ಲಾಗೋಸ್: ನೈಜೀರಿಯಾದ ಲಾಗೋಸ್ನಲ್ಲಿ ನಡೆಯುತ್ತಿರುವ ಕಾಮನ್ವೆಲ್ತ್ ಫೆನ್ಸಿಂಗ್ ಚಾಂಪಿಯನ್ಶಿಪ್ನಲ್ಲಿ ಭಾರತದ ಫೆನ್ಸರ್ಗಳು ಭರ್ಜರಿ ಪ್ರದರ್ಶನ ಮುಂದುವರಿಸಿದ್ದಾರೆ. ಮೊದಲ ದಿನ 17 ಪದಕಗಳನ್ನು ಗೆದ್ದಿದ್ದ ಭಾರತ, ಇದೀಗ ಮತ್ತಷ್ಟು ಪದಕಗಳನ್ನು ತನ್ನ ಖಾತೆಗೆ ಸೇರಿಸಿಕೊಂಡಿದೆ.
ಭಾರತದ ಫೆನ್ಸರ್ಗಳು ಹಿರಿಯರ ವಿಭಾಗದಲ್ಲಿ 2 ಚಿನ್ನ, 3 ಬೆಳ್ಳಿ ಮತ್ತು 4 ಕಂಚಿನ ಪದಕಗಳನ್ನು ಗೆದ್ದು ದೇಶದ ಪದಕಗಳ ಸಂಖ್ಯೆಯನ್ನು ಮತ್ತಷ್ಟು ಹೆಚ್ಚಿಸಿದ್ದಾರೆ.
ಪುರುಷರ ಸ್ಯಾಬರ್ನಲ್ಲಿ ಕರಣ್ ಸಿಂಗ್ಗೆ ಚಿನ್ನ
ಹಿರಿಯ ಪುರುಷರ ಸ್ಯಾಬರ್ ವಿಭಾಗದ ಫೈನಲ್ನಲ್ಲಿ ಕರಣ್ ಸಿಂಗ್ ಅದ್ಭುತ ಹೋರಾಟದ ಮೂಲಕ ಚಿನ್ನದ ಪದಕ ಗೆದ್ದರು. ಆಸ್ಟ್ರೇಲಿಯಾದ ಯೋಂಗಿ ಶಿಮ್ ವಿರುದ್ಧದ ಪಂದ್ಯದಲ್ಲಿ ಕರಣ್ 7-11ರಿಂದ ಹಿನ್ನಡೆಯಲ್ಲಿದ್ದರು. ಆದರೆ ಬಳಿಕ ಭರ್ಜರಿ ಕಂಬ್ಯಾಕ್ ಮಾಡಿದ ಅವರು 15-12 ಅಂಕಗಳಿಂದ ಗೆದ್ದು ಚಿನ್ನದ ಪದಕ ತಮ್ಮದಾಗಿಸಿಕೊಂಡರು.
ಎಪಿಯಲ್ಲಿ ಶೆರ್ಜಿನ್ ಶಾಂತಿಮೋಲ್ಗೆ ಸ್ವರ್ಣ
ಪುರುಷರ ಎಪಿ ಫೈನಲ್ನಲ್ಲಿ ಶೆರ್ಜಿನ್ ಶಾಂತಿಮೋಲ್ ದಕ್ಷಿಣ ಆಫ್ರಿಕಾದ ಎರಡನೇ ಶ್ರೇಯಾಂಕದ ಫೆನ್ಸರ್ ಪೀಟರ್ ಕ್ರೂಗರ್ ಅವರನ್ನು 15-6 ಅಂಕಗಳಿಂದ ಮಣಿಸಿ ಚಿನ್ನದ ಪದಕ ಗೆದ್ದರು.
ಹಿರಿಯ ಪುರುಷರ ಫಾಯಿಲ್ ವಿಭಾಗದಲ್ಲಿ ತೆಜಸ್ ಪಾಟೀಲ್ ಕಂಚಿನ ಪದಕ ಗೆದ್ದರು. ಹಲವು ಖ್ಯಾತ ಅಂತಾರಾಷ್ಟ್ರೀಯ ಫೆನ್ಸರ್ಗಳು ಭಾಗವಹಿಸಿದ್ದ ಸ್ಪರ್ಧೆಯಲ್ಲಿ ತೆಜಸ್ ಅವರ ಪ್ರದರ್ಶನ ಗಮನ ಸೆಳೆಯಿತು.
ಮಹಿಳೆಯರ ಎಪಿಯಲ್ಲಿ ಭಾರತಕ್ಕೆ ಮೂರು ಪದಕ
ಹಿರಿಯ ಮಹಿಳೆಯರ ಎಪಿ ವಿಭಾಗದಲ್ಲಿ ಭಾರತ ಮೂರು ಪದಕಗಳನ್ನು ಗೆದ್ದುಕೊಂಡಿತು. ತನಿಷ್ಕಾ ಖಾತ್ರಿ ಚಿನ್ನ, ಖುಷಿ ದಭಾಡೆ ಬೆಳ್ಳಿ ಹಾಗೂ ಪ್ರಾಚಿ ಲೋಹನ್ ಕಂಚಿನ ಪದಕ ಗೆದ್ದರು.
ಪ್ರಾಚಿ ಲೋಹನ್ ಆಸ್ಟ್ರೇಲಿಯಾದ ಹ್ಯಾರಿಸನ್ ಆಶ್ಲಿ ಅವರೊಂದಿಗೆ ಮೂರನೇ ಸ್ಥಾನ ಹಂಚಿಕೊಂಡರು.
ಮಹಿಳೆಯರ ಸ್ಯಾಬರ್ನಲ್ಲೂ ಪದಕದ ಸಾಧನೆ
ಮಹಿಳೆಯರ ವೈಯಕ್ತಿಕ ಸ್ಯಾಬರ್ ವಿಭಾಗದಲ್ಲಿ ಭಾರತ ಮೂರು ಪದಕಗಳನ್ನು ತನ್ನದಾಗಿಸಿಕೊಂಡಿತು. ಆಖಾರಿ ಬೆಳ್ಳಿ ಪದಕ ಗೆದ್ದರೆ, ಶ್ರುತಿ ಜೋಶಿ ಮತ್ತು ಜೆಫರ್ಲಿನ್ ಕಂಚಿನ ಪದಕಗಳನ್ನು ಪಡೆದುಕೊಂಡರು. ಇಂಗ್ಲೆಂಡ್ನ ಬ್ರಿಯರ್ಲಿ ಚಿನ್ನದ ಪದಕ ಗೆದ್ದರು.
ಭಾರತೀಯ ಫೆನ್ಸರ್ಗಳ ಸತತ ಪದಕ ಸಾಧನೆಯೊಂದಿಗೆ ಕಾಮನ್ವೆಲ್ತ್ ಚಾಂಪಿಯನ್ಶಿಪ್ನಲ್ಲಿ ದೇಶದ ಅಭಿಯಾನ ಮತ್ತಷ್ಟು ಬಲಗೊಂಡಿದೆ.
