ವಾಷಿಂಗ್ಟನ್: ಪೇಟೆಂಟ್ ಹೊಂದಿರುವ ಕೆಲವು ಔಷಧಗಳ ಮೇಲೆ ಶೇ.100ರಷ್ಟು ಸುಂಕ ಜಾರಿಗೆ ಅಮೆರಿಕ ಸಿದ್ಧತೆ ನಡೆಸುತ್ತಿರುವ ನಡುವೆಯೇ, ಭಾರತ ಸೇರಿದಂತೆ 20 ದೇಶಗಳು ಮತ್ತು ವ್ಯಾಪಾರ ವ್ಯಾಪ್ತಿಗಳಿಗೆ ಸೇರಿದ ನಿರ್ದಿಷ್ಟ ವಿಶೇಷ ಔಷಧಗಳು ಹಾಗೂ ಅವುಗಳಿಗೆ ಸಂಬಂಧಿಸಿದ ಔಷಧೀಯ ಘಟಕಗಳಿಗೆ ಶೂನ್ಯ ಸುಂಕದ ಅವಕಾಶ ನೀಡಲಾಗಿದೆ. ಅಮೆರಿಕದ ವಾಣಿಜ್ಯ ಇಲಾಖೆಯ ಅಧಿಸೂಚನೆಯಲ್ಲಿ ಈ ವಿನಾಯಿತಿ ಪಟ್ಟಿ ಪ್ರಕಟಿಸಲಾಗಿದೆ.
ಈ ಕ್ರಮವು ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು 2026ರ ಏಪ್ರಿಲ್ 2ರಂದು ಹೊರಡಿಸಿದ್ದ ಅಧ್ಯಕ್ಷೀಯ ಘೋಷಣೆಯಡಿ ಔಷಧ ಮತ್ತು ಔಷಧೀಯ ಘಟಕಗಳ ಆಮದು ಕುರಿತು ಸೆಕ್ಷನ್ 232 ಅಡಿಯಲ್ಲಿ ಕೈಗೊಳ್ಳಲಾಗುತ್ತಿರುವ ಕ್ರಮದ ಭಾಗವಾಗಿದೆ. ಇದರ ಪ್ರಮುಖ ಉದ್ದೇಶ ಅಮೆರಿಕದಲ್ಲೇ ಔಷಧ ಉತ್ಪಾದನೆಯನ್ನು ಉತ್ತೇಜಿಸುವುದಾಗಿದೆ.
ಯಾವ ಔಷಧಗಳಿಗೆ ವಿನಾಯಿತಿ?
ಅಮೆರಿಕದ ವಾಣಿಜ್ಯ ಇಲಾಖೆಯ ಪ್ರಕಾರ, ಕೆಲವು ನಿರ್ದಿಷ್ಟ ವರ್ಗದ ಔಷಧಗಳಿಗೆ ಶೂನ್ಯ ಪ್ರಮಾಣದ ಹೆಚ್ಚುವರಿ ಸುಂಕ ಅನ್ವಯಿಸಬಹುದು. ಇದರಲ್ಲಿ ಅಪರೂಪದ ಕಾಯಿಲೆಗಳ ಚಿಕಿತ್ಸೆಗೆ ಬಳಸುವ ಔಷಧಗಳು, ಫಲವತ್ತತೆ ಚಿಕಿತ್ಸೆಯ ಔಷಧಗಳು, ಸೆಲ್ ಥೆರಪಿ ಉತ್ಪನ್ನಗಳು, ಜೀನ್ ಥೆರಪಿ ಉತ್ಪನ್ನಗಳು ಮತ್ತು ಆ್ಯಂಟಿಬಾಡಿ-ಡ್ರಗ್ ಕಂಜುಗೇಟ್‌ಗಳು (ADCs) ಸೇರಿವೆ.
