ಲಾಸ್ ಏಂಜಲೀಸ್: ಕ್ವೆಂಟಿನ್ ಟ್ಯಾರಂಟಿನೊ ನಿರ್ದೇಶನದ ‘ಒನ್ಸ್ ಅಪಾನ್ ಎ ಟೈಮ್ ಇನ್ ಹಾಲಿವುಡ್’ ಚಿತ್ರದ ಜನಪ್ರಿಯ ಪಾತ್ರ ಕ್ಲಿಫ್ ಬೂತ್ ಮತ್ತೆ ಬೆಳ್ಳಿತೆರೆಗೆ ಬರಲು ಸಜ್ಜಾಗಿದೆ. ಡೇವಿಡ್ ಫಿಂಚರ್ ನಿರ್ದೇಶನದ ಈ ಬಹುನಿರೀಕ್ಷಿತ ಚಿತ್ರದ ಶೀರ್ಷಿಕೆಯನ್ನು ನೆಟ್ಫ್ಲಿಕ್ಸ್ ಅಧಿಕೃತವಾಗಿ ಘೋಷಿಸಿದೆ.
ಚಿತ್ರಕ್ಕೆ ‘ದಿ ಫರ್ದರ್ ಮಿಸ್-ಅಡ್ವೆಂಚರ್ಸ್ ಆಫ್ ಕ್ಲಿಫ್ ಬೂತ್’ ಎಂದು ಹೆಸರಿಡಲಾಗಿದೆ. ಚಿತ್ರವು ಡಿಸೆಂಬರ್ 23ರಂದು ನೆಟ್ಫ್ಲಿಕ್ಸ್ನಲ್ಲಿ ಪ್ರೀಮಿಯರ್ ಆಗಲಿದೆ.
ಮತ್ತೆ ಕ್ಲಿಫ್ ಬೂತ್ ಆಗಿ ಬ್ರಾಡ್ ಪಿಟ್
2019ರಲ್ಲಿ ಬಿಡುಗಡೆಯಾದ ‘ಒನ್ಸ್ ಅಪಾನ್ ಎ ಟೈಮ್ ಇನ್ ಹಾಲಿವುಡ್’ ಚಿತ್ರದಲ್ಲಿ ಬ್ರಾಡ್ ಪಿಟ್ ಅವರು ಸ್ಟಂಟ್ಮ್ಯಾನ್ ಕ್ಲಿಫ್ ಬೂತ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಇದೀಗ ಅದೇ ಪಾತ್ರವನ್ನು ಅವರು ಹೊಸ ಚಿತ್ರದಲ್ಲೂ ಮುಂದುವರಿಸಲಿದ್ದಾರೆ.
ಹೊಸ ಕಥೆ 1977ರ ಹಾಲಿವುಡ್ ಹಿನ್ನೆಲೆಯಲ್ಲಿದೆ. 1969ರಲ್ಲಿ ಮ್ಯಾನ್ಸನ್ ಕುಟುಂಬದ ಸದಸ್ಯರೊಂದಿಗಿನ ಘಟನೆಗಳ ಬಳಿಕ ಕ್ಲಿಫ್ ಬೂತ್ ಬದಲಾಗುತ್ತಿರುವ ಹಾಲಿವುಡ್ ಜಗತ್ತಿನಲ್ಲಿ ಎದುರಿಸುವ ಹೊಸ ಸವಾಲುಗಳ ಸುತ್ತ ಕಥೆ ಸಾಗಲಿದೆ.
‘ಒನ್ಸ್ ಅಪಾನ್ ಎ ಟೈಮ್ ಇನ್ ಹಾಲಿವುಡ್’ನಲ್ಲಿನ ಅಭಿನಯಕ್ಕಾಗಿ ಬ್ರಾಡ್ ಪಿಟ್ ಅತ್ಯುತ್ತಮ ಪೋಷಕ ನಟ ವಿಭಾಗದಲ್ಲಿ ಆಸ್ಕರ್ ಪ್ರಶಸ್ತಿ ಗೆದ್ದಿದ್ದರು.
ಟ್ಯಾರಂಟಿನೊ ಕಥೆ, ಫಿಂಚರ್ ನಿರ್ದೇಶನ
‘ದಿ ಫರ್ದರ್ ಮಿಸ್-ಅಡ್ವೆಂಚರ್ಸ್ ಆಫ್ ಕ್ಲಿಫ್ ಬೂತ್’ ಚಿತ್ರವನ್ನು ಡೇವಿಡ್ ಫಿಂಚರ್ ನಿರ್ದೇಶಿಸುತ್ತಿದ್ದು, ಚಿತ್ರಕಥೆಯನ್ನು ಕ್ವೆಂಟಿನ್ ಟ್ಯಾರಂಟಿನೊ ಬರೆದಿದ್ದಾರೆ.
ಚಿತ್ರದಲ್ಲಿ ಬ್ರಾಡ್ ಪಿಟ್ ಜೊತೆಗೆ ಎಲಿಜಬೆತ್ ಡೆಬಿಕಿ, ಸ್ಕಾಟ್ ಕಾನ್, ಕಾರ್ಲಾ ಗ್ಯುಗಿನೊ, ಯಾಹ್ಯಾ ಅಬ್ದುಲ್-ಮತೀನ್ II, ಪೀಟರ್ ವೆಲ್ಲರ್, ಮ್ಯಾಟ್ ಗ್ರೂವ್, ಜೆ.ಬಿ. ಟಡೆನಾ, ಕೋರಿ ಫೋಗಲ್ಮನಿಸ್ ಮತ್ತು ಕರೆನ್ ಕರಗುಲಿಯನ್ ಸೇರಿದಂತೆ ಹಲವು ಕಲಾವಿದರು ನಟಿಸಿದ್ದಾರೆ.
ಚಿತ್ರದ ನಿರ್ಮಾಣದಲ್ಲಿ ಬ್ರಾಡ್ ಪಿಟ್ ಅವರೊಂದಿಗೆ ಸೀನ್ ಚಾಫಿನ್ ಕೂಡ ಕೈಜೋಡಿಸಿದ್ದಾರೆ.
ಫಿಂಚರ್–ಪಿಟ್ ಜೋಡಿಯ ನಾಲ್ಕನೇ ಸಿನಿಮಾ
ಬ್ರಾಡ್ ಪಿಟ್ ಮತ್ತು ಡೇವಿಡ್ ಫಿಂಚರ್ ಜೋಡಿಯ ಇದು ನಾಲ್ಕನೇ ಸಹಯೋಗವಾಗಲಿದೆ. ಈ ಹಿಂದೆ 1995ರ ‘ಸೆವೆನ್’, 1999ರ ‘ಫೈಟ್ ಕ್ಲಬ್’ ಹಾಗೂ 2008ರ ‘ದಿ ಕ್ಯೂರಿಯಸ್ ಕೇಸ್ ಆಫ್ ಬೆಂಜಮಿನ್ ಬಟನ್’ ಚಿತ್ರಗಳಲ್ಲಿ ಇವರಿಬ್ಬರು ಒಟ್ಟಿಗೆ ಕೆಲಸ ಮಾಡಿದ್ದರು.
ಈ ಕಾರಣದಿಂದಲೇ ಹೊಸ ಚಿತ್ರವು ಹಾಲಿವುಡ್ ಅಭಿಮಾನಿಗಳಲ್ಲಿ ಭಾರೀ ಕುತೂಹಲ ಮೂಡಿಸಿದೆ.
