ಮುಂಬೈ: ನಟ ದಿಲ್ಜಿತ್ ದೋಸಾಂಜ್ ಅಭಿನಯದ ಹಾಗೂ ಹನಿ ತ್ರೇಹನ್ ನಿರ್ದೇಶನದ ವಿವಾದಾತ್ಮಕ ಸಿನಿಮಾ ‘ಸಟ್ಲುಜ್’ (ಹಿಂದಿನ ಹೆಸರು Punjab 95) ಬಿಡುಗಡೆಯಾದ ಕೇವಲ ಎರಡು ದಿನಗಳಲ್ಲೇ ZEE5 ಒಟಿಟಿ ವೇದಿಕೆಯಿಂದ ತೆರವುಗೊಳಿಸಲಾಗಿದೆ.
ಸುಮಾರು ಮೂರು ವರ್ಷಗಳ ಕಾಲ ಕೇಂದ್ರ ಚಲನಚಿತ್ರ ಪ್ರಮಾಣೀಕರಣ ಮಂಡಳಿ (CBFC) ಅನುಮತಿಗಾಗಿ ಸಿಲುಕಿಕೊಂಡಿದ್ದ ಈ ಚಿತ್ರವು ಶುಕ್ರವಾರ ರಾತ್ರಿ ಯಾವುದೇ ಪ್ರಚಾರವಿಲ್ಲದೆ ZEE5ನಲ್ಲಿ ಬಿಡುಗಡೆಯಾಗಿತ್ತು. ಚಿತ್ರವನ್ನು ಕಟ್ ಇಲ್ಲದ (Uncut) ಆವೃತ್ತಿಯಲ್ಲಿ ಬಿಡುಗಡೆ ಮಾಡಲಾಗಿದೆ ಎಂದು ನಿರ್ಮಾಪಕರು ತಿಳಿಸಿದ್ದರು.
ZEE5 ಅಧಿಕೃತ ಹೇಳಿಕೆ
ಚಿತ್ರಕ್ಕೆ ದೊರೆತ ಪ್ರೇಕ್ಷಕರ ಪ್ರತಿಕ್ರಿಯೆಗೆ ಧನ್ಯವಾದ ಸಲ್ಲಿಸಿರುವ ZEE5, ಸಾಮಾಜಿಕ ಜಾಲತಾಣದಲ್ಲಿ ಪ್ರಕಟಣೆ ಹೊರಡಿಸಿದೆ.
“ಸಟ್ಲುಜ್ ಚಿತ್ರಕ್ಕೆ ದೊರೆತ ಪ್ರೀತಿ ಮತ್ತು ಬೆಂಬಲಕ್ಕೆ ನಾವು ಹೃತ್ಪೂರ್ವಕವಾಗಿ ಕೃತಜ್ಞರಾಗಿದ್ದೇವೆ. ಉತ್ತಮ ಕಥೆಗಳನ್ನು ಪ್ರೇಕ್ಷಕರಿಗೆ ತಲುಪಿಸುವ ಬದ್ಧತೆ ನಮ್ಮದು,” ಎಂದು ಪ್ರಕಟಣೆಯಲ್ಲಿ ತಿಳಿಸಿದೆ.
ಆದರೆ, “ಇತ್ತೀಚಿನ ಬೆಳವಣಿಗೆಗಳ ಹಿನ್ನೆಲೆಯಲ್ಲಿ ‘ಸಟ್ಲುಜ್’ ಸಿನಿಮಾ ಭಾರತದಲ್ಲಿ ಮುಂದಿನ ಸೂಚನೆ ಬರುವವರೆಗೆ ಲಭ್ಯವಿರುವುದಿಲ್ಲ. ಅಗತ್ಯ ಕಾನೂನು ಪ್ರಕ್ರಿಯೆ ಅನುಸರಿಸಿ ಶೀಘ್ರದಲ್ಲೇ ಚಿತ್ರವನ್ನು ಮತ್ತೆ ಪ್ರೇಕ್ಷಕರ ಮುಂದೆ ತರಲು ಪ್ರಯತ್ನಿಸುತ್ತೇವೆ,” ಎಂದು ZEE5 ಸ್ಪಷ್ಟಪಡಿಸಿದೆ.
