ನಾಗಿಕಾನಿಜ್ಸಾ: ಭಾರತದ ಯುವ ಗ್ರ್ಯಾಂಡ್ಮಾಸ್ಟರ್ ಪ್ರಣೇಶ್ ಎಂ. ಅವರು ಹಂಗೇರಿಯಲ್ಲಿ ನಡೆದ ಪ್ರತಿಷ್ಠಿತ ಕನಿಜ್ಸಾ ಓಪನ್ 2026 ಚೆಸ್ ಟೂರ್ನಿಯಲ್ಲಿ ಭರ್ಜರಿ ಪ್ರದರ್ಶನ ನೀಡಿ ಗ್ರೂಪ್ ‘ಎ’ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡಿದ್ದಾರೆ.
ಟೂರ್ನಿಯ ಒಂಬತ್ತನೇ ಹಾಗೂ ಅಂತಿಮ ಸುತ್ತಿನಲ್ಲಿ ಬಿಳಿ ಕಾಯಿಗಳೊಂದಿಗೆ ಆಡಿದ ಪ್ರಣೇಶ್, ಜರ್ಮನಿಯ ವಾಡಿಮ್ ಪೆಟ್ರೋವ್ಸ್ಕಿ ಅವರನ್ನು ಮಣಿಸಿದರು. ಇದರೊಂದಿಗೆ ಒಂಬತ್ತು ಸುತ್ತುಗಳಿಂದ ಒಟ್ಟು 7 ಅಂಕಗಳನ್ನು ಕಲೆಹಾಕಿ ಟೂರ್ನಿಯಲ್ಲಿ ಅಗ್ರಸ್ಥಾನ ಹಂಚಿಕೊಂಡರು.
ಅಗ್ರಸ್ಥಾನದಲ್ಲಿದ್ದ ನಾಲ್ವರು ಆಟಗಾರರ ಪೈಕಿ ಉತ್ತಮ ಟೈಬ್ರೇಕ್ ಅಂಕಗಳ ಆಧಾರದ ಮೇಲೆ ಪ್ರಣೇಶ್ ಚಾಂಪಿಯನ್ ಪಟ್ಟ ಅಲಂಕರಿಸಿದರು. ಇಸ್ರೇಲ್ನ ಓರ್ ಬ್ರಾನ್ಸ್ಟೈನ್, ಉಕ್ರೇನ್ನ ಆಂಡ್ರೇ ವೊಲೊಕಿಟಿನ್ ಹಾಗೂ ಭಾರತದ ಕಾರ್ತಿಕ್ ವೆಂಕಟರಮಣ್ ಕ್ರಮವಾಗಿ ಎರಡರಿಂದ ನಾಲ್ಕನೇ ಸ್ಥಾನ ಪಡೆದರು.
ತಮಿಳುನಾಡಿನ ಕಾರೈಕುಡಿ ಮೂಲದ 19 ವರ್ಷದ ಪ್ರಣೇಶ್ ಪ್ರಸ್ತುತ 2673 ರೇಟಿಂಗ್ ಹೊಂದಿದ್ದು, 2026ರ ಆಗಸ್ಟ್ನ ಇತ್ತೀಚಿನ ಎಫ್ಐಡಿಇ (FIDE) ರ್ಯಾಂಕಿಂಗ್ನಲ್ಲಿ 44ನೇ ಸ್ಥಾನದಲ್ಲಿದ್ದಾರೆ.
ಹಂಗೇರಿಯಲ್ಲಿರುವ ಭಾರತೀಯ ರಾಯಭಾರ ಕಚೇರಿ ಕೂಡ ಪ್ರಣೇಶ್ ಅವರ ಸಾಧನೆಯನ್ನು ಅಭಿನಂದಿಸಿ, ಕನಿಜ್ಸಾ ಓಪನ್ ಪ್ರಶಸ್ತಿ ಗೆದ್ದಿರುವುದಕ್ಕೆ ಶುಭಾಶಯ ಕೋರಿದೆ.
ಯುವ ಭಾರತೀಯ ಗ್ರ್ಯಾಂಡ್ಮಾಸ್ಟರ್ನ ಈ ಗೆಲುವು ಅಂತಾರಾಷ್ಟ್ರೀಯ ಚೆಸ್ ವೇದಿಕೆಯಲ್ಲಿ ಭಾರತದ ಪ್ರಾಬಲ್ಯವನ್ನು ಮತ್ತಷ್ಟು ಬಲಪಡಿಸುವ ಮಹತ್ವದ ಸಾಧನೆಯಾಗಿದೆ.
