ಮುಂಬೈ: ಭಾರತದ ಕರಾವಳಿ ಪ್ರದೇಶಗಳಲ್ಲಿ ಜಲಾಂತರ್ಗಾಮಿ ನೌಕೆಗಳಿಂದ ಎದುರಾಗಬಹುದಾದ ಬೆದರಿಕೆಗಳನ್ನು ಪತ್ತೆಹಚ್ಚಿ ಎದುರಿಸುವ ಸಾಮರ್ಥ್ಯವನ್ನು ಹೆಚ್ಚಿಸುವ ಉದ್ದೇಶದಿಂದ, ಭಾರತೀಯ ನೌಕಾಪಡೆಗೆ ಮೂರನೇ ಜಲಾಂತರ್ಗಾಮಿ ನಿಗ್ರಹ ಅಲ್ಪಆಳದ ನೀರಿನ ಯುದ್ಧನೌಕೆ ‘ಐಎನ್‌ಎಸ್ ಮಂಗ್ರೋಲ್’ ಸೇರ್ಪಡೆಯಾಗಿದೆ.
ಕೊಚ್ಚಿಯ ಕೊಚ್ಚಿನ್ ಶಿಪ್‌ಯಾರ್ಡ್ ಲಿಮಿಟೆಡ್ ನಿರ್ಮಿಸಿರುವ ಈ ನೌಕೆಯನ್ನು ಮುಂಬೈನ ನೌಕಾ ಡಾಕ್‌ಯಾರ್ಡ್‌ನಲ್ಲಿ ನಡೆದ ಸಮಾರಂಭದಲ್ಲಿ ನೌಕಾಪಡೆಗೆ ಅಧಿಕೃತವಾಗಿ ಸೇರ್ಪಡೆಗೊಳಿಸಲಾಯಿತು. ಪಶ್ಚಿಮ ನೌಕಾ ಕಮಾಂಡ್‌ನ ಫ್ಲ್ಯಾಗ್ ಆಫೀಸರ್ ಕಮಾಂಡಿಂಗ್-ಇನ್-ಚೀಫ್ ವೈಸ್ ಅಡ್ಮಿರಲ್ ಸಂಜಯ್ ವತ್ಸಾಯನ್ ಸಮಾರಂಭದ ಅಧ್ಯಕ್ಷತೆ ವಹಿಸಿದ್ದರು.
ಕಾರ್ಯಕ್ರಮದಲ್ಲಿ ಮಾತನಾಡಿದ ವೈಸ್ ಅಡ್ಮಿರಲ್ ವತ್ಸಾಯನ್, ಶೇ.80ಕ್ಕೂ ಹೆಚ್ಚು ಸ್ವದೇಶಿ ಪರಿಕರಗಳನ್ನು ಹೊಂದಿರುವ ಈ ಯುದ್ಧನೌಕೆ ಭಾರತದ ಎಂಜಿನಿಯರಿಂಗ್ ಸಾಮರ್ಥ್ಯ, ತಾಂತ್ರಿಕ ಪ್ರಗತಿ ಮತ್ತು ಸ್ವಾವಲಂಬನೆಯ ಸಂಕಲ್ಪವನ್ನು ಪ್ರತಿಬಿಂಬಿಸುತ್ತದೆ ಎಂದು ಹೇಳಿದರು.
ನೌಕಾಪಡೆಯ ವಿಸ್ತರಣೆಯ ಕುರಿತು ಮಾಹಿತಿ ನೀಡಿದ ಅವರು, 2026ರಲ್ಲಿ ಈವರೆಗೆ 10 ನೌಕೆಗಳನ್ನು ಸೇರ್ಪಡೆಗೊಳಿಸಲಾಗಿದ್ದು, ಇನ್ನೂ ಎಂಟು ನೌಕೆಗಳು ಶೀಘ್ರದಲ್ಲೇ ಸೇರ್ಪಡೆಯಾಗುವ ನಿರೀಕ್ಷೆಯಿದೆ ಎಂದು ತಿಳಿಸಿದರು. 2034ರ ವೇಳೆಗೆ ನೌಕಾಪಡೆಯ ಸುಮಾರು ಶೇ.60ರಷ್ಟು ವೇದಿಕೆಗಳ ಸರಾಸರಿ ವಯಸ್ಸು 10 ವರ್ಷಕ್ಕಿಂತ ಕಡಿಮೆ ಇರಲಿದೆ ಎಂಬ ನಿರೀಕ್ಷೆಯನ್ನೂ ಅವರು ಹಂಚಿಕೊಂಡರು.
