ಅಮರನಾಥ ಯಾತ್ರೆಗೆ ಕಾಶ್ಮೀರ ಸಜ್ಜು: ಭದ್ರತೆಗೆ ಬಹುಹಂತದ ಕವಚ, ಕಟ್ಟೆಚ್ಚರದಲ್ಲಿ ಆಡಳಿತ
ಜಮ್ಮು-ಕಾಶ್ಮೀರದಲ್ಲಿ ಮುಂದಿನ ತಿಂಗಳ ಆರಂಭದಲ್ಲಿ ಆರಂಭವಾಗಲಿರುವ ವಾರ್ಷಿಕ ಅಮರನಾಥ ಯಾತ್ರೆಯ ಹಿನ್ನೆಲೆಯಲ್ಲಿ ಭದ್ರತಾ ವ್ಯವಸ್ಥೆಯನ್ನು ಮತ್ತಷ್ಟು ಬಿಗಿಗೊಳಿಸಲಾಗಿದೆ. ಯಾತ್ರೆ ಸುಗಮ ಹಾಗೂ ಸುರಕ್ಷಿತವಾಗಿ ನಡೆಯುವಂತೆ ನೋಡಿಕೊಳ್ಳಲು ಭದ್ರತಾ ಪಡೆಗಳು, ಪೊಲೀಸ್ ಇಲಾಖೆ ಮತ್ತು ನಾಗರಿಕ ಆಡಳಿತವು ಬಹುಹಂತದ ಭದ್ರತಾ ಜಾಲವನ್ನು ಸಕ್ರಿಯಗೊಳಿಸಿದೆ.
ಯಾತ್ರಾ ಮಾರ್ಗಗಳು, ಬೇಸ್ ಕ್ಯಾಂಪ್ಗಳು, ರೈಲು ನಿಲ್ದಾಣಗಳು, ವಸತಿ ಕೇಂದ್ರಗಳು ಹಾಗೂ ಇತರೆ ಪ್ರಮುಖ ಸ್ಥಳಗಳಲ್ಲಿ ವಿಶೇಷ ಭದ್ರತಾ ವ್ಯವಸ್ಥೆ ಜಾರಿಗೊಳಿಸಲಾಗಿದೆ. ಸಾಂಪ್ರದಾಯಿಕ ಪಹಲ್ಗಾಮ್ ಮಾರ್ಗದಲ್ಲಿ ಪೊಲೀಸರು ಹೆಚ್ಚುವರಿ ನಿಗಾವಹಿಸಿದ್ದು, ಖಾನಾಬಲ್ನಿಂದ ಪಹಲ್ಗಾಮ್ವರೆಗೆ ಭಯೋತ್ಪಾದನಾ ವಿರೋಧಿ ತಪಾಸಣೆ, ಪ್ರದೇಶ ನಿಯಂತ್ರಣ ಕಾರ್ಯಾಚರಣೆ ಹಾಗೂ ಸ್ಯಾನಿಟೈಸೇಶನ್ ಕಾರ್ಯಗಳನ್ನು ಕೈಗೊಳ್ಳಲಾಗಿದೆ.
ಬಾಂಬ್ ನಿಷ್ಕ್ರಿಯ ದಳ, ಶ್ವಾನ ದಳ ಹಾಗೂ ತಾಂತ್ರಿಕ ನಿಗಾ ತಂಡಗಳ ಸಹಯೋಗದೊಂದಿಗೆ ವಾಹನ ತಪಾಸಣೆ ನಡೆಯುತ್ತಿದ್ದು, ನಿರ್ಜನ ಪ್ರದೇಶಗಳು ಹಾಗೂ ಅರಣ್ಯ ಪ್ರದೇಶಗಳ ಮೇಲೂ ವಿಶೇಷ ನಿಗಾ ಇರಿಸಲಾಗಿದೆ. ಅನುಮಾನಾಸ್ಪದ ಅಥವಾ ನಿರ್ಲಕ್ಷ್ಯಗೊಂಡ ವಾಹನಗಳ ಮೇಲೂ ಕಟ್ಟುನಿಟ್ಟಿನ ಪರಿಶೀಲನೆ ನಡೆಯುತ್ತಿದೆ.
