ಕೊಚ್ಚಿ: ಖ್ಯಾತ ಮಲಯಾಳಂ ನಿರ್ದೇಶಕ ಸತ್ಯನ್ ಅಂತಿಕಾಡ್ ಅವರು ನಿರ್ದೇಶಕ ಚಿದಂಬರಂ ಅವರ ಹೊಸ ಚಿತ್ರ ‘ಬಾಲನ್: ದ ಬಾಯ್’ ಬಗ್ಗೆ ಭಾರೀ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ ವಿಶೇಷ ಬರಹದಲ್ಲಿ ಅವರು ಚಿತ್ರದ ಜೊತೆಗೆ ನಿರ್ದೇಶಕ ಚಿದಂಬರಂ ಅವರ ಪ್ರತಿಭೆಯನ್ನು ಕೊಂಡಾಡಿದ್ದಾರೆ.
ಚಿದಂಬರಂ ಅವರನ್ನು ಮೊದಲ ಬಾರಿ ಭೇಟಿಯಾದ ಕ್ಷಣವನ್ನು ನೆನಪಿಸಿಕೊಂಡ ಸತ್ಯನ್ ಅಂತಿಕಾಡ್, “2007ರಲ್ಲಿ ಬಿಡುಗಡೆಯಾದ ನನ್ನ ‘ವಿನೋದಯಾತ್ರ’ ಚಿತ್ರದ ಚಿತ್ರೀಕರಣದ ವೇಳೆ ಅವರನ್ನು ಮೊದಲ ಬಾರಿ ನೋಡಿದ್ದೆ. ಆಗ ಚಿದಂಬರಂ ಕೇವಲ ಬಾಲಕನಾಗಿದ್ದ. ತಮ್ಮ ಸಹೋದರ ಗಣಪತಿಯನ್ನು ನೋಡಲು ತಾಯಿಯೊಂದಿಗೆ ಸೆಟ್ಗೆ ಬಂದಿದ್ದನು. ಆ ಸಮಯದಲ್ಲೇ ಸಿನೆಮಾ ಬಗ್ಗೆ ಅವನ ಆಸಕ್ತಿ ಗೋಚರಿಸಿತ್ತು. ಇಂದು ಅದೇ ಬಾಲಕ ತನ್ನ ಮೂರನೇ ಚಿತ್ರದಿಂದ ಸಿನಿಪ್ರೇಮಿಗಳ ಮುಂದೆ ಅದ್ಭುತವಾಗಿ ನಿಂತಿದ್ದಾನೆ,” ಎಂದು ಬರೆದಿದ್ದಾರೆ.
‘ಸಂದೇಶಂ’ ಖ್ಯಾತಿಯ ಸತ್ಯನ್ ಅಂತಿಕಾಡ್, ‘ಬಾಲನ್: ದ ಬಾಯ್’ ಚಿತ್ರವು ತಮಗೆ ದಿಗ್ಗಜ ನಿರ್ದೇಶಕರಾದ ಭರತನ್, ಕೆ.ಜಿ. ಜಾರ್ಜ್ ಮತ್ತು ಪಿ.ಎನ್. ಮೆನನ್ ಅವರ ಸಿನಿಮಾಗಳನ್ನು ನೆನಪಿಸಿತು ಎಂದು ಹೇಳಿದ್ದಾರೆ.
“ಹೊಸ ತಲೆಮಾರಿನ ಸಿನೆಮಾ ಕುರಿತು ಹಲವಾರು ತಪ್ಪು ಕಲ್ಪನೆಗಳಿರುವ ಕಾಲ ಇದು. ಟ್ರೆಂಡ್ ಹೆಸರಿನಲ್ಲಿ ಬಂದ ಅನೇಕ ಸಿನಿಮಾಗಳು ಪ್ರೇಕ್ಷಕರ ಮನಸ್ಸಿನಲ್ಲಿ ಉಳಿಯದೆ ಮರೆಯಾಗಿವೆ. ಆದರೆ ಮನಸ್ಸನ್ನು ಸೆಳೆಯುವ ಕಥೆ ಮತ್ತು ಅದನ್ನು ಸೊಗಸಾಗಿ ತೆರೆ ಮೇಲೆ ಮೂಡಿಸುವ ಪ್ರತಿಭೆ ಇದ್ದರೆ, ಅದ್ಭುತ ಸಿನಿಮಾಗಳು ಹುಟ್ಟುತ್ತವೆ ಎಂಬುದಕ್ಕೆ ‘ಬಾಲನ್’ ಉತ್ತಮ ಉದಾಹರಣೆ. ಪ್ರತಿಯೊಂದು ಸಂಭಾಷಣೆ ಮತ್ತು ದೃಶ್ಯವನ್ನು ಚಿದಂಬರಂ ಅತ್ಯಂತ ಜಾಗರೂಕತೆಯಿಂದ ರೂಪಿಸಿದ್ದಾರೆ,” ಎಂದು ಅವರು ಪ್ರಶಂಸಿಸಿದ್ದಾರೆ.