ಗುಜರಾತ್‌ನ ಕರಾವಳಿ ಪಟ್ಟಣದ ಹೆಸರಿನ ನೌಕೆ
ಗುಜರಾತ್‌ನ ಜುನಾಗಢ ಜಿಲ್ಲೆಯ ಪ್ರಮುಖ ಮೀನುಗಾರಿಕಾ ಬಂದರು ಪಟ್ಟಣವಾದ ಮಂಗ್ರೋಲ್‌ನ ಹೆಸರನ್ನು ಈ ನೌಕೆಗೆ ಇಡಲಾಗಿದೆ. ಇದೇ ಹೆಸರಿನ ಹಿಂದಿನ ಐಎನ್‌ಎಸ್ ಮಂಗ್ರೋಲ್ ನೌಕಾಪಡೆಯಲ್ಲಿ ಗಣಿ ಪತ್ತೆ ಮತ್ತು ತೆರವು ಕಾರ್ಯ ನಿರ್ವಹಿಸುವ ನೌಕೆಯಾಗಿ ಸೇವೆ ಸಲ್ಲಿಸಿತ್ತು. ಆ ನೌಕೆ 2004ರ ಏಪ್ರಿಲ್ 7ರಂದು ಸೇವೆಯಿಂದ ನಿವೃತ್ತಿಯಾಗಿತ್ತು.
ಆಧುನಿಕ ಸಮುದ್ರ ಭದ್ರತಾ ಸವಾಲುಗಳನ್ನು ಎದುರಿಸುವ ಉದ್ದೇಶದಿಂದ ಹೊಸ ಐಎನ್‌ಎಸ್ ಮಂಗ್ರೋಲ್ ಅನ್ನು ವಿನ್ಯಾಸಗೊಳಿಸಲಾಗಿದೆ. ಕರಾವಳಿ ಮತ್ತು ಅಲ್ಪಆಳದ ಸಮುದ್ರ ಪ್ರದೇಶಗಳಲ್ಲಿ ನೀರಿನೊಳಗಿನ ಬೆದರಿಕೆಗಳನ್ನು ಪತ್ತೆಹಚ್ಚಿ ನಿಗ್ರಹಿಸುವುದು ಇದರ ಪ್ರಮುಖ ಕಾರ್ಯವಾಗಿದೆ.
ಆಧುನಿಕ ಶಸ್ತ್ರಾಸ್ತ್ರ, ಸಂವೇದಕಗಳ ಅಳವಡಿಕೆ
ಐಎನ್‌ಎಸ್ ಮಂಗ್ರೋಲ್‌ನಲ್ಲಿ ಆಧುನಿಕ ಶಸ್ತ್ರಾಸ್ತ್ರಗಳು ಮತ್ತು ಪತ್ತೆ ವ್ಯವಸ್ಥೆಗಳನ್ನು ಅಳವಡಿಸಲಾಗಿದೆ. ಇವುಗಳಲ್ಲಿ ‘ಅಭಯ್’ ಹಲ್‌-ಮೌಂಟೆಡ್ ಸೋನಾರ್, ಹಗುರ ತೂಕದ ಟಾರ್ಪಿಡೊಗಳು, ಸ್ವದೇಶಿ ಜಲಾಂತರ್ಗಾಮಿ ನಿಗ್ರಹ ರಾಕೆಟ್ ಉಡಾವಣಾ ವ್ಯವಸ್ಥೆ ಹಾಗೂ ‘ಮರೀಚ್’ ಸುಧಾರಿತ ಟಾರ್ಪಿಡೊ ಡಿಕಾಯ್ ವ್ಯವಸ್ಥೆ ಸೇರಿವೆ.
ಈ ತಂತ್ರಜ್ಞಾನಗಳು ಸಮುದ್ರದಾಳದ ಬೆದರಿಕೆಗಳನ್ನು ಗುರುತಿಸುವುದು ಮತ್ತು ಅವುಗಳನ್ನು ಎದುರಿಸುವಲ್ಲಿ ನೌಕಾಪಡೆಯ ಕಾರ್ಯಾಚರಣಾ ಸಾಮರ್ಥ್ಯವನ್ನು ಹೆಚ್ಚಿಸಲು ನೆರವಾಗಲಿವೆ.
