ಇಟಲಿ: ಭಾರತ ಮತ್ತು ಇಟಲಿ ದೇಶಗಳು ಪ್ರವಾಸೋದ್ಯಮ ಕ್ಷೇತ್ರದಲ್ಲಿನ ದ್ವಿಪಕ್ಷೀಯ ಸಹಕಾರವನ್ನು ಮತ್ತಷ್ಟು ವಿಸ್ತರಿಸಲು ಒಪ್ಪಿಗೆ ಸೂಚಿಸಿವೆ. ಇಟಲಿಯಲ್ಲಿ ನಡೆದ 2ನೇ ಭಾರತ–ಇಟಲಿ ಪ್ರವಾಸೋದ್ಯಮ ಜಂಟಿ ಕಾರ್ಯಕಾರಿ ಗುಂಪಿನ (JWG) ಸಭೆಯಲ್ಲಿ ಎರಡೂ ದೇಶಗಳ ಪ್ರತಿನಿಧಿಗಳು ಹಲವು ಪ್ರಮುಖ ವಿಚಾರಗಳ ಕುರಿತು ಚರ್ಚೆ ನಡೆಸಿದರು.
ಪ್ರವಾಸೋದ್ಯಮ ಕ್ಷೇತ್ರದಲ್ಲಿ ಪರಸ್ಪರ ಸಹಕಾರವನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ಪ್ರವಾಸೋದ್ಯಮ ದತ್ತಾಂಶ ವಿನಿಮಯ, ಕಡಿಮೆ ಪರಿಚಿತ ಪ್ರವಾಸಿ ತಾಣಗಳ ಪ್ರಚಾರ, ಚಲನಚಿತ್ರ ಪ್ರವಾಸೋದ್ಯಮ (Cine-Tourism), ಪ್ರವಾಸಿ ತಾಣಗಳ ಜೋಡಣೆ (Destination Twinning), ಕೌಶಲ್ಯಾಭಿವೃದ್ಧಿ ಮತ್ತು ಸಾಮರ್ಥ್ಯ ವೃದ್ಧಿ ಸೇರಿದಂತೆ ಹಲವು ವಿಷಯಗಳು ಸಭೆಯಲ್ಲಿ ಚರ್ಚೆಗೆ ಬಂದವು.
ಇದರ ಜೊತೆಗೆ, ಎರಡೂ ದೇಶಗಳ ಪ್ರವಾಸೋದ್ಯಮ ವಲಯದ ಉದ್ಯಮಿಗಳು ಹಾಗೂ ಸಂಬಂಧಿತ ಸಂಸ್ಥೆಗಳ ನಡುವೆ ವ್ಯವಹಾರದಿಂದ ವ್ಯವಹಾರಕ್ಕೆ (B2B) ಸಂಪರ್ಕವನ್ನು ಮತ್ತಷ್ಟು ಬಲಪಡಿಸುವ ಬಗ್ಗೆಯೂ ಮಾತುಕತೆ ನಡೆಯಿತು.
ಸಭೆಯ ಪ್ರಮುಖ ಫಲಿತಾಂಶವಾಗಿ, ಗುರುತಿಸಲಾದ ಸಹಕಾರದ ಕ್ಷೇತ್ರಗಳಲ್ಲಿ ಮುಂದಿನ ಕಾರ್ಯಚಟುವಟಿಕೆಗಳನ್ನು ವೇಗಗೊಳಿಸಲು ವಿಶೇಷ ತಾಂತ್ರಿಕ ತಂಡಗಳನ್ನು ರಚಿಸುವುದು ಹಾಗೂ ಸಂಪರ್ಕಾಧಿಕಾರಿಗಳನ್ನು ನೇಮಿಸುವುದು ಎಂದು ಭಾರತ ಮತ್ತು ಇಟಲಿ ಒಪ್ಪಿಕೊಂಡಿವೆ. ಇದರಿಂದ ಉಭಯ ದೇಶಗಳ ಸಂಬಂಧಿತ ಸಂಸ್ಥೆಗಳ ನಡುವೆ ನಿರಂತರ ಸಮನ್ವಯ ಮತ್ತು ಸಹಕಾರಕ್ಕೆ ವೇದಿಕೆ ಸಿಗಲಿದೆ.
ಇದೇ ವೇಳೆ, 2027ರಲ್ಲಿ ಪ್ರಸ್ತಾಪಿಸಲಾಗಿರುವ ಭಾರತ–ಇಟಲಿ ಸಂಸ್ಕೃತಿ ಮತ್ತು ಪ್ರವಾಸೋದ್ಯಮ ವರ್ಷದ ಹಿನ್ನೆಲೆಯಲ್ಲಿ ಸಹಕಾರದ ಹೊಸ ಅವಕಾಶಗಳ ಬಗ್ಗೆಯೂ ಚರ್ಚೆ ನಡೆಯಿತು. ಸಾಂಸ್ಕೃತಿಕ ವಿನಿಮಯ ಮತ್ತು ಪ್ರವಾಸೋದ್ಯಮ ಸಂಬಂಧಗಳನ್ನು ಮತ್ತಷ್ಟು ಗಟ್ಟಿಗೊಳಿಸುವ ಉದ್ದೇಶದಿಂದ ಈ ಅವಕಾಶಗಳನ್ನು ಬಳಸಿಕೊಳ್ಳಲು ಎರಡೂ ದೇಶಗಳು ಒತ್ತು ನೀಡಿವೆ.
