ಭಾರತದ ನಾಗರಿಕ ವಿಮಾನಯಾನ ಕ್ಷೇತ್ರಕ್ಕೆ ಮತ್ತೊಂದು ಐತಿಹಾಸಿಕ ಸೇರ್ಪಡೆಯಾಗಿ ನವಿ ಮುಂಬೈ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಇಂದು ಅಧಿಕೃತವಾಗಿ ವಾಣಿಜ್ಯ ವಿಮಾನ ಸಂಚಾರ ಆರಂಭಿಸಿದೆ. ಇದರೊಂದಿಗೆ ಮುಂಬೈ ಮಹಾನಗರ ಪ್ರದೇಶದ (MMR) ವಾಯು ಪ್ರಯಾಣ ಸಾಮರ್ಥ್ಯವು ಗಣನೀಯವಾಗಿ ವೃದ್ಧಿಯಾಗಲಿದೆ.
ವಿಮಾನ ನಿಲ್ದಾಣದ ಕಾರ್ಯಾಚರಣೆ ಆರಂಭದ ಭಾಗವಾಗಿ, ಇಂದು ಬೆಳಗ್ಗೆ 8 ಗಂಟೆಗೆ ಇಂಡಿಗೋ ವಿಮಾನ ಸಂಸ್ಥೆಯ ಮೊದಲ ವಾಣಿಜ್ಯ ವಿಮಾನ ನವಿ ಮುಂಬೈಗೆ ಯಶಸ್ವಿಯಾಗಿ ಇಳಿಯಿತು. ಬೆಂಗಳೂರು ಮೂಲದಿಂದ ಹೊರಟ 6E460 ಸಂಖ್ಯೆಯ ವಿಮಾನವೇ ನವಿ ಮುಂಬೈ ವಿಮಾನ ನಿಲ್ದಾಣಕ್ಕೆ ಬಂದ ಮೊದಲ ವಾಣಿಜ್ಯ ವಿಮಾನವಾಗಿದ್ದು, ವಿಮಾನ ನಿಲ್ದಾಣದ ಇತಿಹಾಸದಲ್ಲಿ ಹೊಸ ಅಧ್ಯಾಯವನ್ನು ಬರೆದಿದೆ.
ಈ ವಿಶೇಷ ಕ್ಷಣವನ್ನು ಸ್ಮರಣೀಯವಾಗಿಸಲು ವಿಮಾನ ಇಳಿದ ತಕ್ಷಣ ಅದಕ್ಕೆ ಸಾಂಪ್ರದಾಯಿಕ ‘ವಾಟರ್ ಕ್ಯಾನನ್ ಸಲ್ಯೂಟ್’ ನೀಡಿ ಸ್ವಾಗತಿಸಲಾಯಿತು. ಇದು ವಿಮಾನಯಾನ ಕ್ಷೇತ್ರದಲ್ಲಿ ಮೊದಲ ವಾಣಿಜ್ಯ ಹಾರಾಟವನ್ನು ಗೌರವಿಸುವ ಬಹುಕಾಲದ ಪರಂಪರೆಯಾಗಿದೆ. ನವಿ ಮುಂಬೈ ವಿಮಾನ ನಿಲ್ದಾಣದ ಆರಂಭದಿಂದ ಪ್ರಯಾಣಿಕರ ಒತ್ತಡದಲ್ಲಿರುವ ಮುಂಬೈ ವಿಮಾನ ನಿಲ್ದಾಣಕ್ಕೆ ಭಾರೀ ಪರಿಹಾರ ಸಿಗುವ ನಿರೀಕ್ಷೆಯಿದೆ.
ವಿಮಾನ ನಿಲ್ದಾಣ ಸಂಪೂರ್ಣ ಕಾರ್ಯನಿರ್ವಹಣೆಗೆ ಬಂದ ನಂತರ ದೇಶೀಯ ಹಾಗೂ ಅಂತಾರಾಷ್ಟ್ರೀಯ ಹಾರಾಟಗಳು ಹೆಚ್ಚಲಿದ್ದು, ಪಶ್ಚಿಮ ಭಾರತದ ವಿಮಾನ ಸಂಪರ್ಕಕ್ಕೆ ನವಿ ಮುಂಬೈ ಪ್ರಮುಖ ಕೇಂದ್ರವಾಗಿ ರೂಪುಗೊಳ್ಳಲಿದೆ ಎಂದು ವಿಮಾನಯಾನ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