ಇದಲ್ಲದೆ, ಕೆಲವು ನ್ಯೂಕ್ಲಿಯರ್ ಮೆಡಿಸಿನ್‌ಗಳು, ಪ್ಲಾಸ್ಮಾ ಆಧಾರಿತ ಚಿಕಿತ್ಸೆಗಳು, ರಾಸಾಯನಿಕ–ಜೈವಿಕ–ವಿಕಿರಣ–ಅಣು ಅಪಾಯಗಳಿಗೆ ಸಂಬಂಧಿಸಿದ ವೈದ್ಯಕೀಯ ಪ್ರತಿಕ್ರಮಗಳು ಹಾಗೂ ಪಶುವೈದ್ಯಕೀಯ ಔಷಧಗಳಿಗೂ ಅರ್ಹತೆ ನೀಡಲಾಗಿದೆ. ಈ ಉತ್ಪನ್ನಗಳ ತಯಾರಿಕೆಗೆ ಬಳಸುವ ಸಂಬಂಧಿತ ಘಟಕಗಳಿಗೂ ಕೆಲವು ಸಂದರ್ಭಗಳಲ್ಲಿ ಇದೇ ಶೂನ್ಯ ಸುಂಕದ ವ್ಯವಸ್ಥೆ ಅನ್ವಯಿಸುತ್ತದೆ.
ಭಾರತ ಸೇರಿದಂತೆ 20 ದೇಶಗಳು
ಶೂನ್ಯ ಸುಂಕದ ಅರ್ಹ ಪಟ್ಟಿಯಲ್ಲಿ ಭಾರತದ ಜೊತೆಗೆ ಅರ್ಜೆಂಟಿನಾ, ಬಾಂಗ್ಲಾದೇಶ, ಕಾಂಬೋಡಿಯಾ, ಈಕ್ವೆಡಾರ್, ಎಲ್ ಸಾಲ್ವಡಾರ್, ಯುರೋಪಿಯನ್ ಯೂನಿಯನ್, ಗ್ವಾಟೆಮಾಲಾ, ಇಂಡೋನೇಷ್ಯಾ, ಜಪಾನ್, ಜೋರ್ಡನ್, ಮಲೇಷ್ಯಾ, ಉತ್ತರ ಮ್ಯಾಸಿಡೋನಿಯಾ, ದಕ್ಷಿಣ ಕೊರಿಯಾ, ಸ್ವಿಟ್ಜರ್‌ಲ್ಯಾಂಡ್, ಲಿಚ್ಟೆನ್‌ಸ್ಟೈನ್, ತೈವಾನ್, ಥಾಯ್ಲೆಂಡ್, ಬ್ರಿಟನ್ ಮತ್ತು ವಿಯೆಟ್ನಾಂ ಸೇರಿವೆ.
ಈ ದೇಶಗಳು ಹಾಗೂ ವ್ಯಾಪಾರ ವ್ಯಾಪ್ತಿಗಳೊಂದಿಗೆ ಅಮೆರಿಕ ಹೊಂದಿರುವ ಅಥವಾ ರೂಪಿಸುತ್ತಿರುವ ವ್ಯಾಪಾರ ಮತ್ತು ಭದ್ರತಾ ಚೌಕಟ್ಟು ಒಪ್ಪಂದಗಳ ಆಧಾರದ ಮೇಲೆ ಅರ್ಹ ಉತ್ಪನ್ನಗಳಿಗೆ ಶೂನ್ಯ ಸುಂಕ ನೀಡುವ ಅವಕಾಶ ಕಲ್ಪಿಸಲಾಗಿದೆ ಎಂದು ವಾಣಿಜ್ಯ ಇಲಾಖೆಯ ಅಧಿಸೂಚನೆ ತಿಳಿಸಿದೆ.
