ಚೆನ್ನೈ: ದಕ್ಷಿಣ ಭಾರತದ ಖ್ಯಾತ ಹಿನ್ನೆಲೆ ಗಾಯಕಿ ಎಸ್. ಜಾನಕಿ ಅವರ ನಿಧನದ ಕೆಲ ದಿನಗಳ ಬಳಿಕ, ಅವರ ಮೊಮ್ಮಗಳು ಅಪ್ಸರಾ ಭಾವುಕ ಸಂದೇಶ ಹಂಚಿಕೊಂಡಿದ್ದಾರೆ. ಅಜ್ಜಿಯ ಅಗಲಿಕೆಯ ನೋವಿನ ಜೊತೆಗೆ, 2023ರಲ್ಲಿ ನಿಧನರಾದ ತಮ್ಮ ಅಕ್ಕ ವರ್ಷಾ ಅವರನ್ನು ಸ್ಮರಿಸಿರುವ ಅವರು, ಕುಟುಂಬದ ಬಗ್ಗೆ ಹರಿದಾಡುತ್ತಿರುವ ವದಂತಿಗಳಿಗೂ ತಿರುಗೇಟು ನೀಡಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿರುವ ಅಪ್ಸರಾ, “ಈ ಜಗತ್ತಿನಲ್ಲಿ ನನ್ನ ಅಜ್ಜಿ ಅತ್ಯಂತ ಹೆಚ್ಚು ಪ್ರೀತಿಸುತ್ತಿದ್ದ ವ್ಯಕ್ತಿ ನನ್ನ ಅಕ್ಕ ವರ್ಷಾ. ಅವರಿಬ್ಬರ ನಡುವಿನ ಬಾಂಧವ್ಯವನ್ನು ಪದಗಳಲ್ಲಿ ವರ್ಣಿಸಲು ಸಾಧ್ಯವಿಲ್ಲ. ಇಂದು ಅಜ್ಜಿ ನನಗೆ ನೀಡಿದ್ದ ಜವಾಬ್ದಾರಿಗಳನ್ನು ನಾನು ನಿರ್ವಹಿಸುತ್ತಿದ್ದೇನೆ. ಆದರೆ ಇಂದು ಇಲ್ಲಿ ನಿಲ್ಲಬೇಕಾಗಿದ್ದವರು ನಾನು ಅಲ್ಲ, ವರ್ಷಾ” ಎಂದು ಭಾವುಕರಾಗಿದ್ದಾರೆ.
2023ರ ಆಗಸ್ಟ್ನಲ್ಲಿ ವರ್ಷಾ ಅವರನ್ನು ಕಳೆದುಕೊಂಡ ಬಳಿಕ ನಮ್ಮ ಕುಟುಂಬ ಇನ್ನೂ ಆ ನೋವಿನಿಂದ ಹೊರಬಂದಿಲ್ಲ. ದುಃಖ ಎಂದಿಗೂ ಸಂಪೂರ್ಣವಾಗಿ ಮಾಯವಾಗುವುದಿಲ್ಲ. ಅದು ಜೀವನಪೂರ್ತಿ ನಮ್ಮೊಂದಿಗೆ ಸಾಗುವ ಭಾರವಾಗಿರುತ್ತದೆ. ಈಗ ನನಗೆ ಸಮಾಧಾನ ನೀಡುತ್ತಿರುವ ಏಕೈಕ ವಿಚಾರವೆಂದರೆ, ಅಜ್ಜಿ ಮತ್ತು ವರ್ಷಾ ಮತ್ತೆ ಒಂದಾಗಿದ್ದಾರೆ ಎಂಬ ನಂಬಿಕೆ ಎಂದು ಅವರು ಬರೆದಿದ್ದಾರೆ.