ಯಾತ್ರೆಗೆ ಸಂಬಂಧಿಸಿದ ಕುದುರೆ ಮಾಲೀಕರು, ಸೇವಾ ಪೂರೈಕೆದಾರರು ಮತ್ತು ಕಾರ್ಮಿಕರ ಗುರುತಿನ ಪರಿಶೀಲನೆಗಾಗಿ ಕ್ಯೂಆರ್ ಕೋಡ್ ಆಧಾರಿತ ವ್ಯವಸ್ಥೆಯನ್ನು ಪರಿಚಯಿಸಲಾಗಿದೆ. ಇದರಿಂದ ಭದ್ರತೆ ಹಾಗೂ ಮೇಲ್ವಿಚಾರಣೆಯನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶ ಹೊಂದಲಾಗಿದೆ.
ಸಾಂಬಾ ಜಿಲ್ಲೆಯ ಚಿಚಿ ಮಾತಾ ದೇವಸ್ಥಾನದಲ್ಲಿ ಭದ್ರತಾ ಪಡೆಗಳು ಮಾಕ್ ಡ್ರಿಲ್ ನಡೆಸಿ, ತುರ್ತು ಪರಿಸ್ಥಿತಿ ಅಥವಾ ಉಗ್ರ ದಾಳಿ ಸಂಭವಿಸಿದರೆ ಕೈಗೊಳ್ಳಬೇಕಾದ ಕ್ರಮಗಳ ಬಗ್ಗೆ ಅಭ್ಯಾಸ ನಡೆಸಿವೆ. ಸ್ಥಳಾಂತರ ಪ್ರಕ್ರಿಯೆ, ತುರ್ತು ಪ್ರತಿಕ್ರಿಯೆ ಹಾಗೂ ಜನಸಂದಣಿ ನಿರ್ವಹಣೆ ಕುರಿತ ಕಾರ್ಯತಂತ್ರವನ್ನು ಪರೀಕ್ಷಿಸಲಾಯಿತು.
ಯಾತ್ರೆಯ ಆಡಳಿತಾತ್ಮಕ ವ್ಯವಸ್ಥೆ ಸುಗಮಗೊಳಿಸಲು ವಿವಿಧ ಇಲಾಖೆಗಳ 63 ಅಧಿಕಾರಿಗಳನ್ನು ತಾತ್ಕಾಲಿಕವಾಗಿ ನಿಯೋಜಿಸಲಾಗಿದೆ. ಯಾತ್ರಿಕರ ಸೌಲಭ್ಯ, ಲಾಜಿಸ್ಟಿಕ್ಸ್ ಹಾಗೂ ವಿವಿಧ ಇಲಾಖೆಗಳ ನಡುವಿನ ಸಮನ್ವಯ ಕಾರ್ಯಗಳಲ್ಲಿ ಅವರು ನೆರವಾಗಲಿದ್ದಾರೆ.
ಯಾತ್ರೆಯ ಸಿದ್ಧತೆಗಳು ಅಂತಿಮ ಹಂತ ತಲುಪುತ್ತಿರುವ ಹಿನ್ನೆಲೆ, ಸಾರ್ವಜನಿಕರು ಯಾವುದೇ ಅನುಮಾನಾಸ್ಪದ ಚಟುವಟಿಕೆ ಅಥವಾ ವಸ್ತು ಕಂಡುಬಂದರೆ ತಕ್ಷಣವೇ ಭದ್ರತಾ ಸಂಸ್ಥೆಗಳಿಗೆ ಮಾಹಿತಿ ನೀಡುವಂತೆ ಅಧಿಕಾರಿಗಳು ಮನವಿ ಮಾಡಿದ್ದಾರೆ.
