ಜಾಗತಿಕ ಮಾರುಕಟ್ಟೆಗಳಲ್ಲಿ ಮಿಶ್ರ ಚಿತ್ರಣ: ಜಪಾನ್–ದಕ್ಷಿಣ ಕೊರಿಯಾ ಸೂಚ್ಯಂಕಗಳಿಗೆ ಲಾಭ

ನವದೆಹಲಿ: ಜಾಗತಿಕ ಮಾರುಕಟ್ಟೆಗಳಲ್ಲಿ ಇಂದು ಮಿಶ್ರ ಪ್ರವೃತ್ತಿ ಕಂಡುಬಂದಿದೆ. ಏಷ್ಯಾದ ಪ್ರಮುಖ ಷೇರುಪೇಟೆಗಳು ಏರಿಕೆಯೊಂದಿಗೆ ವಹಿವಾಟು ನಡೆಸಿದರೆ, ಯುರೋಪ್‌ನ ಪ್ರಮುಖ ಸೂಚ್ಯಂಕಗಳಲ್ಲಿ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ.

ಏಷ್ಯಾ ಮಾರುಕಟ್ಟೆಗಳಲ್ಲಿ ದಕ್ಷಿಣ ಕೊರಿಯಾದ ಕೋಸ್ಪಿ ಸೂಚ್ಯಂಕ ಶೇ.3.6ರಷ್ಟು ಏರಿಕೆ ಕಂಡಿದೆ. ಜಪಾನ್‌ನ ನಿಕ್ಕೈ 225 ಸೂಚ್ಯಂಕವೂ ಸುಮಾರು ಶೇ.1.2ರಷ್ಟು ಹೆಚ್ಚಳ ದಾಖಲಿಸಿದೆ.

ಯುರೋಪ್‌ನ ಪ್ರಮುಖ ಷೇರುಪೇಟೆಗಳಲ್ಲಿ ಜರ್ಮನಿಯ DAX ಸೂಚ್ಯಂಕ ಶೇ.0.4ರಷ್ಟು ಏರಿಕೆಯೊಂದಿಗೆ ವಹಿವಾಟು ನಡೆಸುತ್ತಿದ್ದರೆ, ಲಂಡನ್‌ನ FTSE 100 ಸೂಚ್ಯಂಕ ಶೇ.0.3ರಷ್ಟು ಕುಸಿತ ಕಂಡಿದೆ.

ಬ್ರಿಟನ್ ಆರ್ಥಿಕ ಬೆಳವಣಿಗೆ ಶೇ.0.4ಕ್ಕೆ ಇಳಿಕೆ

ಆರ್ಥಿಕ ಮುನ್ನೋಟದ ವಿಚಾರದಲ್ಲಿ, ಬ್ರಿಟನ್‌ನ ನೈಜ ಒಟ್ಟು ದೇಶೀಯ ಉತ್ಪನ್ನ (GDP) ಪ್ರಸಕ್ತ ವರ್ಷದ ಏಪ್ರಿಲ್‌ನಿಂದ ಜೂನ್‌ವರೆಗಿನ ತ್ರೈಮಾಸಿಕದಲ್ಲಿ ಶೇ.0.4ರಷ್ಟು ಬೆಳವಣಿಗೆ ದಾಖಲಿಸಿದೆ ಎಂದು ಅಂದಾಜಿಸಲಾಗಿದೆ. ಇದು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ದಾಖಲಾಗಿದ್ದ ಶೇ.0.6ರ ಬೆಳವಣಿಗೆಗಿಂತ ಕಡಿಮೆಯಾಗಿದೆ.

ಆದರೆ ಜೂನ್ ತಿಂಗಳಲ್ಲಿ ಬ್ರಿಟನ್‌ನ GDP ಶೇ.0.3ರಷ್ಟು ಏರಿಕೆ ಕಂಡಿದೆ. ಇದಕ್ಕೂ ಹಿಂದಿನ ತಿಂಗಳಲ್ಲಿ ಯಾವುದೇ ಬೆಳವಣಿಗೆ ದಾಖಲಾಗಿರಲಿಲ್ಲ.

ಬ್ರಿಟನ್‌ನ ರಾಷ್ಟ್ರೀಯ ಅಂಕಿಅಂಶಗಳ ಕಚೇರಿ (Office for National Statistics) ಇಂದು ಬಿಡುಗಡೆ ಮಾಡಿರುವ GDP ಅಂಕಿಅಂಶಗಳಲ್ಲಿ ಈ ಮಾಹಿತಿ ಬಹಿರಂಗವಾಗಿದೆ.