲ್ಲಿ ಗ್ರಾಫೈಟ್, ಅಪರೂಪದ ಭೂತತ್ವ ಮೂಲಧಾತುಗಳು (Rare Earth Elements), ವೆನಾಡಿಯಂ, ಟೈಟಾನಿಯಂ, ಗ್ಲಾಕೋನೈಟ್ ಹಾಗೂ ರಾಕ್ ಫಾಸ್ಫೇಟ್ ಸೇರಿದಂತೆ ಹಲವು ಪ್ರಮುಖ ಖನಿಜಗಳು ಒಳಗೊಂಡಿದ್ದವು.
ಇದಲ್ಲದೆ, ಅನ್ವೇಷಣಾ ಪರವಾನಗಿ ಹರಾಜಿನ ಎರಡನೇ ಹಂತವೂ ಪೂರ್ಣಗೊಂಡಿದ್ದು, ಹೊಸ ವ್ಯವಸ್ಥೆ ಜಾರಿಯಾದ ನಂತರ ಒಟ್ಟು 11 ಅನ್ವೇಷಣಾ ಬ್ಲಾಕ್ಗಳನ್ನು ಹರಾಜು ಮಾಡಲಾಗಿದೆ. ಅರುಣಾಚಲ ಪ್ರದೇಶ, ಉತ್ತರ ಪ್ರದೇಶ ಹಾಗೂ ಒಡಿಶಾದಲ್ಲಿ ಮೊದಲ ಬಾರಿಗೆ ಈ ರೀತಿಯ ಅನ್ವೇಷಣಾ ಪರವಾನಗಿ ಬ್ಲಾಕ್ಗಳ ಹರಾಜು ನಡೆದಿರುವುದು ಗಮನಾರ್ಹವಾಗಿದೆ.
ಗಣಿ ಸಚಿವಾಲಯದ ಪ್ರಕಾರ, ಈ ಯಶಸ್ವಿ ಹರಾಜುಗಳು ಭಾರತದ ಖನಿಜ ಕ್ಷೇತ್ರದ ಮೇಲೆ ಕೈಗಾರಿಕೆಗಳ ವಿಶ್ವಾಸ ಹೆಚ್ಚುತ್ತಿರುವುದನ್ನು ತೋರಿಸುತ್ತವೆ. ಇದರಿಂದ ಸ್ವಚ್ಛ ಇಂಧನ, ಎಲೆಕ್ಟ್ರಿಕ್ ವಾಹನಗಳು, ನವೀಕರಿಸಬಹುದಾದ ಇಂಧನ, ಎಲೆಕ್ಟ್ರಾನಿಕ್ಸ್, ರಕ್ಷಣಾ ಉತ್ಪಾದನೆ ಹಾಗೂ ಉನ್ನತ ತಂತ್ರಜ್ಞಾನ ಉತ್ಪಾದನಾ ಕ್ಷೇತ್ರಗಳಿಗೆ ಅಗತ್ಯವಿರುವ ಪ್ರಮುಖ ಖನಿಜಗಳ ಅನ್ವೇಷಣೆ ಮತ್ತು ಅಭಿವೃದ್ಧಿಗೆ ಹೆಚ್ಚಿನ ವೇಗ ಸಿಗಲಿದೆ.
ಈ ಕ್ರಮವು ಖನಿಜಗಳ ಆಮದು ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುವುದರ ಜೊತೆಗೆ ದೇಶೀಯ ಪೂರೈಕೆ ಸರಪಳಿಯನ್ನು ಬಲಪಡಿಸಲು ಸಹಕಾರಿಯಾಗಲಿದೆ ಎಂದು ಸಚಿವಾಲಯ ತಿಳಿಸಿದೆ.
