ಮುಂಬೈ: ಬಾಲಿವುಡ್ ನಟ ಅಹಾನ್ ಪಾಂಡೆ, ಶರ್ವರಿ ಹಾಗೂ ಬಾಬಿ ಡಿಯೋಲ್ ಅಭಿನಯದ, ನಿರ್ದೇಶಕ ಅಲಿ ಅಬ್ಬಾಸ್ ಜಾಫರ್ ಅವರ ಬಹುನಿರೀಕ್ಷಿತ ಹೊಸ ಚಿತ್ರದ ಬಿಡುಗಡೆ ದಿನಾಂಕವನ್ನು ಚಿತ್ರತಂಡ ಅಧಿಕೃತವಾಗಿ ಘೋಷಿಸಿದೆ.
ಯಶ್ ರಾಜ್ ಫಿಲ್ಮ್ಸ್ (YRF) ಬ್ಯಾನರ್ ಅಡಿಯಲ್ಲಿ ಆದಿತ್ಯ ಚೋಪ್ರಾ ನಿರ್ಮಿಸುತ್ತಿರುವ ಈ ರೊಮ್ಯಾಂಟಿಕ್-ಆಕ್ಷನ್ ಡ್ರಾಮಾ ಚಿತ್ರವು 2027ರ ಮಾರ್ಚ್ 26ರಂದು ವಿಶ್ವದಾದ್ಯಂತ ಬಿಡುಗಡೆಯಾಗಲಿದೆ.
ಇನ್ನೂ ಶೀರ್ಷಿಕೆ ಅಂತಿಮವಾಗದ ಈ ಚಿತ್ರದಲ್ಲಿ ‘ನಿಶಾಂಚಿ’ ಖ್ಯಾತಿಯ ಐಶ್ವರ್ಯ ಠಾಕ್ರೆ ಕೂಡ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದಾರೆ.
ಈ ವರ್ಷದ ಏಪ್ರಿಲ್ನಲ್ಲಿ ಚಿತ್ರದ ಚಿತ್ರೀಕರಣ ಆರಂಭವಾಗಿರುವುದಾಗಿ ಚಿತ್ರತಂಡ ಘೋಷಿಸಿತ್ತು. ಇದೀಗ ಬಿಡುಗಡೆಯ ದಿನಾಂಕ ಪ್ರಕಟವಾಗಿರುವುದು ಸಿನಿಪ್ರಿಯರಲ್ಲಿ ಕುತೂಹಲ ಹೆಚ್ಚಿಸಿದೆ.
ಈ ಹಿಂದೆ ಅಹಾನ್ ಪಾಂಡೆ ಕುರಿತು ಮಾತನಾಡಿದ್ದ ನಿರ್ದೇಶಕ ಅಲಿ ಅಬ್ಬಾಸ್ ಜಾಫರ್, “ಅಹಾನ್ನಲ್ಲಿ ನನಗೆ ಹೆಚ್ಚು ಇಷ್ಟವಾಗುವುದು ಅವರ ಪ್ರಾಮಾಣಿಕತೆ. ಇಂದಿನ ಕಾಲದಲ್ಲಿ ಎಲ್ಲವೂ ಕೃತಕವಾಗಿ ಕಾಣುವ ಸಂದರ್ಭದಲ್ಲಿ, ಅವರು ಹಳೆಯ ಕಾಲದ ರೊಮ್ಯಾಂಟಿಕ್ ನಾಯಕರಂತೆ ಸಹಜ ಅಭಿನಯವನ್ನು ತರುತ್ತಾರೆ. ಕ್ಯಾಮೆರಾ ಆ ಭಾವನೆಯನ್ನು ಸ್ಪಷ್ಟವಾಗಿ ಸೆರೆಹಿಡಿಯುತ್ತದೆ” ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದರು.
ಅಹಾನ್ ಪಾಂಡೆ ಅಭಿನಯದ ಮೊದಲ ಚಿತ್ರ ‘ಸೈಯಾರಾ’ 2025ರ ಸೂಪರ್ಹಿಟ್ ಚಿತ್ರಗಳಲ್ಲಿ ಒಂದಾಗಿ ಹೊರಹೊಮ್ಮಿತ್ತು. ಮೋಹಿತ್ ಸೂರಿ ನಿರ್ದೇಶಿಸಿದ್ದ ಈ ಚಿತ್ರದಲ್ಲಿನ ಅಹಾನ್ ಹಾಗೂ ಅನೀತ್ ಪಡ್ಡಾ ಜೋಡಿ ಮತ್ತು ಸಂಗೀತ ಪ್ರೇಕ್ಷಕರಿಂದ ಭಾರೀ ಮೆಚ್ಚುಗೆ ಪಡೆದಿತ್ತು.
ಇದೀಗ ಅಹಾನ್, ಅನೀತ್ ಪಡ್ಡಾ ಹಾಗೂ ನಿರ್ದೇಶಕ ಮೋಹಿತ್ ಸೂರಿ ಮತ್ತೊಮ್ಮೆ ಹೊಸ ರೊಮ್ಯಾಂಟಿಕ್ ಚಿತ್ರದ ಮೂಲಕ ಒಂದಾಗಲಿದ್ದಾರೆ ಎಂಬ ಮಾಹಿತಿಯೂ ಹೊರಬಿದ್ದಿದೆ.