ಚಿತ್ರವನ್ನು ಏಕೆ ಹಿಂಪಡೆಯಲಾಗಿದೆ ಎಂಬುದರ ಕುರಿತು ಸಂಸ್ಥೆ ಯಾವುದೇ ನಿರ್ದಿಷ್ಟ ಕಾರಣವನ್ನು ಬಹಿರಂಗಪಡಿಸಿಲ್ಲ.
‘ಪಂಜಾಬ್ 95’ದಿಂದ ‘ಸಟ್ಲುಜ್’ವರೆಗೆ
ಈ ಚಿತ್ರವು ಮಾನವ ಹಕ್ಕುಗಳ ಹೋರಾಟಗಾರ ಜಸ್ವಂತ್ ಸಿಂಗ್ ಖಲ್ರಾ ಅವರ ಜೀವನವನ್ನು ಆಧರಿಸಿದೆ. ಪಂಜಾಬ್ ಉಗ್ರವಾದದ ಅವಧಿಯಲ್ಲಿ ನಡೆದಿದ್ದ ಎನ್ನಲಾದ ಸಾವಿರಾರು ಕಾನೂನುಬಾಹಿರ ಹತ್ಯೆಗಳ ವಿಚಾರವನ್ನು ಬಹಿರಂಗಪಡಿಸಿದ್ದ ಖಲ್ರಾ ಅವರ ಹೋರಾಟವನ್ನು ಚಿತ್ರದಲ್ಲಿ ತೆರೆದಿಡಲಾಗಿದೆ.
ಚಿತ್ರದಲ್ಲಿ ದಿಲ್ಜಿತ್ ದೋಸಾಂಜ್, ಅರ್ಜುನ್ ರಾಂಪಾಲ್, ಸುವಿಂದರ್ ವಿಕ್ಕಿ ಸೇರಿದಂತೆ ಹಲವರು ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.
120ಕ್ಕೂ ಹೆಚ್ಚು ಕಟ್ಗಳ ವಿವಾದ
ಈ ಹಿಂದೆ ಚಿತ್ರಕ್ಕೆ ಸುಮಾರು 120 ಕಟ್ಗಳನ್ನು ವಿಧಿಸುವಂತೆ CBFC ಸೂಚಿಸಿತ್ತು ಎಂಬ ವರದಿಗಳು ಹರಿದಾಡಿದ್ದವು. ರಾಜ್ಯಗಳು, ನಗರಗಳು ಹಾಗೂ ಕೆಲವು ವ್ಯಕ್ತಿಗಳ ಹೆಸರುಗಳನ್ನು ತೆಗೆದುಹಾಕುವಂತೆ ಮಂಡಳಿ ಸೂಚಿಸಿದ್ದುದಾಗಿ ಹೇಳಲಾಗಿತ್ತು.
CBFC ನಿರ್ಧಾರವನ್ನು ಪ್ರಶ್ನಿಸಿ ಚಿತ್ರತಂಡ ನ್ಯಾಯಾಲಯದ ಮೆಟ್ಟಿಲೇರಿತ್ತು. ನಿರ್ದೇಶಕ ಹನಿ ತ್ರೇಹನ್, ಈ ಹಿಂದೆ ನೀಡಿದ್ದ ಸಂದರ್ಶನದಲ್ಲಿ, ಚಿತ್ರದ ಮೇಲಿನ ನಿರ್ಬಂಧಗಳು ಅಭಿವ್ಯಕ್ತಿ ಸ್ವಾತಂತ್ರ್ಯಕ್ಕೆ ಧಕ್ಕೆ ತರುತ್ತಿವೆ ಎಂದು ಆರೋಪಿಸಿದ್ದರು.
ಒಟಿಟಿಯಿಂದ ಚಿತ್ರವನ್ನು ಹಿಂಪಡೆಯುವ ನಿರ್ಧಾರದಿಂದ ‘ಸಟ್ಲುಜ್’ ಮತ್ತೊಮ್ಮೆ ಚರ್ಚೆಯ ಕೇಂದ್ರಬಿಂದುವಾಗಿದೆ.