ಎಸ್. ಜಾನಕಿ ಅವರ ಅಂತ್ಯಕ್ರಿಯೆಯ ವೇಳೆ ಸಾರ್ವಜನಿಕವಾಗಿ ಕಣ್ಣೀರು ಹಾಕಲಿಲ್ಲ ಎಂಬ ಟೀಕೆಗಳಿಗೆ ಪ್ರತಿಕ್ರಿಯಿಸಿದ ಅಪ್ಸರಾ, “ನನ್ನ ಕಣ್ಣೀರಿನ ಆಧಾರದ ಮೇಲೆ ನನ್ನ ಪ್ರೀತಿಯನ್ನು ಅಳೆಯಬೇಡಿ. ಸಾವನ್ನು ಆಧ್ಯಾತ್ಮಿಕ ದೃಷ್ಟಿಯಿಂದ ಅರ್ಥಮಾಡಿಕೊಳ್ಳುವುದನ್ನು ನಮಗೆ ಕಲಿಸಿದವರು ನನ್ನ ಅಜ್ಜಿಯೇ. ಜೀವನ ಕೊನೆಗೊಳ್ಳಬಹುದು, ಆದರೆ ಪ್ರೀತಿ ಎಂದಿಗೂ ಅಂತ್ಯವಾಗುವುದಿಲ್ಲ ಎಂಬುದು ಅವರ ನಂಬಿಕೆಯಾಗಿತ್ತು” ಎಂದು ಹೇಳಿದ್ದಾರೆ.
“ಪ್ರತಿಯೊಬ್ಬರೂ ತಮ್ಮ ದುಃಖವನ್ನು ಒಂದೇ ರೀತಿಯಲ್ಲಿ ವ್ಯಕ್ತಪಡಿಸುವುದಿಲ್ಲ. ಕೆಲವೊಮ್ಮೆ ದುಃಖವು ಮೌನವಾಗಿರುತ್ತದೆ. ಅದು ಅತ್ಯಂತ ವೈಯಕ್ತಿಕ ಅನುಭವವಾಗಿದ್ದು, ಮನಸ್ಸಿನೊಳಗೆ ಮಾತ್ರ ಬದುಕುತ್ತದೆ” ಎಂದು ಅವರು ತಿಳಿಸಿದ್ದಾರೆ.
ಇದೇ ವೇಳೆ, ಎಸ್. ಜಾನಕಿ ಅವರ ನಿಧನದ ಬಳಿಕ ತಮ್ಮ ಕುಟುಂಬದ ಬಗ್ಗೆ ಆಧಾರರಹಿತ ವದಂತಿಗಳು ಮತ್ತು ಊಹಾಪೋಹಗಳು ಹರಿದಾಡುತ್ತಿರುವುದಕ್ಕೆ ಅಪ್ಸರಾ ಬೇಸರ ವ್ಯಕ್ತಪಡಿಸಿದ್ದಾರೆ.
“ನಮ್ಮ ಕುಟುಂಬದ ಬಗ್ಗೆ ಯಾವುದೇ ಮಾಹಿತಿ ಇಲ್ಲದವರು ತಮ್ಮದೇ ಕಥೆಗಳನ್ನು ಸೃಷ್ಟಿಸಿ ಹರಡುವುದು ನೋವುಂಟು ಮಾಡುತ್ತದೆ. ನನ್ನ ಅಜ್ಜಿ ಅತ್ಯಂತ ಸೌಮ್ಯ, ಸರಳ ಮತ್ತು ವಿನಮ್ರ ವ್ಯಕ್ತಿಯಾಗಿದ್ದರು. ಎಲ್ಲರಲ್ಲೂ ಒಳ್ಳೆಯದನ್ನೇ ಕಾಣುವ ಗುಣ ಅವರದ್ದಾಗಿತ್ತು. ವರ್ಷಾ ಕೂಡ ಅಜ್ಜಿಯಂತೆಯೇ ಇದ್ದಳು. ಅವರಿಬ್ಬರೂ ಮತ್ತೆ ಒಂದಾಗಿದ್ದಾರೆ ಎಂಬ ಭಾವನೆಯೇ ನನಗೆ ಮುಂದೆ ಸಾಗುವ ಶಕ್ತಿ ನೀಡುತ್ತಿದೆ” ಎಂದು ಅಪ್ಸರಾ ತಮ್ಮ ಭಾವನೆಗಳನ್ನು ಹಂಚಿಕೊಂಡಿದ್ದಾರೆ.
