ನವದೆಹಲಿ: ರಾಷ್ಟ್ರೀಯ ಗ್ರಾಹಕ ಸಹಾಯವಾಣಿ (NCH) ಮೂಲಕ ದೇಶದ ಗ್ರಾಹಕರಿಗೆ ಮಹತ್ವದ ಪರಿಹಾರ ದೊರೆತಿದ್ದು, ಕಳೆದ 15 ತಿಂಗಳಲ್ಲಿ ₹105 ಕೋಟಿಗೂ ಹೆಚ್ಚು ಹಣವನ್ನು ಮರುಪಾವತಿಸಲು ಸಹಾಯ ಮಾಡಲಾಗಿದೆ.
2025ರ ಏಪ್ರಿಲ್ 25ರಿಂದ 2026ರ ಜುಲೈ 31ರವರೆಗೆ ಒಟ್ಟು 35 ವಲಯಗಳಿಗೆ ಸಂಬಂಧಿಸಿದ 1.66 ಲಕ್ಷಕ್ಕೂ ಅಧಿಕ ಮರುಪಾವತಿ ದೂರುಗಳನ್ನು NCH ಪರಿಹರಿಸಿದೆ. ಈ ಮೂಲಕ ಗ್ರಾಹಕರು ಗ್ರಾಹಕ ಆಯೋಗಗಳನ್ನು ಸಂಪರ್ಕಿಸಿ ಕಾನೂನು ಹೋರಾಟ ನಡೆಸುವ ಅಗತ್ಯವಿಲ್ಲದೆ, ಪ್ರಕರಣ ಪೂರ್ವ ಹಂತದಲ್ಲೇ ತ್ವರಿತ ಪರಿಹಾರ ಪಡೆಯಲು ಸಾಧ್ಯವಾಗಿದೆ ಎಂದು ಗ್ರಾಹಕ ವ್ಯವಹಾರಗಳು, ಆಹಾರ ಮತ್ತು ಸಾರ್ವಜನಿಕ ವಿತರಣಾ ಸಚಿವಾಲಯ ತಿಳಿಸಿದೆ.
ಇ-ಕಾಮರ್ಸ್ ದೂರುಗಳೇ ಹೆಚ್ಚು
ಮರುಪಾವತಿಗೆ ಸಂಬಂಧಿಸಿದ ದೂರುಗಳಲ್ಲಿ ಇ-ಕಾಮರ್ಸ್ ವಲಯವು ಅತಿ ಹೆಚ್ಚಿನ ಪಾಲು ಹೊಂದಿದೆ. ಈ ವಲಯಕ್ಕೆ ಸಂಬಂಧಿಸಿದ 1 ಲಕ್ಷಕ್ಕೂ ಅಧಿಕ ದೂರುಗಳ ಮೂಲಕ ಗ್ರಾಹಕರಿಗೆ ₹74 ಕೋಟಿಗೂ ಹೆಚ್ಚು ಹಣ ಮರುಪಾವತಿಸಲಾಗಿದೆ.
ಇದರ ನಂತರ ಪ್ರಯಾಣ ಮತ್ತು ಪ್ರವಾಸೋದ್ಯಮ ವಲಯ ಎರಡನೇ ಸ್ಥಾನದಲ್ಲಿದ್ದು, ಈ ಕ್ಷೇತ್ರಕ್ಕೆ ಸಂಬಂಧಿಸಿದ ದೂರುಗಳ ಮೂಲಕ ₹10 ಕೋಟಿಗೂ ಅಧಿಕ ಮೊತ್ತವನ್ನು ಗ್ರಾಹಕರಿಗೆ ಮರುಪಾವತಿಸಲಾಗಿದೆ.
ಡಿಜಿಟಲ್ ವ್ಯವಸ್ಥೆಯ ಮೂಲಕ ದೂರುಗಳ ಪರಿಹಾರ
ರಾಷ್ಟ್ರೀಯ ಗ್ರಾಹಕ ಸಹಾಯವಾಣಿ ‘ಕನ್ವರ್ಜೆನ್ಸ್’ ಆಧಾರಿತ ವ್ಯವಸ್ಥೆಯ ಮೂಲಕ ಕಾರ್ಯನಿರ್ವಹಿಸುತ್ತಿದ್ದು, ಗ್ರಾಹಕರ ದೂರುಗಳನ್ನು ಡಿಜಿಟಲ್ ಮೂಲಕ ಸಂಬಂಧಪಟ್ಟ ಕಂಪನಿಗಳಿಗೆ ರವಾನಿಸಿ, ನಿಗದಿತ ಅವಧಿಯೊಳಗೆ ಪರಿಹರಿಸಲು ಕ್ರಮ ಕೈಗೊಳ್ಳಲಾಗುತ್ತದೆ.
ದೇಶದ ಮಹಾನಗರಗಳಿಂದ ಹಿಡಿದು ದೂರದ ಪ್ರದೇಶಗಳವರೆಗೂ NCHಗೆ ಮರುಪಾವತಿ ಸೇರಿದಂತೆ ವಿವಿಧ ಗ್ರಾಹಕ ದೂರುಗಳು ದಾಖಲಾಗಿವೆ. ಇದರಿಂದ ದೇಶಾದ್ಯಂತ ಗ್ರಾಹಕರ ಕುಂದುಕೊರತೆ ಪರಿಹಾರಕ್ಕೆ NCH ಪ್ರಮುಖ ವೇದಿಕೆಯಾಗಿ ಕಾರ್ಯನಿರ್ವಹಿಸುತ್ತಿದೆ ಎಂದು ಸಚಿವಾಲಯ ತಿಳಿಸಿದೆ.
NCH ಮೂಲಕ 17 ಭಾಷೆಗಳಲ್ಲಿ ವಿವಿಧ ಸಂವಹನ ಮಾರ್ಗಗಳ ಮೂಲಕ ಗ್ರಾಹಕರಿಗೆ ದೂರು ಪರಿಹಾರ ಸೇವೆ ಲಭ್ಯವಿದೆ. ಗ್ರಾಹಕರು ತಮ್ಮ ಹಕ್ಕುಗಳನ್ನು ರಕ್ಷಿಸಿಕೊಳ್ಳಲು ಹಾಗೂ ಸಮಸ್ಯೆಗಳಿಗೆ ಪರಿಹಾರ ಪಡೆಯಲು ರಾಷ್ಟ್ರೀಯ ಗ್ರಾಹಕ ಸಹಾಯವಾಣಿಯನ್ನು ಸಕ್ರಿಯವಾಗಿ ಬಳಸಿಕೊಳ್ಳುವಂತೆ ಸಚಿವಾಲಯ ಸಲಹೆ ನೀಡಿದೆ.
