ಹಾಲಿವುಡ್: ಹಾಲಿವುಡ್ ನಟ ಬ್ರಾಡ್ ಪಿಟ್ ಅಭಿನಯದ ಬಹುನಿರೀಕ್ಷಿತ ಸರ್ವೈವಲ್ ಥ್ರಿಲ್ಲರ್ ‘ಹಾರ್ಟ್ ಆಫ್ ದಿ ಬೀಸ್ಟ್’ ಬಿಡುಗಡೆಗೆ ಸಜ್ಜಾಗಿದೆ. ಈ ಸಿನಿಮಾದಲ್ಲಿ ಬ್ರಾಡ್ ಪಿಟ್ ಅವರೊಂದಿಗೆ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಶ್ವಾನದ ಹಿನ್ನೆಲೆಯನ್ನು ನಟ ಇದೀಗ ಬಹಿರಂಗಪಡಿಸಿದ್ದಾರೆ.
ಸಿನಿಮಾದಲ್ಲಿ ಈ ಶ್ವಾನದ ಹೆಸರು ‘ಓಡಿನ್’ ಆಗಿದ್ದರೂ, ಅದರ ನಿಜವಾದ ಹೆಸರು ‘ಉಬರ್’. ಚಿತ್ರದ ಪ್ರಚಾರ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಬ್ರಾಡ್ ಪಿಟ್, ಉಬರ್ ಅತ್ಯಂತ ವಿಶೇಷವಾದ ಶ್ವಾನವಾಗಿದ್ದು, ತಾನು ಅದರೊಂದಿಗೆ ಆಳವಾದ ಬಾಂಧವ್ಯ ಬೆಳೆಸಿಕೊಂಡಿದ್ದೇನೆ ಎಂದು ಹೇಳಿದ್ದಾರೆ.
ಉಬರ್ ಈ ಹಿಂದೆ ಹುಡುಕಾಟ ಮತ್ತು ರಕ್ಷಣಾ ಕಾರ್ಯಗಳಲ್ಲಿ (Search and Rescue) ತರಬೇತಿ ಪಡೆದಿದ್ದ ಶ್ವಾನ. ನಿವೃತ್ತಿಗೆ ಸಿದ್ಧವಾಗಿದ್ದ ಉಬರ್ ಅನ್ನು ಸಿನಿಮಾದ ‘ಡಾಗ್ ವಿಸ್ಪರರ್’ ಆಂಡ್ರ್ಯೂ ಸಿಂಪ್ಸನ್ ನ್ಯೂಜಿಲೆಂಡ್‌ನಲ್ಲಿ ಪತ್ತೆಹಚ್ಚಿದ್ದರು. ಅಲ್ಲಿ ಚಿತ್ರದ ಚಿತ್ರೀಕರಣ ನಡೆಯುತ್ತಿದ್ದ ಸಂದರ್ಭದಲ್ಲಿ ಕೇವಲ ಐದು ವಾರಗಳ ತರಬೇತಿಯಲ್ಲೇ ಉಬರ್ ಚಿತ್ರೀಕರಣದ ಮೊದಲ ದಿನಕ್ಕೆ ಅಗತ್ಯವಿದ್ದ ಕಸರತ್ತುಗಳನ್ನು ಕಲಿತುಕೊಂಡಿತ್ತು ಎಂದು ಬ್ರಾಡ್ ಪಿಟ್ ವಿವರಿಸಿದ್ದಾರೆ.
ಉಬರ್‌ನ ಪ್ರತಿಭೆ ಮತ್ತು ಶಿಸ್ತನ್ನು ಮೆಚ್ಚಿಕೊಂಡಿರುವ ಬ್ರಾಡ್ ಪಿಟ್, ಆ ಶ್ವಾನ ತನ್ನನ್ನು ಭಾವುಕರನ್ನಾಗಿಸಿದೆ ಎಂದು ಹೇಳಿದ್ದಾರೆ.
