ರಾಷ್ಟ್ರ ಪ್ರಶಸ್ತಿ ವಿಜೇತ ನಿರ್ದೇಶಕ-ಛಾಯಾಗ್ರಾಹಕ ಚೆಳಿಯನ್ ನಿಧನ; ತಮಿಳು ಚಿತ್ರರಂಗಕ್ಕೆ ತುಂಬಲಾರದ ನಷ್ಟ

ಚೆನ್ನೈ: ರಾಷ್ಟ್ರ ಪ್ರಶಸ್ತಿ ವಿಜೇತ ನಿರ್ದೇಶಕ ಹಾಗೂ ಖ್ಯಾತ ಛಾಯಾಗ್ರಾಹಕ ಚೆಳಿಯನ್ (Chezhiyan) ಅವರು ಶುಕ್ರವಾರ ಚೆನ್ನೈನಲ್ಲಿ ನಿಧನರಾದರು. ಅವರಿಗೆ 57 ವರ್ಷ ವಯಸ್ಸಾಗಿತ್ತು. ಕಳೆದ ಕೆಲವು ದಿನಗಳಿಂದ ಅನಾರೋಗ್ಯದಿಂದ ಬಳಲುತ್ತಿದ್ದ ಅವರು ಚಿಕಿತ್ಸೆ ಫಲಕಾರಿಯಾಗದೆ ಕೊನೆಯುಸಿರೆಳೆದಿದ್ದಾರೆ.

ತಮಿಳುನಾಡಿನ ಶಿವಗಂಗೈ ಜಿಲ್ಲೆಯಲ್ಲಿ ಜನಿಸಿದ ಚೆಳಿಯನ್ ಅವರು ಸಿವಿಲ್ ಎಂಜಿನಿಯರಿಂಗ್ ಪದವಿ ಪಡೆದ ಬಳಿಕ ಚಿತ್ರರಂಗ ಪ್ರವೇಶಿಸಿದರು. ಖ್ಯಾತ ಛಾಯಾಗ್ರಾಹಕ ಪಿ.ಸಿ. ಶ್ರೀರಾಮ್ ಅವರ ಬಳಿ ತರಬೇತಿ ಪಡೆದು ತಮ್ಮ ಸಿನಿ ಪಯಣ ಆರಂಭಿಸಿದರು.

2006ರಲ್ಲಿ ಬಿಡುಗಡೆಯಾದ ‘ತಂಬಿ’ ಚಿತ್ರದ ಮೂಲಕ ಸಹಾಯಕ ನಿರ್ದೇಶಕರಾಗಿ ಚಿತ್ರರಂಗಕ್ಕೆ ಕಾಲಿಟ್ಟ ಅವರು, ಚಿತ್ರದ ಛಾಯಾಗ್ರಾಹಕರು ಮಧ್ಯದಲ್ಲೇ ಹೊರನಡೆದ ನಂತರ ನಿರ್ದೇಶಕ ಸೀಮಾನ್ ಅವರ ವಿಶ್ವಾಸ ಪಡೆದು ಛಾಯಾಗ್ರಹಣದ ಹೊಣೆ ಹೊತ್ತರು. ಇದೇ ಅವರ ವೃತ್ತಿಜೀವನದ ಮಹತ್ವದ ತಿರುವಾಗಿ ಪರಿಣಮಿಸಿತು.

ಬಳಿಕ ಬಾಲಾಜಿ ಶಕ್ತಿವೇಲ್ ನಿರ್ದೇಶನದ ‘ಕಲ್ಲೂರಿ’ (2007) ಚಿತ್ರದ ಮೂಲಕ ಸ್ವತಂತ್ರ ಛಾಯಾಗ್ರಾಹಕರಾಗಿ ಗುರುತಿಸಿಕೊಂಡರು. ನಂತರ ‘ರೆಟ್ಟೈಸುಳಿ’ (2010), ‘ಮಗಿಳ್ಚಿ’ (2010), ‘ತೆನ್ಮೇರ್ಕು ಪರುವಕಾತ್ರು’ (2010), ‘ಪರದೇಸಿ’ (2013), ‘ತಾರೈ ತಪ್ಪಟ್ಟೈ’ (2016), ‘ಜೋಕರ್’ (2016) ಹಾಗೂ ‘ಕೊಂಡ್ರಾಲ್ ಪಾವಂ’ (2023) ಸೇರಿದಂತೆ ಹಲವು ಪ್ರಶಂಸಿತ ಚಿತ್ರಗಳಿಗೆ ಛಾಯಾಗ್ರಹಣ ಮಾಡಿದರು.

‘ಪರದೇಸಿ’ ಚಿತ್ರದ ಛಾಯಾಗ್ರಹಣಕ್ಕಾಗಿ ಅವರು 2013ರ BFI ಲಂಡನ್ ಫಿಲ್ಮ್ ಫೆಸ್ಟಿವಲ್‌ನಲ್ಲಿ ಅತ್ಯುತ್ತಮ ಛಾಯಾಗ್ರಾಹಕ ಪ್ರಶಸ್ತಿ ಪಡೆದಿದ್ದರು.

