ನವದೆಹಲಿ: ದೇಶದ ಸಾಂಪ್ರದಾಯಿಕ ಕಲೆ ಮತ್ತು ಕರಕುಶಲ ಕ್ಷೇತ್ರಕ್ಕೆ ಮಹತ್ವ ನೀಡುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರ ಮಹತ್ವದ ಹೆಜ್ಜೆ ಇಟ್ಟಿದೆ. ಪಿಎಂ ವಿಶ್ವಕರ್ಮ ಯೋಜನೆಯ ದೆಹಲಿ–ಎನ್ಸಿಆರ್ ಪ್ರದೇಶದ 100 ಫಲಾನುಭವಿಗಳನ್ನು ‘ವಿಶೇಷ ಅತಿಥಿಗಳಾಗಿ’ ಕೆಂಪುಕೋಟೆಯಲ್ಲಿ ನಡೆಯಲಿರುವ 80ನೇ ಸ್ವಾತಂತ್ರ್ಯೋತ್ಸವ ಸಮಾರಂಭ ವೀಕ್ಷಿಸಲು ಆಹ್ವಾನಿಸಲಾಗಿದೆ.
ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಉದ್ಯಮಗಳ (MSME) ಸಚಿವಾಲಯ ಈ ಕುರಿತು ಮಾಹಿತಿ ನೀಡಿದ್ದು, ಆಹ್ವಾನಿತ ಫಲಾನುಭವಿಗಳಿಗೆ ಗೌರವದ ಸಂಕೇತವಾಗಿ ಸ್ಮರಣಿಕೆಗಳನ್ನು ನೀಡಿ ಸನ್ಮಾನಿಸಲಾಗುತ್ತದೆ. ಬಳಿಕ ಇಂದು ಎಂಎಸ್ಎಂಇ ಸಚಿವಾಲಯದ ಅಧಿಕಾರಿಗಳೊಂದಿಗೆ ಸಂವಾದ ಕಾರ್ಯಕ್ರಮವೂ ನಡೆಯಲಿದೆ.
18 ಸಾಂಪ್ರದಾಯಿಕ ವೃತ್ತಿಗಳ ಪ್ರತಿನಿಧಿಗಳಿಗೆ ಗೌರವ
ಪಿಎಂ ವಿಶ್ವಕರ್ಮ ಯೋಜನೆಯಡಿ ಒಳಗೊಂಡಿರುವ 18 ಸಾಂಪ್ರದಾಯಿಕ ವೃತ್ತಿಗಳ ಫಲಾನುಭವಿಗಳು ಈ ವಿಶೇಷ ಆಹ್ವಾನಿತರಲ್ಲಿ ಸೇರಿದ್ದಾರೆ. ದರ್ಜಿಗಳು, ಬಡಗಿಗಳು, ಚಿನ್ನದ ಕೆಲಸಗಾರರು, ಕಮ್ಮಾರರು, ಬೀಗ ತಯಾರಕರು ಸೇರಿದಂತೆ ವಿವಿಧ ವೃತ್ತಿಗಳ ಕುಶಲಕರ್ಮಿಗಳು ಸಮಾರಂಭದಲ್ಲಿ ಭಾಗವಹಿಸಲಿದ್ದಾರೆ.
ಆಹ್ವಾನಿತ ಫಲಾನುಭವಿಗಳು ಯೋಜನೆಯಡಿ ಈಗಾಗಲೇ ವಿವಿಧ ಸೌಲಭ್ಯಗಳನ್ನು ಪಡೆದಿದ್ದಾರೆ. ನೋಂದಣಿ, ಮೂಲ ಕೌಶಲ್ಯ ತರಬೇತಿ, ಉಪಕರಣಗಳ ಕಿಟ್ ಸೇರಿದಂತೆ ಯೋಜನೆಯಡಿ ಲಭ್ಯವಿರುವ ವಿವಿಧ ನೆರವುಗಳನ್ನು ಅವರು ಪಡೆದುಕೊಂಡಿದ್ದಾರೆ.
ಈ ವಿಶೇಷ ಅತಿಥಿಗಳಲ್ಲಿ ವಿವಿಧ ಸಾಂಪ್ರದಾಯಿಕ ವೃತ್ತಿಗಳಲ್ಲಿ ತೊಡಗಿಸಿಕೊಂಡಿರುವ ಮಹಿಳಾ ಕುಶಲಕರ್ಮಿಗಳೂ ಸೇರಿದ್ದಾರೆ.
ಭಾರತದ ಸಾಂಸ್ಕೃತಿಕ ಪರಂಪರೆಗೆ ಕೊಡುಗೆ ನೀಡುವವರಿಗೆ ಗೌರವ
ಸಾಂಪ್ರದಾಯಿಕ ಕುಶಲಕರ್ಮಿಗಳು ಮತ್ತು ಕರಕುಶಲಗಾರರು ಭಾರತದ ಶ್ರೀಮಂತ ಸಾಂಸ್ಕೃತಿಕ ಪರಂಪರೆಯನ್ನು ಉಳಿಸಿ ಬೆಳೆಸುವಲ್ಲಿ ನೀಡುತ್ತಿರುವ ಅಮೂಲ್ಯ ಕೊಡುಗೆಯ ಗುರುತಿಸುವಿಕೆಯ ಭಾಗವಾಗಿ ಈ ಆಹ್ವಾನ ನೀಡಲಾಗಿದೆ ಎಂದು ಸಚಿವಾಲಯ ತಿಳಿಸಿದೆ.
ಕೆಂಪುಕೋಟೆಯಲ್ಲಿ ನಡೆಯಲಿರುವ 80ನೇ ಸ್ವಾತಂತ್ರ್ಯೋತ್ಸವದ ವೈಭವವನ್ನು ನೇರವಾಗಿ ವೀಕ್ಷಿಸುವುದರ ಜೊತೆಗೆ, ಈ ಐತಿಹಾಸಿಕ ರಾಷ್ಟ್ರೀಯ ಆಚರಣೆಯ ಭಾಗವಾಗುವ ಅಪರೂಪದ ಅವಕಾಶವನ್ನು ಪಿಎಂ ವಿಶ್ವಕರ್ಮ ಫಲಾನುಭವಿಗಳು ಪಡೆಯಲಿದ್ದಾರೆ.