ಸೈನಿಕ ಅಧಿಕಾರಿ ಮತ್ತು ಯುದ್ಧ ಶ್ವಾನದ ಬದುಕಿನ ಹೋರಾಟ
‘ಹಾರ್ಟ್ ಆಫ್ ದಿ ಬೀಸ್ಟ್’ ತೀವ್ರ ಸಾಹಸ ಮತ್ತು ಬದುಕುಳಿಯುವ ಹೋರಾಟವನ್ನು ಆಧರಿಸಿದ ಚಿತ್ರವಾಗಿದೆ. ಕಥೆಯಲ್ಲಿ ಸ್ಪೆಷಲ್ ಫೋರ್ಸಸ್ ಅಧಿಕಾರಿ ಜೇಮ್ಸ್ ಬೆಲ್ಮಾಂಟ್ ಮತ್ತು ಆತನ ಯುದ್ಧ ಶ್ವಾನ ವಿಮಾನ ಅಪಘಾತಕ್ಕೀಡಾದ ಬಳಿಕ ಅಲಾಸ್ಕಾದ ಕಠಿಣ ಕಾಡಿನಲ್ಲಿ ಸಿಲುಕಿಕೊಳ್ಳುತ್ತಾರೆ.
ಅಪಾಯಕಾರಿ ವಾತಾವರಣ, ಕಾಡುಪ್ರಾಣಿಗಳು ಮತ್ತು ಪ್ರತಿಕೂಲ ನೈಸರ್ಗಿಕ ಪರಿಸ್ಥಿತಿಗಳ ನಡುವೆ ಇಬ್ಬರೂ ಜೀವ ಉಳಿಸಿಕೊಳ್ಳಲು ಹೋರಾಡಬೇಕಾಗುತ್ತದೆ. ಈ ಕಠಿಣ ಪರಿಸ್ಥಿತಿಯಲ್ಲಿ ಅಧಿಕಾರಿ ಮತ್ತು ಶ್ವಾನದ ನಡುವಿನ ಬಾಂಧವ್ಯವೇ ಚಿತ್ರದ ಪ್ರಮುಖ ಅಂಶವಾಗಿದೆ.
ಚಿತ್ರದಲ್ಲಿ ಜೆ.ಕೆ. ಸಿಮನ್ಸ್ ಮತ್ತು ಅನ್ನಾ ಲ್ಯಾಂಬೆ ಕೂಡ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ಡೇವಿಡ್ ಆಯರ್ ನಿರ್ದೇಶನದ ಈ ಚಿತ್ರವನ್ನು ಪ್ಯಾರಾಮೌಂಟ್ ಪಿಕ್ಚರ್ಸ್, ಡೊಮೈನ್ ಎಂಟರ್‌ಟೈನ್‌ಮೆಂಟ್ ಮತ್ತು ಗಲ್ಫ್‌ಸ್ಟ್ರೀಮ್ ಪಿಕ್ಚರ್ಸ್ ಸಹಯೋಗದಲ್ಲಿ ನಿರ್ಮಿಸಿವೆ.
ಸೆಪ್ಟೆಂಬರ್ 25ರಂದು ಚಿತ್ರಮಂದಿರಗಳಲ್ಲಿ ‘ಹಾರ್ಟ್ ಆಫ್ ದಿ ಬೀಸ್ಟ್’ ಬಿಡುಗಡೆಯಾಗಲಿದೆ.
ಇದಕ್ಕೂ ಮೊದಲು ಬ್ರಾಡ್ ಪಿಟ್ 2025ರಲ್ಲಿ ಬಿಡುಗಡೆಯಾದ ‘F1’ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದರು. ಈ ಚಿತ್ರವು ಬಾಕ್ಸ್ ಆಫೀಸ್‌ನಲ್ಲಿ ಉತ್ತಮ ಯಶಸ್ಸು ಗಳಿಸಿತ್ತು. ಮುಂದಿನ ದಿನಗಳಲ್ಲಿ ಅವರು 2019ರ ‘ಒನ್ಸ್ ಅಪಾನ್ ಎ ಟೈಮ್ ಇನ್ ಹಾಲಿವುಡ್’ ಚಿತ್ರದ ಪಾತ್ರ ಕ್ಲಿಫ್ ಬೂತ್ ಆಧಾರಿತ ‘ದಿ ಫರ್ದರ್ ಮಿಸ್-ಅಡ್ವೆಂಚರ್ಸ್ ಆಫ್ ಕ್ಲಿಫ್ ಬೂತ್’ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
