ನವದೆಹಲಿ: ನಕ್ಸಲ್ ಹಿಂಸೆಯಿಂದ ತೊಂದರೆಗೊಳಗಾದವರು ಹಾಗೂ ಅಂಗವೈಕಲ್ಯ ಹೊಂದಿರುವವರಿಗೆ ಪುನರ್ವಸತಿ ಕಲ್ಪಿಸಿ, ಅವರು ಗೌರವಯುತ ಜೀವನ ನಡೆಸಲು ಅಗತ್ಯ ಅವಕಾಶಗಳನ್ನು ಒದಗಿಸುವುದು ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರದ ಬದ್ಧತೆಯಾಗಿದೆ ಎಂದು ಕೇಂದ್ರ ಗೃಹ ಸಚಿವ ಅಮಿತ್ ಶಾ ಹೇಳಿದ್ದಾರೆ.
‘ಸೇವಾ ಸಂಕಲ್ಪ ಅಭಿಯಾನ’ದಡಿ ಅಂಗವೈಕಲ್ಯ ಹೊಂದಿರುವವರಿಗೆ, ಅದರಲ್ಲೂ ನಕ್ಸಲ್ ಹಿಂಸೆಯಿಂದ ಅಂಗವೈಕಲ್ಯಕ್ಕೀಡಾದವರಿಗೆ ಸಹಾಯಕ ಸಾಧನಗಳನ್ನು ವಿತರಿಸುವ ಕಾರ್ಯಕ್ರಮವನ್ನು ಅವರು ವಿಡಿಯೊ ಸಂವಾದದ ಮೂಲಕ ಉದ್ದೇಶಿಸಿ ಮಾತನಾಡಿದರು.
ದಶಕಗಳ ಕಾಲ ನಕ್ಸಲ್ ಚಟುವಟಿಕೆಗಳು ಬಸ್ತರ್‌ನ ಬಡ ಆದಿವಾಸಿ ಸಮುದಾಯಗಳಿಗೆ ಅಪಾರ ಸಂಕಷ್ಟ ತಂದೊಡ್ಡಿವೆ ಎಂದು ಅಮಿತ್ ಶಾ ಹೇಳಿದರು. ರಾಜಕೀಯ ಉದ್ದೇಶಗಳಿಗಾಗಿ ಸುಧಾರಿತ ಸ್ಫೋಟಕ ಸಾಧನಗಳನ್ನು (ಐಇಡಿ) ಬಳಸಿ ಅಮಾಯಕ ನಾಗರಿಕರನ್ನು ಅಂಗವೈಕಲ್ಯಕ್ಕೆ ತಳ್ಳುವುದು ಮಾನವ ಹಕ್ಕುಗಳ ಗಂಭೀರ ಉಲ್ಲಂಘನೆಯಾಗಿದೆ ಎಂದು ಅವರು ಅಭಿಪ್ರಾಯಪಟ್ಟರು.
ಈ ವರ್ಷದ ಮಾರ್ಚ್ 31ರೊಳಗೆ ದೇಶಾದ್ಯಂತ ನಕ್ಸಲಿಸಂ ನಿರ್ಮೂಲನೆ ಮಾಡುವ ಗುರಿಗೆ ಕೇಂದ್ರ ಸರ್ಕಾರ ಬದ್ಧವಾಗಿತ್ತು ಎಂದು ತಿಳಿಸಿದ ಅವರು, ನಕ್ಸಲ್ ಚಟುವಟಿಕೆಗಳು ಕೊನೆಗೊಂಡ ಬಳಿಕವೂ ಅವುಗಳ ಯಾವುದೇ ಕುರುಹು ಉಳಿಯದಂತೆ ನೋಡಿಕೊಳ್ಳಬೇಕು ಎಂದರು. ಬಸ್ತರ್ ಮತ್ತೆ ಅಭಿವೃದ್ಧಿ, ಚೈತನ್ಯ ಮತ್ತು ಸಮೃದ್ಧಿಯ ಹಾದಿಯಲ್ಲಿ ಸಾಗಬೇಕು ಎಂಬ ಆಶಯವನ್ನೂ ವ್ಯಕ್ತಪಡಿಸಿದರು.
ಬಸ್ತರ್ ಪ್ರದೇಶದ ಪರಿವರ್ತನೆಗಾಗಿ ಛತ್ತೀಸ್‌ಗಢ ಸರ್ಕಾರ ಹಲವು ಕಾರ್ಯಕ್ರಮಗಳನ್ನು ಜಾರಿಗೆ ತಂದಿದೆ ಎಂದು ಅಮಿತ್ ಶಾ ತಿಳಿಸಿದರು. ಬಸ್ತರ್ ಒಲಿಂಪಿಕ್ಸ್, ಬಸ್ತರ್ ಪಾಂಡುಮ್, ‘ನಿಯದ್ ನೆಲ್ಲನಾರ್’ ಯೋಜನೆ ಮತ್ತು ಮುಖ್ಯಮಂತ್ರಿ ಸಾಮೂಹಿಕ ಬಸ್ ಯೋಜನೆ ಇವುಗಳಲ್ಲಿ ಪ್ರಮುಖವಾಗಿವೆ ಎಂದು ಹೇಳಿದರು.
ಒಂದು ಕಾಲದಲ್ಲಿ ಗುಂಡಿನ ಸದ್ದು ಮತ್ತು ಬಾಂಬ್ ಸ್ಫೋಟಗಳಿಂದ ಭಯದ ವಾತಾವರಣ ನಿರ್ಮಾಣವಾಗಿದ್ದ ಬಸ್ತರ್‌ನಲ್ಲಿ ಈಗ ಸಾವಿರಾರು ಯುವಕರು ಕ್ರೀಡಾಕೂಟಗಳಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ. ಜೊತೆಗೆ, ತಮ್ಮ ಸಾಂಪ್ರದಾಯಿಕ ಕಲೆ, ಸಂಸ್ಕೃತಿ ಮತ್ತು ಪರಂಪರೆಯನ್ನು ಉಳಿಸಿಕೊಂಡು ಮುನ್ನಡೆಯುತ್ತಿದ್ದಾರೆ ಎಂದು ಅವರು ವಿವರಿಸಿದರು.
ನಕ್ಸಲ್ ಹಿಂಸೆಯಿಂದ ಸಂತ್ರಸ್ತರಾದವರಿಗೆ ನೆರವು ಒದಗಿಸುವುದು, ಅಂಗವೈಕಲ್ಯ ಹೊಂದಿರುವವರ ಪುನರ್ವಸತಿಗೆ ಬೆಂಬಲ ನೀಡುವುದು ಹಾಗೂ ಬಸ್ತರ್‌ನಲ್ಲಿ ಶಾಂತಿ ಮತ್ತು ಅಭಿವೃದ್ಧಿಯನ್ನು ಬಲಪಡಿಸುವುದು ಸರ್ಕಾರದ ಆದ್ಯತೆಯಾಗಿದೆ ಎಂಬ ಸಂದೇಶವನ್ನು ಈ ಕಾರ್ಯಕ್ರಮದ ಮೂಲಕ ನೀಡಲಾಗಿದೆ.
