ಅಗರ್ತಲಾ: ಈಶಾನ್ಯ ಭಾರತದ ಅಭಿವೃದ್ಧಿಗೆ ಹೊಸ ವೇಗ ದೊರೆಯುತ್ತಿರುವ ಹಿನ್ನೆಲೆಯಲ್ಲಿ, ತ್ರಿಪುರಾ ಹೂಡಿಕೆಗೆ ಅತ್ಯಂತ ಭರವಸೆಯ ರಾಜ್ಯವಾಗಿ ಹೊರಹೊಮ್ಮುತ್ತಿದೆ ಎಂದು ಈಶಾನ್ಯ ಪ್ರದೇಶಾಭಿವೃದ್ಧಿ (DoNER) ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ ಹೇಳಿದ್ದಾರೆ.
‘ಡೆಸ್ಟಿನೇಷನ್ ತ್ರಿಪುರಾ ಬಿಸಿನೆಸ್ ಕಾಂಕ್ಲೇವ್–2026’ ಕಾರ್ಯಕ್ರಮವನ್ನು ವರ್ಚುವಲ್ ಮೂಲಕ ಉದ್ದೇಶಿಸಿ ಮಾತನಾಡಿದ ಅವರು, ತ್ರಿಪುರಾದ ಅಭಿವೃದ್ಧಿಯ ಪಯಣದಲ್ಲಿ ಕೈಜೋಡಿಸುವಂತೆ ದೇಶದ ಉದ್ಯಮ ವಲಯದ ಪ್ರಮುಖರಿಗೆ ಕರೆ ನೀಡಿದರು.
ಅಗರ್ತಲಾ ನಗರವು ಆಗ್ನೇಯ ಏಷ್ಯಾದ ರಾಷ್ಟ್ರಗಳಿಗೆ ಭಾರತದ ಕಾರ್ಯತಂತ್ರದ ವ್ಯಾಪಾರ ಪ್ರವೇಶ ದ್ವಾರವಾಗಿ ಬೆಳೆಯುತ್ತಿದ್ದು, 670 ಮಿಲಿಯನ್ಗಿಂತ ಹೆಚ್ಚು ಜನಸಂಖ್ಯೆ ಹೊಂದಿರುವ ಆಸಿಯಾನ್ (ASEAN) ರಾಷ್ಟ್ರಗಳ ಮಾರುಕಟ್ಟೆಯೊಂದಿಗೆ ವ್ಯಾಪಾರ ಸಂಪರ್ಕವನ್ನು ಬಲಪಡಿಸುತ್ತಿದೆ ಎಂದು ಅವರು ಹೇಳಿದರು.
ತ್ರಿಪುರಾದಲ್ಲಿರುವ ನೈಸರ್ಗಿಕ ಅನಿಲ, ಬಿದಿರು, ಅಗರ್ವುಡ್, ನೈಸರ್ಗಿಕ ರಬ್ಬರ್, ಚಹಾ, ಮಸಾಲೆ ಹಾಗೂ ತೋಟಗಾರಿಕಾ ಉತ್ಪನ್ನಗಳ ಸಮೃದ್ಧ ಸಂಪನ್ಮೂಲಗಳು, ಉನ್ನತ ಶಿಕ್ಷಣ ಪಡೆದ ಮಾನವ ಸಂಪನ್ಮೂಲ, ಹೂಡಿಕೆದಾರ ಸ್ನೇಹಿ ನೀತಿಗಳು, ವೇಗವಾಗಿ ಬೆಳೆಯುತ್ತಿರುವ ಮೂಲಸೌಕರ್ಯ ಹಾಗೂ ಭಾರತದ ಮೂರನೇ ಅಂತರರಾಷ್ಟ್ರೀಯ ಇಂಟರ್ನೆಟ್ ಗೇಟ್ವೇ ರಾಜ್ಯದ ಪ್ರಮುಖ ಶಕ್ತಿಗಳಾಗಿವೆ ಎಂದು ಸಿಂಧಿಯಾ ತಿಳಿಸಿದರು.
ತ್ರಿಪುರಾ ಇಂದು ಭಾರತದ ಅತಿದೊಡ್ಡ ಬಿದಿರು ಉತ್ಪಾದಕ ರಾಜ್ಯ ಹಾಗೂ ನೈಸರ್ಗಿಕ ರಬ್ಬರ್ ಉತ್ಪಾದನೆಯಲ್ಲಿ ದೇಶದ ಎರಡನೇ ಅತಿದೊಡ್ಡ ರಾಜ್ಯವಾಗಿ ಹೊರಹೊಮ್ಮಿರುವುದರಿಂದ, ಉತ್ಪಾದನಾ ಕೈಗಾರಿಕೆ, ಆಹಾರ ಸಂಸ್ಕರಣೆ, ಮೌಲ್ಯವರ್ಧನೆ, ಲಾಜಿಸ್ಟಿಕ್ಸ್, ರಫ್ತು ಹಾಗೂ ತಂತ್ರಜ್ಞಾನ ಆಧಾರಿತ ಉದ್ಯಮಗಳಿಗೆ ಅಪಾರ ಅವಕಾಶಗಳು ಸೃಷ್ಟಿಯಾಗಿವೆ ಎಂದು ಅವರು ಹೇಳಿದರು.
ಕಳೆದ ಒಂದು ದಶಕದಲ್ಲಿ ಕೇಂದ್ರ ಸರ್ಕಾರ ಸಂಪರ್ಕ ವ್ಯವಸ್ಥೆ, ಆಧುನಿಕ ಮೂಲಸೌಕರ್ಯ ಮತ್ತು ಬಲಿಷ್ಠ ಸಾಂಸ್ಥಿಕ ಬೆಂಬಲದ ಮೂಲಕ ಈಶಾನ್ಯ ಭಾರತದ ಅಭಿವೃದ್ಧಿಯ ಚಿತ್ರಣವನ್ನೇ ಬದಲಿಸಿದೆ ಎಂದು ಸಿಂಧಿಯಾ ಒತ್ತಿ ಹೇಳಿದರು.
