ನವದೆಹಲಿ: ಬಾಂಗ್ಲಾದೇಶದ ಮೂಲದ ಅಡಕೆ ಎಂದು ಸುಳ್ಳು ಘೋಷಿಸಿ, ದಕ್ಷಿಣ ಏಷ್ಯಾ ಮುಕ್ತ ವ್ಯಾಪಾರ ಪ್ರದೇಶ (SAFTA) ಒಪ್ಪಂದದಡಿ ಲಭ್ಯವಿರುವ ಸುಂಕ ವಿನಾಯಿತಿಯನ್ನು ಅಕ್ರಮವಾಗಿ ಪಡೆಯುತ್ತಿದ್ದ ಭಾರೀ ಜಾಲವನ್ನು ಕಂದಾಯ ಗುಪ್ತಚರ ನಿರ್ದೇಶನಾಲಯ (DRI) ಭೇದಿಸಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಇದುವರೆಗೆ 9 ಮಂದಿಯನ್ನು ಬಂಧಿಸಲಾಗಿದೆ.
ಹಣಕಾಸು ಸಚಿವಾಲಯದ ಮಾಹಿತಿ ಪ್ರಕಾರ, ಈ ಅಕ್ರಮ ಆಮದು ಜಾಲದಿಂದ ಸರ್ಕಾರಕ್ಕೆ ₹2,500 ಕೋಟಿಗೂ ಅಧಿಕ ಆದಾಯ ನಷ್ಟವಾಗಿರುವ ಸಾಧ್ಯತೆ ಇದೆ.
ಭಾರತಕ್ಕೆ ಅಡಕೆ ಆಮದು ಮಾಡಿಕೊಳ್ಳುವಾಗ ಸಾಮಾನ್ಯವಾಗಿ ಶೇ.100 ಮೂಲ ಕಸ್ಟಮ್ಸ್ ಸುಂಕ ವಿಧಿಸಲಾಗುತ್ತದೆ. ಆದರೆ SAFTA ಒಪ್ಪಂದದಡಿ ಅರ್ಹತೆ ಹೊಂದಿರುವ ಆಮದುಗಳಿಗೆ ಕಸ್ಟಮ್ಸ್ ಸುಂಕದಿಂದ ವಿನಾಯಿತಿ ದೊರೆಯುತ್ತದೆ. ಬಾಂಗ್ಲಾದೇಶ ಮೂಲದ ಅಡಕೆಗೆ ನಿಗದಿತ ಮೂಲದ ನಿಯಮಗಳು (Rules of Origin) ಪೂರೈಸಿದರೆ ಈ ವಿನಾಯಿತಿ ಅನ್ವಯವಾಗುತ್ತದೆ.
ಆದರೆ, ಡಿಆರ್ಐ ತನಿಖೆಯಲ್ಲಿ ಕೆಲವು ಸಿಂಡಿಕೇಟ್ಗಳು ಈ ಸೌಲಭ್ಯವನ್ನು ದೊಡ್ಡ ಪ್ರಮಾಣದಲ್ಲಿ ದುರ್ಬಳಕೆ ಮಾಡಿರುವುದು ಬೆಳಕಿಗೆ ಬಂದಿದೆ. ಇಂಡೋನೇಷ್ಯಾ, ಥಾಯ್ಲೆಂಡ್, ಮಲೇಷ್ಯಾ ಸೇರಿದಂತೆ ವಿವಿಧ ಆಗ್ನೇಯ ಏಷ್ಯಾ ರಾಷ್ಟ್ರಗಳಿಂದ ಅಡಕೆಯನ್ನು ಆಮದು ಮಾಡಿಕೊಂಡು, ಅದರ ಮೂಲ ದೇಶವನ್ನು ಬಾಂಗ್ಲಾದೇಶ ಎಂದು ತಪ್ಪಾಗಿ ಘೋಷಿಸಿ ಭಾರತಕ್ಕೆ ತರಲಾಗುತ್ತಿತ್ತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಗುಪ್ತಚರ ಮಾಹಿತಿಯ ಆಧಾರದ ಮೇಲೆ ಡಿಆರ್ಐ ಅಧಿಕಾರಿಗಳು ಕೋಲ್ಕತ್ತಾ ಮತ್ತು ವಿಶಾಖಪಟ್ಟಣದಲ್ಲಿರುವ ಆಮದುದಾರರು, ಕಸ್ಟಮ್ಸ್ ಬ್ರೋಕರ್ಗಳು ಹಾಗೂ ಆಮದು-ರಫ್ತು ಕೋಡ್ (IEC) ಹೊಂದಿರುವವರೊಂದಿಗೆ ಸಂಪರ್ಕ ಹೊಂದಿದ್ದ ಹಲವು ಸ್ಥಳಗಳ ಮೇಲೆ ಏಕಕಾಲದಲ್ಲಿ ಶೋಧ ನಡೆಸಿದರು.
ಶೋಧದ ವೇಳೆ ಆಗ್ನೇಯ ಏಷ್ಯಾ ದೇಶಗಳಿಂದ ಅಡಕೆ ಆಮದು ಮಾಡಿರುವುದನ್ನು ದೃಢಪಡಿಸುವ ಹಲವು ಮಹತ್ವದ ದಾಖಲೆಗಳು ಹಾಗೂ ಇತರೆ ಸಾಕ್ಷ್ಯಗಳು ಪತ್ತೆಯಾಗಿವೆ. ಅಲ್ಲದೆ, ಅಕ್ರಮವಾಗಿ ಆಮದು ಮಾಡಲಾದ ಸರಕುಗಳ ಮಾರಾಟದಿಂದ ಬಂದ ಹಣವೆಂದು ಶಂಕಿಸಲಾಗಿರುವ ಸುಮಾರು ₹75 ಲಕ್ಷ ನಗದನ್ನೂ ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ.
ಇದರ ಜೊತೆಗೆ, ಸುಮಾರು 160 ಮೆಟ್ರಿಕ್ ಟನ್ ಅಡಕೆಯನ್ನು ಒಳಗೊಂಡಿದ್ದ ಸಾಗಣಿಕೆಯನ್ನು ಮಾರ್ಗಮಧ್ಯೆ ತಡೆದು ವಶಪಡಿಸಿಕೊಳ್ಳಲಾಗಿದೆ.
ಪ್ರಕರಣದ ತನಿಖೆ ಮುಂದುವರಿದಿದ್ದು, ಈ ಅಕ್ರಮ ಜಾಲದಲ್ಲಿ ಭಾಗಿಯಾಗಿರುವ ಇತರರನ್ನು ಪತ್ತೆಹಚ್ಚುವ ಜೊತೆಗೆ ಸರ್ಕಾರಕ್ಕೆ ಉಂಟಾಗಿರುವ ಒಟ್ಟು ಆದಾಯ ನಷ್ಟದ ಸಂಪೂರ್ಣ ಪ್ರಮಾಣವನ್ನು ನಿರ್ಧರಿಸಲು ಡಿಆರ್ಐ ಅಧಿಕಾರಿಗಳು ಮುಂದಾಗಿದ್ದಾರೆ.
