ಸಮರ್ಕಂಡ್: ಭಾರತೀಯ ಮೂಲದ ಇಂಗ್ಲೆಂಡ್ ಚೆಸ್ ಪ್ರತಿಭೆ ಬೋಧನಾ ಶಿವಾನಂದನ್ ವಿಶ್ವ ಚೆಸ್‌ನಲ್ಲಿ ಹೊಸ ಇತಿಹಾಸ ನಿರ್ಮಿಸಿದ್ದಾರೆ. ಕೇವಲ 11ನೇ ವಯಸ್ಸಿನಲ್ಲಿ ಮಹಿಳಾ ಗ್ರ್ಯಾಂಡ್‌ಮಾಸ್ಟರ್ (WGM) ಪಟ್ಟಕ್ಕೆ ಅಗತ್ಯವಿರುವ ಮೂರನೇ ಹಾಗೂ ಅಂತಿಮ ನಾರ್ಮ್‌ನ್ನು ಪೂರ್ಣಗೊಳಿಸುವ ಮೂಲಕ ಅತಿ ಕಿರಿಯ WGM ಸಾಧನೆಯ ದಾಖಲೆಯನ್ನು ತಮ್ಮದಾಗಿಸಿಕೊಂಡಿದ್ದಾರೆ. ಈ ಸಾಧನೆ ಉಜ್ಬೇಕಿಸ್ತಾನದ ಸಮರ್ಕಂಡ್‌ನಲ್ಲಿ ನಡೆದ 46ನೇ ಚೆಸ್ ಒಲಿಂಪಿಯಾಡ್‌ನಲ್ಲಿ ಮೂಡಿಬಂದಿದೆ.
ಇಂಗ್ಲೆಂಡ್‌ನ ಮೊದಲ ಬೋರ್ಡ್‌ನಲ್ಲಿ ಅದ್ಭುತ ಆಟ
11 ವರ್ಷದ ಬೋಧನಾ ಒಲಿಂಪಿಯಾಡ್‌ನಲ್ಲಿ ಇಂಗ್ಲೆಂಡ್ ಮಹಿಳಾ ತಂಡದ ಮೊದಲ ಬೋರ್ಡ್‌ನಲ್ಲಿ ಎಲ್ಲಾ 11 ಸುತ್ತುಗಳಲ್ಲೂ ಆಡಿದರು. ಟೂರ್ನಿಯಲ್ಲಿ ಒಟ್ಟು 8 ಅಂಕ ಗಳಿಸುವ ಮೂಲಕ ಗಮನ ಸೆಳೆದರು. FIDE ಪ್ರಕಾರ, ಅಂತಿಮ WGM ನಾರ್ಮ್ ಪೂರ್ಣಗೊಳಿಸಿದ ಅವರು ಈ ಪಟ್ಟದ ಮಾನದಂಡಗಳನ್ನು ಪೂರೈಸಿದ ಅತಿ ಕಿರಿಯ ಆಟಗಾರ್ತಿಯಾಗಿದ್ದಾರೆ.
ಇದೇ ಪ್ರದರ್ಶನದಿಂದ ಬೋಧನಾ ಅವರಿಗೆ ಎರಡನೇ ಇಂಟರ್‌ನ್ಯಾಷನಲ್ ಮಾಸ್ಟರ್ (IM) ನಾರ್ಮ್ ಕೂಡ ಲಭಿಸಿದೆ. ಹೀಗಾಗಿ ಮುಂದಿನ ಹಂತದಲ್ಲಿ IM ಪಟ್ಟದತ್ತ ಸಾಗಲು ಮತ್ತಷ್ಟು ಹತ್ತಿರವಾಗಿದ್ದಾರೆ.
ಕೋವಿಡ್ ಲಾಕ್‌ಡೌನ್‌ನಲ್ಲಿ ಆರಂಭವಾದ ಚೆಸ್ ಪಯಣ
ಬೋಧನಾಳ ಚೆಸ್ ಪಯಣ ಕೋವಿಡ್-19 ಲಾಕ್‌ಡೌನ್ ಅವಧಿಯಲ್ಲಿ ಆರಂಭವಾಯಿತು. ಕುಟುಂಬದ ಸ್ನೇಹಿತರೊಬ್ಬರಿಂದ ಚೆಸ್‌ಬೋರ್ಡ್ ಪರಿಚಯವಾದ ಬಳಿಕ ಆಟದತ್ತ ಆಸಕ್ತಿ ಬೆಳೆಸಿಕೊಂಡ ಅವರು ಕಡಿಮೆ ಅವಧಿಯಲ್ಲೇ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ದಾಖಲೆಗಳನ್ನು ಬರೆಯಲಾರಂಭಿಸಿದರು.
