ನವದೆಹಲಿ: ಭಾರತದ ಸಾಫ್ಟ್‌ವೇರ್ ಸೇವೆಗಳ ರಫ್ತು 2025-26ನೇ ಹಣಕಾಸು ವರ್ಷದಲ್ಲಿ ಶೇ.8.2ರಷ್ಟು ಏರಿಕೆಯಾಗಿದ್ದು, 221.4 ಬಿಲಿಯನ್ ಡಾಲರ್‌ಗೆ ತಲುಪಿದೆ ಎಂದು ಭಾರತೀಯ ರಿಸರ್ವ್ ಬ್ಯಾಂಕ್ (RBI) ತಿಳಿಸಿದೆ.
ಆರ್‌ಬಿಐ ಬಿಡುಗಡೆ ಮಾಡಿರುವ ಸಾಫ್ಟ್‌ವೇರ್ ಮತ್ತು ಮಾಹಿತಿ ತಂತ್ರಜ್ಞಾನ ಆಧಾರಿತ ಸೇವೆಗಳ (ITeS) ರಫ್ತು ಕುರಿತ ವಾರ್ಷಿಕ ಸಮೀಕ್ಷೆಯಲ್ಲಿ ಈ ಮಾಹಿತಿ ಬಹಿರಂಗವಾಗಿದೆ. ಸಮೀಕ್ಷೆಗಾಗಿ ಒಟ್ಟು 7,569 ಸಾಫ್ಟ್‌ವೇರ್ ರಫ್ತು ಕಂಪನಿಗಳನ್ನು ಸಂಪರ್ಕಿಸಲಾಗಿತ್ತು. ಈ ಪೈಕಿ 2,363 ಕಂಪನಿಗಳು, ಅದರಲ್ಲೂ ಬಹುತೇಕ ದೊಡ್ಡ ಕಂಪನಿಗಳು, ಸಮೀಕ್ಷೆಗೆ ಪ್ರತಿಕ್ರಿಯಿಸಿವೆ.
ಸಮೀಕ್ಷೆಗೆ ಪ್ರತಿಕ್ರಿಯಿಸಿದ ಕಂಪನಿಗಳು ದೇಶದ ಅಂದಾಜು ಒಟ್ಟು ಸಾಫ್ಟ್‌ವೇರ್ ಸೇವೆಗಳ ರಫ್ತಿನ ಸುಮಾರು ಶೇ.89ರಷ್ಟು ಪಾಲನ್ನು ಹೊಂದಿವೆ. ಐಟಿ ಆಧಾರಿತ ಸೇವೆಗಳ (ITeS) ರಫ್ತಿನಲ್ಲಿ ಬಿಸಿನೆಸ್ ಪ್ರೊಸೆಸ್ ಔಟ್‌ಸೋರ್ಸಿಂಗ್ (BPO) ಸೇವೆಗಳು ಪ್ರಮುಖ ಘಟಕವಾಗಿ ಮುಂದುವರಿದಿವೆ.
ಅಮೆರಿಕವೇ ಪ್ರಮುಖ ರಫ್ತು ಮಾರುಕಟ್ಟೆ
ಭಾರತದ ಸಾಫ್ಟ್‌ವೇರ್ ಸೇವೆಗಳ ರಫ್ತಿಗೆ ಅಮೆರಿಕ ಅತಿದೊಡ್ಡ ಮಾರುಕಟ್ಟೆಯಾಗಿ ಮುಂದುವರಿದಿದೆ. ಒಟ್ಟು ರಫ್ತಿನಲ್ಲಿ ಅಮೆರಿಕದ ಪಾಲು ಶೇ.54.1ರಷ್ಟಿದ್ದರೆ, ಯುರೋಪ್ ಶೇ.31.8ರಷ್ಟು ಪಾಲು ಹೊಂದಿದೆ. ಇಂಗ್ಲೆಂಡ್‌ನ ಪಾಲು ಶೇ.15.4ರಷ್ಟಿದೆ.
ಭಾರತದ ಸಾಫ್ಟ್‌ವೇರ್ ಸೇವೆಗಳನ್ನು ಬಹುತೇಕ ಆಫ್‌ಸೈಟ್ ಮಾದರಿಯಲ್ಲಿ ಒದಗಿಸಲಾಗುತ್ತಿದ್ದು, ಒಟ್ಟು ರಫ್ತಿನಲ್ಲಿ ಇದರ ಪಾಲು ಶೇ.91.7ರಷ್ಟಿದೆ.
ವಿದೇಶಗಳಲ್ಲಿನ ವಾಣಿಜ್ಯ ಉಪಸ್ಥಿತಿಯ ಮೂಲಕ ಒದಗಿಸಲಾದ ಸೇವೆಗಳನ್ನೂ ಒಳಗೊಂಡಂತೆ ಭಾರತದ ಒಟ್ಟು ಸಾಫ್ಟ್‌ವೇರ್ ಸೇವೆಗಳ ರಫ್ತು 2025-26ರಲ್ಲಿ ಶೇ.9.5ರಷ್ಟು ಏರಿಕೆಯಾಗಿ 239.3 ಬಿಲಿಯನ್ ಡಾಲರ್‌ಗೆ ತಲುಪಿದೆ ಎಂದು ಆರ್‌ಬಿಐ ತಿಳಿಸಿದೆ.
ವಿದೇಶಿ ಅಂಗಸಂಸ್ಥೆಗಳ ಸ್ಥಳೀಯ ವ್ಯವಹಾರವೂ ಏರಿಕೆ
ಭಾರತೀಯ ಕಂಪನಿಗಳ ವಿದೇಶಿ ಅಂಗಸಂಸ್ಥೆಗಳ ಸ್ಥಳೀಯ ಸಾಫ್ಟ್‌ವೇರ್ ವ್ಯವಹಾರವೂ ಗಮನಾರ್ಹವಾಗಿ ಹೆಚ್ಚಾಗಿದೆ. 2024-25ರಲ್ಲಿ 13.9 ಬಿಲಿಯನ್ ಡಾಲರ್ ಇದ್ದ ಈ ಮೊತ್ತವು 2025-26ರಲ್ಲಿ 17.9 ಬಿಲಿಯನ್ ಡಾಲರ್‌ಗೆ ಏರಿಕೆಯಾಗಿದೆ.
ಈ ವಿಭಾಗದಲ್ಲಿಯೂ ಅಮೆರಿಕ ಮತ್ತು ಇಂಗ್ಲೆಂಡ್ ಪ್ರಮುಖ ಮಾರುಕಟ್ಟೆಗಳಾಗಿ ಮುಂದುವರಿದಿವೆ ಎಂದು ಆರ್‌ಬಿಐ ವಾರ್ಷಿಕ ಸಮೀಕ್ಷೆ ತಿಳಿಸಿದೆ.
