ನವದೆಹಲಿ: ಕಳೆದ ಒಂದು ತಿಂಗಳ ಅವಧಿಯಲ್ಲಿ ನಾಲ್ಕು ಹೊಸ ತಲೆಮಾರಿನ ಸ್ವದೇಶಿ ನೌಕಾ ವೇದಿಕೆಗಳು ಭಾರತೀಯ ನೌಕಾಪಡೆಗೆ ಸೇರ್ಪಡೆಯಾಗಿದ್ದು, ದೇಶದ ಸಾಗರ ರಕ್ಷಣಾ ಸಾಮರ್ಥ್ಯ ಮತ್ತಷ್ಟು ಬಲಗೊಂಡಿದೆ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ.
ಇತ್ತೀಚಿನ ಸೇರ್ಪಡೆಯಾಗಿ ಜುಲೈ 11ರಂದು ಭಾರತೀಯ ನೌಕಾಪಡೆಗೆ ‘ಐಎನ್ಎಸ್ ಮಹೇಂದ್ರಗಿರಿ (INS Mahendragiri)’ ಸೇರ್ಪಡೆಯಾಗಿದೆ. ಇದು ಸ್ವದೇಶಿ ವಿನ್ಯಾಸದ ಆರನೇ ನಿಲಗಿರಿ (Nilgiri) ವರ್ಗದ ಸ್ಟೆಲ್ತ್ ಫ್ರಿಗೇಟ್ ಆಗಿದೆ.
ಇದಕ್ಕೂ ಮುನ್ನ ಕಳೆದ ತಿಂಗಳ 21ರಂದು, ಸ್ವದೇಶಿ ವಿನ್ಯಾಸ ಹಾಗೂ ನಿರ್ಮಾಣದ ಐಎನ್ಎಸ್ ದುನಗಿರಿ (INS Dunagiri), ಐಎನ್ಎಸ್ ಸಂಶೋಧಕ್ (INS Sanshodhak) ಮತ್ತು ಐಎನ್ಎಸ್ ಅಗ್ರಾಯ್ (INS Agray) ನೌಕಾ ವೇದಿಕೆಗಳನ್ನು ಭಾರತೀಯ ನೌಕಾಪಡೆಗೆ ಸೇರ್ಪಡೆ ಮಾಡಲಾಗಿತ್ತು.
ಬಹುಮುಖ ಯುದ್ಧ ಕಾರ್ಯಾಚರಣೆಗೆ ಸಜ್ಜಾದ ನಿಲಗಿರಿ ವರ್ಗದ ಯುದ್ಧನೌಕೆಗಳು
ಪ್ರಾಜೆಕ್ಟ್ 17A ಅಡಿಯಲ್ಲಿ ನಿರ್ಮಿಸಲಾಗುತ್ತಿರುವ ನಿಲಗಿರಿ ವರ್ಗದ ಸ್ಟೆಲ್ತ್ ಫ್ರಿಗೇಟ್ಗಳು, ವಾಯು ದಾಳಿ, ಸಮುದ್ರ ಮೇಲ್ಮೈ ಯುದ್ಧ ಹಾಗೂ ಜಲಾಂತರ್ಗಾಮಿ ವಿರೋಧಿ ಕಾರ್ಯಾಚರಣೆಗಳು ಸೇರಿದಂತೆ ವಿವಿಧ ಯುದ್ಧ ಕಾರ್ಯಗಳಿಗೆ ಸಮರ್ಥವಾಗಿವೆ.
ಈ ಯೋಜನೆಯಡಿ ಏಳು ಹೊಸ ತಲೆಮಾರಿನ ಮಾರ್ಗದರ್ಶಿತ ಕ್ಷಿಪಣಿ (Guided Missile) ಯುದ್ಧನೌಕೆಗಳನ್ನು ನಿರ್ಮಿಸಲಾಗುತ್ತಿದೆ.
ಆಧುನಿಕ ತಂತ್ರಜ್ಞಾನ ಮತ್ತು ಸ್ವದೇಶಿ ಸಾಮರ್ಥ್ಯದ ಪ್ರತೀಕ
ಈ ಯುದ್ಧನೌಕೆಗಳಲ್ಲಿ ಸುಧಾರಿತ ಸ್ಟೆಲ್ತ್ ತಂತ್ರಜ್ಞಾನ, ಕಡಿಮೆ ರಾಡಾರ್ ಗುರುತು, ಹೆಚ್ಚಿನ ಸ್ವಯಂಚಾಲಿತ ವ್ಯವಸ್ಥೆ ಹಾಗೂ ಉನ್ನತ ಮಟ್ಟದ ಸುರಕ್ಷತಾ ವೈಶಿಷ್ಟ್ಯಗಳು ಅಳವಡಿಸಲಾಗಿವೆ. ಸಮುದ್ರ ಯುದ್ಧದ ಎಲ್ಲ ಆಯಾಮಗಳಲ್ಲಿ ಕಾರ್ಯಾಚರಣೆ ನಡೆಸುವ ಸಾಮರ್ಥ್ಯವನ್ನು ಇವು ಹೊಂದಿವೆ.
ಹೆಚ್ಚಿನ ಪ್ರಮಾಣದ ಸ್ವದೇಶಿ ತಂತ್ರಜ್ಞಾನ ಮತ್ತು ಉತ್ಪಾದನಾ ಸಾಮಗ್ರಿಗಳನ್ನು ಬಳಸಿ ನಿರ್ಮಿಸಲಾಗಿರುವ ಈ ನೌಕಾ ವೇದಿಕೆಗಳು ‘ಆತ್ಮನಿರ್ಭರ್ ಭಾರತ’ ಪರಿಕಲ್ಪನೆಯನ್ನು ಮತ್ತಷ್ಟು ಬಲಪಡಿಸುವುದರ ಜೊತೆಗೆ ದೇಶದ ರಕ್ಷಣಾ ಉತ್ಪಾದನಾ ವಲಯಕ್ಕೂ ಉತ್ತೇಜನ ನೀಡಲಿವೆ.
ಇವು ಸಾಗರ ಭದ್ರತೆಯನ್ನು ಬಲಪಡಿಸುವುದರೊಂದಿಗೆ, ನೀಲಿ ಆರ್ಥಿಕತೆ (Blue Economy) ಅಭಿವೃದ್ಧಿಗೆ ಸಹಕಾರಿಯಾಗಲಿದ್ದು, ಜಾಗತಿಕ ಸಾಗರ ಶಕ್ತಿಯಾಗಿ ಭಾರತದ ಸ್ಥಾನವನ್ನು ಮತ್ತಷ್ಟು ಸದೃಢಗೊಳಿಸಲಿವೆ.
