ನವದೆಹಲಿ: ಭಾರತದ ಜೈವಿಕ ಸಂಪನ್ಮೂಲಗಳ ಬಳಕೆಗೆ ಸಂಬಂಧಿಸಿದ ಲಾಭ ಹಂಚಿಕೆ ವ್ಯವಸ್ಥೆಯಡಿ ರಾಷ್ಟ್ರೀಯ ಜೀವವೈವಿಧ್ಯ ಪ್ರಾಧಿಕಾರವು (NBA) 2026ರ ಏಪ್ರಿಲ್‌ನಿಂದ ಸೆಪ್ಟೆಂಬರ್‌ವರೆಗೆ ₹9.68 ಕೋಟಿ ಸಂಗ್ರಹಿಸಿದೆ.
ಕೇಂದ್ರ ಪರಿಸರ, ಅರಣ್ಯ ಮತ್ತು ಹವಾಮಾನ ಬದಲಾವಣೆ ಸಚಿವಾಲಯದ ಮಾಹಿತಿಯ ಪ್ರಕಾರ, ಒಟ್ಟು ಮೊತ್ತದಲ್ಲಿ ವಿವಿಧ ವಲಯಗಳು ಜೈವಿಕ ಸಂಪನ್ಮೂಲಗಳನ್ನು ಬಳಸಿಕೊಂಡಿದ್ದಕ್ಕಾಗಿ ₹9.56 ಕೋಟಿ ಪಾವತಿಸಿವೆ. ಈ ಪೈಕಿ ಕೃಷಿ ಬೀಜ ವಲಯವು ಅತಿ ಹೆಚ್ಚು ₹7.16 ಕೋಟಿ ಕೊಡುಗೆ ನೀಡಿದೆ. ಆಹಾರ ಮತ್ತು ಪಾನೀಯ ವಲಯದಿಂದ ₹1.59 ಕೋಟಿ ಹಾಗೂ ಪಶುಸಂಗೋಪನಾ ವಲಯದಿಂದ ₹62.01 ಲಕ್ಷ ಸಂಗ್ರಹವಾಗಿದೆ.
2008ರಿಂದ ಈವರೆಗೆ ರಾಷ್ಟ್ರೀಯ ಜೀವವೈವಿಧ್ಯ ಪ್ರಾಧಿಕಾರವು ಒಟ್ಟು ಸುಮಾರು ₹278 ಕೋಟಿ ಸಂಗ್ರಹಿಸಿದೆ ಎಂದು ಸಚಿವಾಲಯ ತಿಳಿಸಿದೆ. ಈ ಪೈಕಿ ₹200 ಕೋಟಿಗೂ ಅಧಿಕ ಮೊತ್ತವನ್ನು ಜೀವವೈವಿಧ್ಯ ಸಂರಕ್ಷಣೆ ಹಾಗೂ ಅದರ ಪ್ರಯೋಜನಗಳನ್ನು ವಿವಿಧ ಫಲಾನುಭವಿಗಳಿಗೆ ತಲುಪಿಸಲು ವಿತರಿಸಲಾಗಿದೆ.
ಈ ಪ್ರಯೋಜನಗಳು ದೇಶಾದ್ಯಂತದ ಸ್ಥಳೀಯ ಸಮುದಾಯಗಳು, ರೈತರು, ವಿವಿಧ ಸಂಸ್ಥೆಗಳು ಮತ್ತು ಇತರ ಅರ್ಹ ಫಲಾನುಭವಿಗಳನ್ನು ತಲುಪಿವೆ. ಜೈವಿಕ ಸಂಪನ್ಮೂಲಗಳ ಬಳಕೆಯಿಂದ ದೊರೆಯುವ ಆರ್ಥಿಕ ಪ್ರಯೋಜನಗಳನ್ನು ಹಂಚಿಕೊಳ್ಳುವ ಮೂಲಕ ಜೀವವೈವಿಧ್ಯ ಸಂರಕ್ಷಣೆಗೆ ಉತ್ತೇಜನ ನೀಡುವುದು ಈ ವ್ಯವಸ್ಥೆಯ ಪ್ರಮುಖ ಉದ್ದೇಶವಾಗಿದೆ.