ಚಿತ್ರದ ಯಶಸ್ಸಿನಲ್ಲಿ ಬರಹಗಾರ ಜಿತು ಮಾಧವನ್, ಛಾಯಾಗ್ರಾಹಕ ಶೈಜು ಖಾಲಿದ್ ಸೇರಿದಂತೆ ಸಂಪೂರ್ಣ ತಂಡದ ಪಾತ್ರವನ್ನು ಸ್ಮರಿಸಿದ ಅವರು, ಸಂಗೀತ, ಸಂಕಲನ ಹಾಗೂ ಕಲಾ ನಿರ್ದೇಶನದ ಸಮನ್ವಯ ಚಿತ್ರವನ್ನು ಮತ್ತಷ್ಟು ಎತ್ತರಕ್ಕೆ ಕೊಂಡೊಯ್ದಿದೆ ಎಂದಿದ್ದಾರೆ.
ನಟರ ಆಯ್ಕೆ ಕುರಿತು ಮಾತನಾಡಿದ ಸತ್ಯನ್ ಅಂತಿಕಾಡ್, “ಪ್ರತಿಯೊಂದು ಪಾತ್ರಕ್ಕೂ ಇದಕ್ಕಿಂತ ಸೂಕ್ತ ಕಲಾವಿದರನ್ನು ಕಲ್ಪಿಸಿಕೊಳ್ಳುವುದು ಕಷ್ಟ. ಈ ಪ್ರತಿಭಾವಂತರನ್ನು ಒಂದೇ ವೇದಿಕೆಗೆ ತಂದ ಗಣಪತಿಗೂ ಅಭಿನಂದನೆಗಳು ಸಲ್ಲಬೇಕು,” ಎಂದು ಹೇಳಿದ್ದಾರೆ.
ಜೀನ್ ಪಾಲ್ ಲಾಲ್ ಅಭಿನಯದ ಪವಿತ್ರನ್ ಪಾತ್ರ, ಟೋವಿನೋ ಥಾಮಸ್ ಅವರ ಸರಳ ಮತ್ತು ಸಹಜ ಅಭಿನಯ, ಫರ್ಹಾನಾ, ಅಜ್ಜಿ ಪಾತ್ರಧಾರಿ ಹಾಗೂ ಕೇವಲ ಎರಡು ದೃಶ್ಯಗಳಲ್ಲಿ ಕಾಣಿಸಿಕೊಂಡರೂ ಪ್ರಭಾವ ಬೀರಿದ ಆನಂದ್ ಏಕರ್ಷಿ ಅವರ ಅಭಿನಯವನ್ನು ಅವರು ವಿಶೇಷವಾಗಿ ಮೆಚ್ಚಿಕೊಂಡಿದ್ದಾರೆ.
ಕೊನೆಯಲ್ಲಿ, “ಬಾಲನ್ ಇಂದಿನ ಸಂಸ್ಕೃತಿಯುತ ಮಲಯಾಳಂ ಸಿನೆಮಾದ ಹೊಸ ಮುಖ. ಈ ಚಿತ್ರಕ್ಕಾಗಿ ಶ್ರಮಿಸಿದ ಪ್ರತಿಯೊಬ್ಬರಿಗೂ ನನ್ನ ಪ್ರೀತಿ ಮತ್ತು ಅಭಿನಂದನೆಗಳು,” ಎಂದು ಸತ್ಯನ್ ಅಂತಿಕಾಡ್ ತಮ್ಮ ಬರಹವನ್ನು ಮುಕ್ತಾಯಗೊಳಿಸಿದ್ದಾರೆ