ಶೇ.100ರ ಸುಂಕ ಎಲ್ಲ ಔಷಧಗಳಿಗೂ ಅಲ್ಲ
ಹೊಸ ವ್ಯವಸ್ಥೆಯ ಹಿನ್ನೆಲೆಯಲ್ಲಿ ಒಂದು ಪ್ರಮುಖ ಅಂಶವೆಂದರೆ, ಭಾರತದಿಂದ ಅಮೆರಿಕಕ್ಕೆ ರಫ್ತು ಆಗುವ ಎಲ್ಲಾ ಔಷಧಗಳ ಮೇಲೂ ಶೇ.100ರ ಸುಂಕ ವಿಧಿಸಲಾಗುವುದಿಲ್ಲ. ಈ ಕ್ರಮವು ನಿರ್ದಿಷ್ಟ ಪೇಟೆಂಟ್ ಹೊಂದಿರುವ ಔಷಧಗಳು ಮತ್ತು ಸಂಬಂಧಿತ ಔಷಧೀಯ ಘಟಕಗಳಿಗೆ ಸಂಬಂಧಿಸಿದೆ.
ಅದೇ ವೇಳೆ, ಅಮೆರಿಕದ ವಾಣಿಜ್ಯ ಇಲಾಖೆಯ ಅಧಿಸೂಚನೆಯ ಪ್ರಕಾರ ಜೆನೆರಿಕ್ ಔಷಧಗಳು ಮತ್ತು ಅವುಗಳ ಸಂಬಂಧಿತ ಘಟಕಗಳಿಗೆ ಪ್ರಸ್ತುತ ಸೆಕ್ಷನ್ 232 ಅಡಿಯಲ್ಲಿ ಈ ಔಷಧ ಸುಂಕ ಅನ್ವಯಿಸುವುದಿಲ್ಲ.
ಸೆಪ್ಟೆಂಬರ್ 29ರಿಂದ ಸುಂಕ ಜಾರಿಗೆ
ಟ್ರಂಪ್ ಆಡಳಿತದ ಏಪ್ರಿಲ್ ಘೋಷಣೆಯಡಿ ಕೆಲವು ಕಂಪನಿಗಳಿಗೆ ಈಗಾಗಲೇ ಕ್ರಮ ಜಾರಿಯಾಗಿದ್ದು, ಇತರೆ ವ್ಯಾಪ್ತಿಗೆ ಒಳಪಡುವ ಕಂಪನಿಗಳ ಮೇಲೆ ಸೆಪ್ಟೆಂಬರ್ 29, 2026ರಿಂದ ಶೇ.100ರ ಸುಂಕ ಅನ್ವಯಿಸುವಂತೆ ವ್ಯವಸ್ಥೆ ಮಾಡಲಾಗಿದೆ. ಕೆಲ ಉತ್ಪಾದಕರು ಅಮೆರಿಕದಲ್ಲೇ ಉತ್ಪಾದನೆ ಆರಂಭಿಸುವ ಯೋಜನೆಗಳಿಗೆ ಒಪ್ಪಿಗೆ ಪಡೆದಿದ್ದರೆ, ಅವರಿಗೆ ಬೇರೆ ದರದ ವ್ಯವಸ್ಥೆಯೂ ಇರಬಹುದಾಗಿದೆ.
ಭಾರತೀಯ ಔಷಧೋದ್ಯಮಕ್ಕೆ ಸಂಬಂಧಿಸಿದಂತೆ, ಹೊಸ ಅಧಿಸೂಚನೆಯ ಪ್ರಮುಖ ಅಂಶವೆಂದರೆ ಅರ್ಹ ವಿಶೇಷ ಔಷಧಗಳ ರಫ್ತಿಗೆ ನಿರ್ದಿಷ್ಟ ಷರತ್ತುಗಳಡಿ ಹೆಚ್ಚುವರಿ ಸುಂಕದಿಂದ ವಿನಾಯಿತಿ ದೊರೆಯುವ ಸಾಧ್ಯತೆ. ಇದು ಅಮೆರಿಕ ಮಾರುಕಟ್ಟೆಗೆ ವಿಶೇಷ ಔಷಧಗಳನ್ನು ಪೂರೈಸುವ ಭಾರತೀಯ ಕಂಪನಿಗಳಿಗೆ ಪ್ರಸ್ತುತ ವ್ಯಾಪಾರ ನೀತಿಯಲ್ಲಿ ಗಮನಾರ್ಹ ಬೆಳವಣಿಗೆಯಾಗಿದೆ.