ರಾಷ್ಟ್ರ ಪ್ರಶಸ್ತಿ ತಂದುಕೊಟ್ಟ ‘ಟು ಲೆಟ್’

2017ರಲ್ಲಿ ಬಿಡುಗಡೆಯಾದ ‘ಟು ಲೆಟ್’ ಚಿತ್ರದ ಮೂಲಕ ಚೆಳಿಯನ್ ನಿರ್ದೇಶಕರಾಗಿಯೂ ಗುರುತಿಸಿಕೊಂಡರು. ಈ ಚಿತ್ರವು 65ನೇ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಯಲ್ಲಿ ಅತ್ಯುತ್ತಮ ತಮಿಳು ಚಿತ್ರ ಪ್ರಶಸ್ತಿಯನ್ನು ಪಡೆದುಕೊಂಡಿತು. ಇದೇ ಚಿತ್ರಕ್ಕಾಗಿ ಅವರು ಮಿಲಾನ್ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಅತ್ಯುತ್ತಮ ಛಾಯಾಗ್ರಾಹಕ ಪ್ರಶಸ್ತಿಯನ್ನೂ ಪಡೆದಿದ್ದರು.

ಸಾಹಿತ್ಯ, ಸಾಕ್ಷ್ಯಚಿತ್ರ ಮತ್ತು ಹೊಸ ಪ್ರತಿಭೆಗಳ ಮಾರ್ಗದರ್ಶಿ

ಚೆಳಿಯನ್ ಅವರು ಮಾಜಿ ರಾಷ್ಟ್ರಪತಿ ಡಾ. ಎ.ಪಿ.ಜೆ. ಅಬ್ದುಲ್ ಕಲಾಂ ಹಾಗೂ ಖ್ಯಾತ ಸಾಹಿತಿ ಜಯಕಾಂತನ್ ಕುರಿತ ಸಾಕ್ಷ್ಯಚಿತ್ರಗಳನ್ನೂ ನಿರ್ದೇಶಿಸಿದ್ದರು. ವಿಶ್ವ ಸಿನೆಮಾ ಕುರಿತಾಗಿ ಅವರು ಬರೆದ ಲೇಖನಗಳ ಸರಣಿ ನಂತರ ‘ಉಲಗ ಸಿನೆಮಾ’ ಎಂಬ ಪುಸ್ತಕವಾಗಿ ಪ್ರಕಟಗೊಂಡಿತ್ತು. ಅವರ ‘ಕರ್ಮೋನಿಯಂ’ ಕಿರುಕಥೆಗೆ ಕಥಾ ಪ್ರಶಸ್ತಿ ಕೂಡ ಲಭಿಸಿತ್ತು.

ಹೊಸ ಪ್ರತಿಭೆಗಳನ್ನು ಬೆಳೆಸುವ ಉದ್ದೇಶದಿಂದ ಅವರು ‘ದಿ ಫಿಲ್ಮ್ ಸ್ಕೂಲ್’ ಎಂಬ ಸಂಸ್ಥೆಯನ್ನು ಸ್ಥಾಪಿಸಿದ್ದರು. ಇತ್ತೀಚೆಗೆ ತಮ್ಮ 34 ವಿದ್ಯಾರ್ಥಿಗಳಿಂದ ಏಕಕಾಲದಲ್ಲಿ 34 ಸ್ವತಂತ್ರ ಚಲನಚಿತ್ರಗಳನ್ನು ನಿರ್ದೇಶಿಸುವ ಮಹತ್ವಾಕಾಂಕ್ಷಿ ಯೋಜನೆಗೆ ಚಾಲನೆ ನೀಡಿ ಗಮನ ಸೆಳೆದಿದ್ದರು.

ಚಿತ್ರರಂಗದಲ್ಲಿ ಶೋಕ

ತಮಿಳು ಚಿತ್ರರಂಗದ ಚಿಂತನಶೀಲ ಛಾಯಾಗ್ರಾಹಕರಲ್ಲಿ ಒಬ್ಬರೆಂದು ಗುರುತಿಸಿಕೊಂಡಿದ್ದ ಚೆಳಿಯನ್, ಕಲಾತ್ಮಕ ದೃಷ್ಟಿಕೋನ, ಸರಳ ವ್ಯಕ್ತಿತ್ವ ಹಾಗೂ ಸಿನೆಮಾದ ಮೇಲಿನ ಅಪಾರ ಪ್ರೀತಿಗಾಗಿ ಹೆಸರುವಾಸಿಯಾಗಿದ್ದರು. ಸಂಭಾವನೆಗಿಂತ ಕಲೆಗೆ ಹೆಚ್ಚಿನ ಮಹತ್ವ ನೀಡುತ್ತಿದ್ದ ಅವರು, ಹಲವಾರು ಚಿತ್ರಗಳಿಗೆ ಯಾವುದೇ ಸಂಭಾವನೆ ಪಡೆಯದೇ ಕೆಲಸ ಮಾಡಿದ್ದರು.

ಅವರ ಪಾರ್ಥಿವ ಶರೀರವನ್ನು ಅಂತಿಮ ದರ್ಶನಕ್ಕಾಗಿ ನಿರ್ದೇಶಕ ಸೀಮಾನ್ ಅವರ ‘ನಾಮ್ ತಮಿಳರ್ ಕಚ್ಚಿ’ ಕಚೇರಿಗೆ ಕೊಂಡೊಯ್ಯಲಾಗಿದ್ದು, ಚಿತ್ರರಂಗದ ಗಣ್ಯರು, ಅಭಿಮಾನಿಗಳು ಹಾಗೂ ಸಾರ್ವಜನಿಕರು ಅಂತಿಮ ನಮನ ಸಲ್ಲಿಸುತ್ತಿದ್ದಾರೆ.

ಚೆಳಿಯನ್ ಅವರ ಅಗಲಿಕೆಗೆ ಪತ್ನಿ ಪ್ರೇಮಾ ಹಾಗೂ ಪುತ್ರಿ ಅಜಿತಾ ಸೇರಿದಂತೆ ಅಪಾರ ಅಭಿಮಾನಿಗಳು ಕಂಬನಿ ಮಿಡಿದಿದ್ದಾರೆ.