ಕೊಲಂಬೊ: ಶ್ರೀಲಂಕಾ ಕ್ರಿಕೆಟ್ ಆಡಳಿತದಲ್ಲಿ ಸರ್ಕಾರದ ಹಸ್ತಕ್ಷೇಪದ ಆರೋಪದ ಹಿನ್ನೆಲೆಯಲ್ಲಿ, 2027ರಲ್ಲಿ ನಡೆಯಲಿರುವ ಚೊಚ್ಚಲ ಮಹಿಳಾ ಚಾಂಪಿಯನ್ಸ್ ಟ್ರೋಫಿ ಆತಿಥ್ಯ ಹಕ್ಕನ್ನು ಅಂತರರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ICC) ಶ್ರೀಲಂಕಾದಿಂದ ಹಿಂಪಡೆದಿದೆ.
2027ರಲ್ಲಿ ಮೊದಲ ಬಾರಿಗೆ ಮಹಿಳೆಯರಿಗಾಗಿ ಚಾಂಪಿಯನ್ಸ್ ಟ್ರೋಫಿ ಆಯೋಜಿಸಲು ಶ್ರೀಲಂಕಾಗೆ ಆತಿಥ್ಯ ನೀಡಲಾಗಿತ್ತು. ಆತಿಥೇಯ ಶ್ರೀಲಂಕಾ ಸೇರಿದಂತೆ ಒಟ್ಟು ಆರು ತಂಡಗಳು ಟೂರ್ನಿಯಲ್ಲಿ ಭಾಗವಹಿಸುವ ಯೋಜನೆಯಿತ್ತು.
ಆದರೆ ಶ್ರೀಲಂಕಾ ಕ್ರಿಕೆಟ್ ಆಡಳಿತದಲ್ಲಿ ಸರ್ಕಾರದ ಹಸ್ತಕ್ಷೇಪದ ಕುರಿತು ಅಸಮಾಧಾನ ವ್ಯಕ್ತಪಡಿಸಿರುವ ICC, ಆತಿಥ್ಯ ಹಕ್ಕನ್ನು ಹಿಂಪಡೆಯುವ ನಿರ್ಧಾರ ಕೈಗೊಂಡಿದೆ ಎಂದು ವರದಿಯಾಗಿದೆ.
ಮುಂದಿನ ಸಭೆಯಲ್ಲಿ ಹೊಸ ಆತಿಥೇಯ ರಾಷ್ಟ್ರ ನಿರ್ಧಾರ
ಟೂರ್ನಿಗೆ ಹೊಸ ಆತಿಥೇಯ ಸ್ಥಳವನ್ನು ICC ತನ್ನ ಮುಂದಿನ ಮಂಡಳಿ ಸಭೆಯಲ್ಲಿ ಅಂತಿಮಗೊಳಿಸುವ ಸಾಧ್ಯತೆ ಇದೆ.
ಆತಿಥ್ಯ ಹಕ್ಕು ಕಳೆದುಕೊಂಡಿರುವುದು ಶ್ರೀಲಂಕಾ ಕ್ರಿಕೆಟ್ ಮಂಡಳಿಗೂ ಆರ್ಥಿಕವಾಗಿ ದೊಡ್ಡ ಹೊಡೆತ ನೀಡುವ ಸಾಧ್ಯತೆಯಿದೆ. ತವರಿನಲ್ಲೇ ಪಂದ್ಯಾವಳಿ ಆಯೋಜಿಸುವ ಅವಕಾಶ ಕಳೆದುಕೊಂಡಿರುವುದರಿಂದ ನಿರೀಕ್ಷಿತ ಆದಾಯದ ಮೇಲೂ ಪರಿಣಾಮ ಬೀರುವ ಸಾಧ್ಯತೆ ಇದೆ.
ಶ್ರೀಲಂಕಾ ಮಹಿಳಾ ತಂಡಕ್ಕೂ ಸಂಕಷ್ಟ?
ಆತಿಥೇಯ ರಾಷ್ಟ್ರ ಬದಲಾಗುವುದರಿಂದ ಶ್ರೀಲಂಕಾ ಮಹಿಳಾ ತಂಡದ ಟೂರ್ನಿ ಪ್ರವೇಶಕ್ಕೂ ಪರಿಣಾಮ ಬೀರುವ ಸಾಧ್ಯತೆ ಎದುರಾಗಿದೆ.
ಟೂರ್ನಿಯಲ್ಲಿ ಆತಿಥೇಯ ತಂಡದ ಜೊತೆಗೆ ವಿಶ್ವದ ಅಗ್ರ ಐದು ತಂಡಗಳಿಗೆ ಅವಕಾಶ ನೀಡುವ ಮಾದರಿ ರೂಪಿಸಲಾಗಿತ್ತು. ಹೀಗಾಗಿ ಆತಿಥ್ಯ ಸ್ಥಾನ ಕಳೆದುಕೊಂಡಿರುವ ಶ್ರೀಲಂಕಾ ತಂಡವು ಅಗ್ರ ಐದು ತಂಡಗಳೊಳಗೆ ಸ್ಥಾನ ಪಡೆಯದಿದ್ದರೆ 2027ರ ಮಹಿಳಾ ಚಾಂಪಿಯನ್ಸ್ ಟ್ರೋಫಿಯಲ್ಲಿ ಆಡುವ ಅವಕಾಶದಿಂದ ವಂಚಿತವಾಗುವ ಸಾಧ್ಯತೆ ಇದೆ.
ICCಯ ಅಂತಿಮ ತೀರ್ಮಾನ ಹಾಗೂ ಟೂರ್ನಿಯ ಹೊಸ ಆತಿಥೇಯ ಸ್ಥಳದ ಘೋಷಣೆಯ ಬಳಿಕ ಶ್ರೀಲಂಕಾ ತಂಡದ ಭಾಗವಹಿಸುವಿಕೆಯ ಕುರಿತು ಸ್ಪಷ್ಟತೆ ದೊರೆಯಲಿದೆ.