2026ರ ಬ್ರಿಟಿಷ್ ಚೆಸ್ ಚಾಂಪಿಯನ್‌ಶಿಪ್‌ನಲ್ಲಿಯೂ ಬೋಧನಾ ಗಮನಾರ್ಹ ಸಾಧನೆ ಮಾಡಿದ್ದು, ಬ್ರಿಟನ್‌ನ ಅತಿ ಕಿರಿಯ ಮಹಿಳಾ ಚಾಂಪಿಯನ್ ಎಂಬ ದಾಖಲೆ ನಿರ್ಮಿಸಿದ್ದರು.
ಒಲಿಂಪಿಯಾಡ್‌ನಲ್ಲೂ ದಾಖಲೆಗಳ ಸರಣಿ
ಸಮರ್ಕಂಡ್‌ನಲ್ಲಿ ನಡೆದ ಈ ಒಲಿಂಪಿಯಾಡ್ ಬೋಧನಾಳಿಗೆ ವಿಶೇಷವಾಗಿತ್ತು. ಎರಡು ವರ್ಷಗಳ ಹಿಂದೆ ಬುಡಾಪೆಸ್ಟ್‌ನಲ್ಲಿ ನಡೆದ ಒಲಿಂಪಿಯಾಡ್‌ಗೆ 9ನೇ ವಯಸ್ಸಿನಲ್ಲಿ ಪಾದಾರ್ಪಣೆ ಮಾಡಿದ್ದ ಅವರು ಆಗ ನಾಲ್ಕನೇ ಬೋರ್ಡ್‌ನಲ್ಲಿ ಆಡಿದ್ದರು. ಈ ಬಾರಿ ಇಂಗ್ಲೆಂಡ್ ತಂಡವು ಅವರನ್ನು ಮೊದಲ ಬೋರ್ಡ್‌ನಲ್ಲಿ ಕಣಕ್ಕಿಳಿಸಿತು.
ಆ ಜವಾಬ್ದಾರಿಯನ್ನು ಸಮರ್ಥವಾಗಿ ನಿಭಾಯಿಸಿದ ಬೋಧನಾ, 11 ಪಂದ್ಯಗಳಲ್ಲಿ 8 ಅಂಕ ಗಳಿಸುವ ಜತೆಗೆ WGMನ ಅಂತಿಮ ನಾರ್ಮ್ ಪೂರೈಸಿದರು. ಅವರ ಸಾಧನೆಯನ್ನು FIDE ಅಧಿಕೃತವಾಗಿ ದಾಖಲಿಸಿದೆ.
ಇನ್ನೂ ದೊಡ್ಡ ಗುರಿಯತ್ತ ಬೋಧನಾ
ಮಹಿಳಾ ಗ್ರ್ಯಾಂಡ್‌ಮಾಸ್ಟರ್ ಪಟ್ಟದ ಅಗತ್ಯ ಮಾನದಂಡಗಳನ್ನು ಪೂರ್ಣಗೊಳಿಸಿರುವ ಬೋಧನಾ ಇದೀಗ ಇಂಟರ್‌ನ್ಯಾಷನಲ್ ಮಾಸ್ಟರ್ (IM) ಪಟ್ಟದತ್ತ ಗಮನ ಹರಿಸುತ್ತಿದ್ದಾರೆ. ಒಲಿಂಪಿಯಾಡ್‌ನಲ್ಲಿ ಪಡೆದ ಎರಡನೇ IM ನಾರ್ಮ್ ಈ ಗುರಿಗೆ ಮತ್ತೊಂದು ಹೆಜ್ಜೆಯಾಗಿದೆ.
ಬ್ರಿಟಿಷ್ ಚೆಸ್‌ನಲ್ಲಿ ಈಗಾಗಲೇ ಹಲವು ವಯಸ್ಸಿನ ದಾಖಲೆಗಳನ್ನು ಮುರಿದಿರುವ ಬೋಧನಾ, ತಮ್ಮ ಚೆಸ್ ಪಯಣವನ್ನು ಮುಂದುವರಿಸಿ ಇನ್ನಷ್ಟು ದಾಖಲೆಗಳನ್ನು ನಿರ್ಮಿಸುವ ಆಸೆ ವ್ಯಕ್ತಪಡಿಸಿದ್ದಾರೆ.
